JOB 8 - Cho Bible Common Language 2016

Bildad

^1-2 Nang cu khokhi ah mäih ah na ng’thu awn hnu na khüm naw?

³ Khanpughi naw taga nak cu kä ng’phyui ten sak ci; Ani cu hman ci bi nak ung kä shum man ci.

⁴ Nang ah hta nau gui naw Khanpughi hnungtuk püi ne hmakak ci gui, Cun ah kyasei ani naw ami bi ah mäih ah m’kyuk gui ci.

⁵ Cun ung phi tuhbäih ng’hlat law ba ne, m’gäi ciah Khanpughi ah ng’coi ng’pa vä;

⁶ Nang cu ng’düng aih ne na theingthap ah a kyak ung, Khanpughi law ne ning m’hteihtang khai, aning m’cümhnah nak ah na kyong khui cu m’tho ba khai.

⁷ Na shum shäuh ah na khawh avan awn m’tumtäng ne kä gah vai ah Khanpughi naw ning pe ba khai nei.

⁸ Cau cüivai nak ah ng’thu cu ashäng shui zap shüm vä; Mi pupa gui ah ng’theithang ah düng nak cu ngaih-tüh shüm vä.

⁹ Mi ghin nak cu tawi ci, a i phi kä mi hmat ci; Mikmi cu khomdek phlän ciah ang hnim ah mäih ah mi ng’kawn ci nei.

¹⁰ Cun ung phi cau cüivai chang gui ah ami ning m’theihtang cu dou vä; Ngami naw ami pyen cu ngai vä:

¹¹ “Tui kä a om nak ung phiphät kä phung hlawt ci; ng’än na kä om nak ung cun gui kä hmuh nei.

¹² Tui a kawi ung cun gui cu ng’zong law ma ci, Cun gui cu tu ne mang vai ah zaw aih ci gui.

¹³ Khanpughi kaa ah om ci gui cu cun ah phiphät ah mäih ah kyak ci gui; Khanpughi ami m’hnih vai am, ami ngaih u nak cu maih ci.

¹⁴ Ngami naw pyai la bangkaga ah ng’gan cu ngaih u ci gui.

¹⁵ Ngami naw bangkaga ah ng’gan ung ami ng’bah ung cun naw m’khüt hning khai ang? Ngami naw pyai ung ami ng’pan ung ami ng’düih ba hlawt vai ah acun naw bawm gui khai aw?”

¹⁶ Chang shekha gui cu khohni ah so nak ung tawi ciah m’ghawshe ah mäih ah kyak ci gui, acun m’ghawshe gui cu dum avan ung ng’phan ci gui.

¹⁷ Cun ah a pyaa gui naw lung gui ghak ne, Lung k’pou gui nü ung kaai ci gui.

¹⁸ Cun ung phi mawih ba gui ah akyak ung a cun ung om man ci gui ah a u naw kä hmat khai.

¹⁹ Chang shekha gui ah yeikyai nak cu a cun ah mäih ah ng’pyi khai; Tuhbäi ahei gui law ne ami hnün cu la ne om khai gui.

²⁰ Cun ung phi Khanpughi naw bekhüt ci gui cu a i yah ung phi kä nawng gui khai, chang shekha gui cu a i yah ung phi kä m’htei gui khai.

²¹ Ani naw gaih ne m’lau nak vai ah akhin ning pe ba gui khai,

²² Cun ung phi nangmi ning thüi na gui ciah khan ah lü ng’aa nak law püi khai, chang omshe gui ah im gui cu maih khai gui nei.