JOEL 1 - Cho Bible Common Language 2016

¹ Shin cu Pethuel ah hta Joel ung gawk lawk ciah Bawipa ah thumkhäh ah kyak ci.

Geit gui di sei chang gui ah thüikyah nak

² Nangmi chang vai gui geing na vä; Judah chang päng naw ngai sä. Nangmi ah khin ung, nami pupa gui ah khin ung shin ah mäih ah kya man ne ang?

³ Shin ah mawng cu nami hta gui am m’thein gui vä; ngami naw ami hta gui am m’thein ba khai gui, shin pha tuk ci naw lawba ciah htangshon ung m’thein ba gui khai.

⁴ Khagek gui cu geit gui ung ng’hlom ne ng’hlom ne ngok ci gui; Ng’hlom ät ayon ba ung, hlom ät ngo law ba ci.

⁵ Awktat ciah chang gui, ng’shüm law ne kyap m’lau vä; yu awk ci gui kyap vä; yu tui ak thai ah pyan vai ah am theih gui cu di pyi ci nei.

⁶ Khagek gakap gui naw mi khonglei tu lawk ci gui nei; ngami cu huham ah u ne kä khei tai vai ah kyak ci gui; ami ha gui cu phongkawng ah ha ah mäih ah ghaat ci.

⁷ Ngami naw mi sapyit gui m’di ci gui mi thei ghing gui phi ei yawp ci gui. Ngami naw a hnawk gui m’neeit u sei, angban gui phi bawk yawp ci.

⁸ Kyap vä, chang gui, a cei ge vaisü si khäta, kyap ciah hnumihta ah mäih ah kyap vä.

⁹ Taigüim ah douthak vai htang la sapyit tui kä om ci nei, Bawipa am ami douthak vai kä om sei, taigü gui thüikyap ci gui.

¹⁰ Lolai gui auh ci gui; khomdek thüikyap ci, a i ah kyasei ci ung htang gui di yawp ci, sapyit gui ket yawp ci, olive sing gui chawng yawp ci.

¹¹ Cäi ng’ä vä, lo bik ci gui; sapyit m’htei ci gui kyap vä; a i ah kyasei ci ung atun, am guh, geit avan di pyi ci nei.

¹² Sapyit ng’shun gui la thei ghing gui cu chawng ci gui; m’theih ciah aghing gui avan chawng ne sik ci gui. Chang gui ah yeikyai nak phi maih ci nei.

¹³ Sonkyang ung bii bik ciah taigü gui; ng’yu nak sui sui ne kyap vä! Taigüim ah hteit ne mü lüng ne kyap vä! Nami Khanpughi am nami douthak vai atheih, atui a i kä om ci nei.

¹⁴ Ei hlawi taigü vai ah k’bäi vä; chang van ng’bum vä! Ang vai gui la Judah chang gui avan Bawipa nami Khanpughi ah Taigü kyong ah bum u ne, ani ah kyap lau vä!

¹⁵ Bawipa ah hnüüp cu ng’et ci nei, cun ah hnüüp ung m’gäi ci naw dishum nak law püi khai. Cun ah hnüüp ung a lawpüi vai cu kyih aih vai kyak ci nei!

¹⁶ Mi geit gui adi cu m’htei khai kä om sei mi teng düt ci. Mi khanpughi ah Taigüim ung yeikyai nak kä om ci.

¹⁷ Khomdek chawng sei geit m’shi gui sik ci. Khei ung thun vai htang kä om ci, khei gui ghawng ne ng’phye yawp ci nei.

¹⁸ Sei gui cu geinvai ne m’lau ci gui a i ah kyasei ci ung ami ei vai khu kä om ci; hto ng’bum gui phi yaica ci gui.

¹⁹ Kyap ne ka ng’pa ci nei, Bawipa, a i ah kyasei ci ung khu lim gui la sing gui cu chawng yawp ci, cun gui cu mei naw ui yawp ci nei.

²⁰ Tui lawng gui kawi yawp sei, khisa gui phi nang ah kyap ne ng’pa ci gui nei.