JOEL 2 - Cho Bible Common Language 2016

Bawipa ah Hnüüp M’dang ciah Khagek gui

¹ Khanpughi ah theing ciah khomhtung Zion ah khan ah phyungheng tum vä, khingyan khawng vä. Judah chang gui ng’hlet vä! Bawipa ah hnüüp cu gawk law ge ci nei.

² Cun ah hnüüp cu hmüp ne mü khai nei, le ne ng’mei be khai. Khomhtung gui mü hmüp naw aküm ah mäih ah gakap khagek a chün yong lawk khai. Acau phi shin ah mäih ah kä kya man ci, ngawi ah phi shin ah mäih ah kä kya ba khai.

³ Ngami naw a ghing gui cu mei ah mäih ah ei ci gui. Ami ma ah kho hmun cu Eden dum ah mäih ah kyak ci. Cun ung phi ami hnu lam cu khaw ng’gau ah kyak ci. A i phi ngami naw kä phyawn ci gui.

⁴ Ngami cu ng’se ah mäih lawk ci gui; ng’tuk bik ciah ng’se ah mäih ah dawng ci gui.

⁵ Ngami cu khomhtung lai ung ng’pet u ne, ng’se yatha ah mäih ah känggäng ci gui; khu chawng mei ah uih ah mäih ah ng’ging ci gui, Ngami cu ng’tuk bi ge khai ah gakap ah mäih ah ng’kyäng ci gui.

⁶ Ngami ami ng’et law ung chang päng cu kyik ci, chang päng a hmai m’sa ci.

⁷ Ngami naw ng’tuk’bi gui ah mäih ah tuk ci gui; gakap gui ah mäih ah k’paang ung kai ci gui. Ngami ami van cu a yäih ah kai law u ne, ami hteh nak kä m’thawng ci gui,

⁸ a lam hei ung kä hteit ci gui. Ngami cu ng’tuk vai ah ng’hläm lawk ci gui, a i naw kä ng’düm sak gui mhlawt ci.

⁹ Ngami cu mang gaw hnungtuk ne ng’güüt law u ne, ng’vong paang gui ah khan ah dawng ci gui; im gui ung kai u ne, m’guk ei ah mäih ah im kawt gui ung lut ci gui.

¹⁰ Ngami ah ma ung khomdek thüng ne, khomik ng’tum ci. Hni la cha mü ne hmüp ci, aisi gui kä khang ba ci gui.

¹¹ Bawipa naw khong hmum ah mäih ah agakap gui thumkhän gui ci. Ani ngai ciah ga-mo cu chün ne m’gäi ci. Bawipa ah hnüüp cu kyih aih vai kyak ci nei! A u pawih ba hning khai aw?

Ng’yuu ba vai ah ng’khü nak

¹² “Cun ung phi tuhbäi, Bawipa naw pyen ci, Ei hlawi nak la thüi kyah nak awn, M’lung neim sak ne ng’yuu ba ne, kei ah ng’hlat law ba vä.

¹³ Nami m’lung ah payak nak naw nami thüi nak cvu m’dang sä; nami sui nami k’teh düt cu kä bä khai nei.” Bawipa nami Khanpughi ah law ba vä. Ani cu m’hni nak la chim gein nak awn be ci nei; ani cu hnimgei ne a shaitak paang ci nei; ani naw angtäi sei ning geinsei gui ge ci, kä ning m’kyuk gui ci.

¹⁴ Bawipa nami Khanpughi naw amlung thawng ei hman khai bämang ciah geit kaw awn hriham ning pe gui khai nei. Cun ung nangmi naw htang la sapyit tui nami douthak hning khai.

¹⁵ Zion m’htung khan ah phyungheng tum vä; Ei hlawi vai ah ng’thu bäi vä, chang hli khü vä!

¹⁶ Chang gui atäng ah bum gui vä; theing ciah ng’ge nak vai ah pawng püi gui vä; aghipa gui law püi gui vä; a hmaw gui bum gui vä nausen gui phi bum gui vä. Ng’chu ng’la thai ci gui phi ami im nawng shüt ne law u sä.

