JOB 9 - Cho Bible Common Language 2016

Joba

^1-2 Ä, cun gui avan cu ayan kei naw ka ng’ya pyi ci nei. Cun ung phi chang naw Khanpughi hnungtuk püi ne a i cha ah ng’näng nak gah hning khai zaw?

³ A i cha ah a u naw ani am pyen na ba hning khai aw? Ani naw phya gha ng’shi nak gui ng’shi sei a u naw ka phyei hning man ci.

⁴ Khanpughi cu cüivai ne huham mah ci nei; a u naw ani kä ng’tuk püi hning ci.

⁵ Ani naw m’htung gui phi kä m’cäi bek ling ah m’hnawn ne am’lung she nak awn m’shet gui ci.

⁶ Khanpughi naw shihpi thüng sak ne kho m’dek cu k’thüng ci; kho m’dek han dä ciah k’tung gui phi k’thüng ci.

⁷ Ani naw khohni cu kä a luh law vai la, aisi gui cu khomü ah kä mi khang vai ah m’khit näng ci.

⁸ Khanpughi amät bäng naw khankho gui cu yuk khui lawk ci. Tuinu likim ah m’ghuk cu leh ci.

⁹ Khanpughi naw Dipper aisi, Orion aisi, Pleiades aisi gui la hai lam täng aisi gui cu Khankho häi ung bat ci.

¹⁰ Mikmi naw ani ah aküikyang ah abi gui la a khüt nak kä om ciah cäi aih vai gui cu kä mi k’shing hlawt ci.

¹¹ Khanpughi cu ka pei ah hteit sei kei naw kä ka hmu hlawt ci.

¹² Ani naw ang yak hlü bi sei a u naw kä ng’düm sak hlawt ci; “A i cu na bi?” cine a u naw kä ng’shi dat ci.

¹³ Khanpughi cu ani hnu ng’tuk püi ciah Rahab ng’düih püi ci gui ah aga gui ah khan ah am lung she nak cu angtäi ah om ci.

¹⁴ Cun kyasei a i hawkcha ah Khanpughi cu ka m’shan ba hning kaw?

¹⁵ Kei cu changni ah ka kyak ung phi, ka bi hning avan cu Ka suki Khanpughi ah chimgein nak ng’zoih vai bäng nei.

¹⁶ Cun tu pang ung phi avaisü ah ana ng’thu tu sak ung phi, ka pyen na ngaih pe khai ah kä ka ngai hlawt ci.

¹⁷ Ani naw va leng leng ne na chei hling sak khai ah puikhaw khi cu, amawng ah ka ah tüi lawk ci.

¹⁸ Kä ka ng’ghi hlawt khai ah; ak kha gui phung awn ka ghin nak cu be sak ci.

¹⁹ Ling ne ka k’tha nak khin naw? Khanpughi ah khan ah? Taga yung ah ka ng’khah pui khin naw? A u naw ani cu yung ah ceh sak hning khai aw?

²⁰ Kei cu theing ne ka bekhüt ci, cun ung phi ka ng’thu naw na m’shet ne, ka pyen phung van naw na m’kyuk khai mäih lawk ci.

^21-22 Kei cu ka theing ci, cun ung phi a u naw kä na shum ci. Kä ka ghin ba hlük ci. Chang ni phi changshe phi Khanpughi naw m’di ci.

²³ Changniakteng ah asih law ung, Khanpughi gaih ci.

²⁴ Khanpughi naw changshe gui am khomdek cu pek gui ci. Suki gui van cu m’dah sak gui ci. Acun Khanpughi naw abi ah kä akyak ung, a u naw cu a bi?

²⁵ Ka kho hnüüp gui cu dawng u ne, atumat phi kei ah phäh ah kä nik ci.

²⁶ Ka ghin kho hnüüp gui cu gai pi bäih ciah htinpaw ah mäih la, m’hmu naw vi a lawh law ung a yawng phäi law ah mäih ah dawng ci.

^27-28 Hmai kyang ne ka yaica nak m’hnih vai ah ka k’tha nak law ung, ka genvai nak avan na m’kyimkyawk khai ah law ba ci gui; Khanpughi naw ka hma nak kä na ngaih pek ci cicu ka hmat ci.

²⁹ A hma nak om ciah ana tha pyi ah kya ne, a i ah kyasei a kholä ah ka k’tha nak ba vai ang?

³⁰ A i satpia naw phi ka hma gui cu kä m’shi hning ci.

³¹ Khanpughi naw khuinu ah khui ah lelawi gui awn na ghawt ci, ka suisak gui hngaw naw na ng’aa nak ci gui.

³² Khanpughi cu chang ah a kyak vai sü ung, ka phyei hning khai sü te; kaning cuhcan thu m’cha nak vai taga yung ah ka ni hteit hlawt khai.

³³ Cun ung phi ka ning laat ung ng’düi khai a u kä om ci — a u naw kei la Khanpughi cu thu kä na m’chak khai.

³⁴ Na na m’kyuk nak m’düm ä, Khanpughi! Na na m’kyih nak akthuk ah tüi ä!

³⁵ Kä ka kyih ci. Ka mät ah ka m’lung ka hmat ci kya sei ka pyen ni lawk khai.