JOEL 3 - Cho Bible Common Language 2016

Khanpughi naw pakhui gui M’khoicha khai

¹ Bawipa naw pyen ci, “A cun ah khin ung kei naw Judah la Jerusalem ah bühmang nak cu ka m’tho ba khai.

² Kei naw changpakhui gui avan ka bum gui khai m’khoicha nak ah khong nawi ung ka law püi gui khai. Acu ah ka m’khoicha gui khai cun cu ka chang gui ah khan ah ami bi avan ah phäh ah kyak khai. Ngami naw Israel gui cu akho hei ungka ng’phyiitpai sak gui ci gui, ka khaw Israel cu ng’pai sak ci gui.

³ Ngami naw htung ng’yuk u ne, a u ami pha ah k’bäi ci gui. Ngami naw hnumi hta, pami hta gui cu, khleihtein vai ah m’guk plet nak la yu ah yoi ci gui.

⁴ “Tire, Sidon la Philistia avan, kei ah khan ah a i bi vai ah ang nami tha nak? Kei am a i baw nami na pe ba khai ah nami tha na ne ang? Nami tha nak ah a kyak ung, kei naw ang ghit ah ka ning pe ba gui khai!

⁵ Nangmi naw ka ghui, ka ngui la bühmang ciah ka m’küm cu Taigüim kyong ah nami hteh püi ci.

⁶ Nangmi naw Judah la Jerusalem chang gui cu ami khaw ungka a shou nak ah hteh püi gui u ne Krik chang gui ah nami yoi gui ci.

⁷ Tuhbäi kei naw nami yoih nak gui ah kho hmun ungka ka plawk ci gui khai, ngami ah khan ah nami bi ah mäih ah nangmi ah khan ah ka bik khai.

⁸ Kei naw nami hta hnumi, hta pami gui cu, Judah chang gui ah ka yoih sak gui khai; ngami naw mä shonu ciah Sabean gui ah yoi ba gui khai gui, kei, Bawipa naw ka pyen nei.

⁹ “Shin ah pakhui gui ah ng’lung ah nami shäu vai nei; ‘Ng’tuk vai ah pawng htein vä; nami ng’tuk’bi gui khü gui vä; nami gakap gui avan bum neta hteit vä!

¹⁰ Lai thawn nak ah m’si gui cu khim ah shep vä nami ng’vin gui cu k’htei ah shep vä. Aktha ken ci naw phi ng’tuk bik khai nei.

¹¹ Zaang ne law vä, pei leng ung om ciah pakhui avan, khaw nawi ung bum vä.’ ” O Bawipa, ngami tu gui khai ah, na gakap gui cu tüi law ä.

¹² “Pakhui gui cu pawng ge u ne, m’khoicha nak ah khaw nawi ah lawk khai gui nei. A cu ah kei Bawipa cu ngo ne, peileng ah pakhui avan ka m’khoichak khai nei.

¹³ Ngami cu cheishoh aih ci gui nei; geit khäm yah ung htang ah ah mäih ah aat gui ä; Sapyit neen ah mäih ah neen gui ä sapyit atui kä a luh law pha yawp ah chuih neen ah mäih ah güüt gui ä.

¹⁴ Tämkäp phya khak gui cu m’khoicha nak ah nawi ah om ci gui. Cun cu Bawipa ah hnüüp a gawk law nak ge vai ah hmun ah kyak ci.

¹⁵ Hni la cha hmüp yawp ci, aisi gui kä khang ba ci.

Khanpughi naw a chang gui Hriham pe gui khai

¹⁶ Zion m’htung khan ah ka naw Bawipa ng’hawh ci; ak aw cu Jerusalem ungka hmum kyeek lawk ci; Khomdek la khomik ng’thüng ci. Cun ung phi ani naw a chang gui shungvong gui khai.

¹⁷ “Israel gui, nangmi naw nami hmat khai, Kei cu Bawipa nami Khanpughi nei. Kei cu ka khomhtung theing Zion ah khan ah ka om ci. Jerusalem cu mang gaw theing ah kyak khai; Akho hei chang gui naw kä näng ba phung khai gui.

¹⁸ Cun ah khin ung khomhtung gui cu sapyit shun naw küm khai, khogui päng ung sei gui lum sei hmuh vai; Judah khaw avan ah phäh ah tui gui da khai. Bawipa ah Taigüim ungka tui khawng ne long khai, acun naw Akacia khaw nawi yuk m’shawi khai.

¹⁹ Egypt cu khaw ng’gau ah kyak khai, Edom cu di pikbäih khai, a i ah kyasei ci ung ngami naw Judah khaw tu ne, changnigui ami ngawn ah phäh ah kyak ci.

^20-21 Ami ngawn gui ah phäh ah kei naw phu ka tuk khai; changshe gui cu kä ka m’hlawt gui khai. Cun ung phi Judah la Jerusalem cu ngawi yä khäng khai goi nei, Kei, Bawipa cu Zion m’htung khan ah ka om khai nei.”