¹⁷ Taigü gui naw Bawipa ah bii bi u sä sonkyang la Taigüim ung luhnak ah ang lak ung, thüikyap ne taigü u sä. “Bawipa na chang gui dük gui ä. Chang khui hei gui naw, ‘Nami Khanpughi a hawi ang?’ ” cine kä na päipih gaih m’gin en gui u sä.

Khanpughi naw Khonglei ni sak ba ci.

¹⁸ Cun kawn ah Bawipa naw a khonglei am htei nak m’dang ne; a chang gui chimgein gui ci.

¹⁹ Ani naw m’shang gui ci, “Tuhbäi kei naw, htang m’guh ni, sapyit tui ni, olive situi ni, ka ning pe law gui khai, nangmi cu nami phü khai. Ahei pakhui gui naw kä ning päipih ba gui khai.

²⁰ Kei naw asiip lam ah ka lawk ciah khanpeh gui cu ka gawt khai am shah cu khong gau khaw ah ka k’täm gui khai. Ma ciah a khawng gui cu tuisi tuinu ung ka täm gui khai, am shah akhawng gui cu Mediteranean tuinu ung lut khai gui. Sik ciah pumsa gui cu hniim khai gui. Nangmi ah khan ah ami bi avan ah phäh ah kei naw ka m’di gui khai.

²¹ “Kholo gui, kä kyi vä, yeikyai vä, lünlawi vä a i ah kyasei ci ung Bawipa naw nangmi ah khan ah avan abi ah phäh ah kyak ci.

²² Seisa gui kä kyi vä. Khulim gui m’kim ci; sing ghing gui theih ci, Thei gui la sapyit gui phi chün ci nei.

²³ Zion chang gui, yeikyai vä, Bawipa, nami Khanpughi naw nangmi ah phäh ah abi ah hmawk ah yei vä. Ani naw bä ciah khawtui akni ning pe gui ci; ani naw hting kho aa phi yuk chah lawk ci, kä cun pha ung htui khaw aa phi aa sak ci.

²⁴ Htang m’häi hmun cu htang m’guh awn be ne; neen nak ah akpei gui cu sapyit tui la olive situi awn pleip khai gui.

²⁵ Na shum nak gui cu ka ning pe ba khai ng’hlom ciah khanpeh gui naw na geit gui ami ei ah kum ung ka ah kyak ci. Shin ah gakap cu nang ning hnungtuk püi khai ah ka tüih law ah kyak ci nei.

²⁶ Tuhbäi nangmi cu nami ei vai da sei, nami phü ci. Nangmi naw Bawipa nami Khanpughi cu nami m’taam khai, ani naw nangmi ah khan ah cäicat vai gui bi pyi ci. Ka chang gui cu a u naw kä päipih ba gui khai nei.

²⁷ Israel chang gui, nami lung ah ka om cu, nangmi naw nami hmat khai kei cu Bawipa nami Khanpughi ah ka kyak ci, ahei Khanpughi kä om ci. Ka chang gui cu a u naw kä päipih ba gui khai nei.

Bawipa ah Hnüüp

²⁸ “Kei naw chang nü ah khan ah ka mümcha ka yuk chah law kawn ah; nami hta pami, hta hnumi gui naw ka ng’thu shäu khai gui; nami chang vai gui ami mang shen khai, nami chang nong gui muimang mah khai gui.

²⁹ Cun ah khin ung ka mümcha ka yuk chah lawk khai changshäm ung khüt sei hnumi pami van ah khan ah kyak khai.

³⁰ “Kei naw cun ah hnüüp ung khomik la khomdek ung thukbäi cu ka pek khai; si long ne, mei ui ne, khongmei khu khai.

³¹ Khohni hmüp khai, cha cu si ah ng’hlat ne sen khai cun cu dämduh ne kyih vai kyak ciah Bawipa ah hnüüp kä a gawk law pha ung ah kyak khai.

³² Cun ung phi Bawipa ah ng’huipaa ci phung cu hun gui khai. Bawipa naw a pyen ah mäih ah, Jerusalem ung am shah cu phyawng khai; kei naw ka ghü gui cu k’pawih khai gui.