JOB 7 - Cho Bible Common Language 2016

¹ Hnicim chang ah ghin nak cu, gakap naw k’tut ne bii abi ah mäih, akghat ah bii bik ciah ghin nak ah mäih ah kyak ci,

² Gei ciah ang hnim nak shui ciah hlei htein mäih, ang cheng vai ngäng ciah bii k’bi ah mäih ah kyak ci.

³ Cha ät päng ung kei ung ka ghin nak hlü vai a i kä om ci. Mü ät pyi päng ung mü ät kei ung ka thüi nak bäng vai gawk lawk ci.

⁴ Kei cu ka ip khai ah ka ng’zän ung phi akhin kä ng’pyi hlawt ci; Kei cu amü pum ng’hleei ne a thaih vai ka ging cou ci.

⁵ Ka pumsa cu m’kyit bäng ah kyak ci; khei bäng naw küm ci; Kei ah ka khei gui cu ngaih u vai kä om sei ng’pyi ci.

⁶ Kei hnüüp gui cu ngaih u vai kä om sei ng’pyi ci. Tah tah ciah tah gawhtung ah ta yang pi ne ng’pyi ci.

⁷ O Khanpughi, na shüm ä, kei ah ka ghin nak cu ng’ghi nak bäng ah kyak ci nei; kei ah yeikyai nak cu ng’pyi ci nei.

⁸ Tukbäi nang naw na na hmuk ci, cun ung phi kä na na hmu law ba khai. Nang naw na na shui ung phi kei kä ka om ba khai nei.

^9-10 Khongmei ng’kawn law ne amaih ah mäih ah, chang cu asih ung kä ng’hlat law ba ci nei; ani hmat ciah chang avan naw ani cu m’hnih ci gui.

¹¹ Ka nei! Kei cu adüm ah kä ka om khai! Kei cu ka m’lung she ne, ka m’lung khak ci. Kei naw ng’thu ka pyen ci nei.

¹² A i ah kyasei kei cu ngäng ne nami na tha ang? Nangmi naw kei cu k’phyu ng’ghaw ah nami na ngai ne ma?

¹³ Kei ng’zän ne, ka ih vai ah ka k’tha nak ci; ka natnak ang mang vai ah ka shui ci nei.

¹⁴ Cun ung phi nang-nang naw ka mang ung na na kyik kyawk sak ci nei. Nang naw muima gui la büm nak gui na tui lawk ci kiasei

¹⁵ Kei cu shin ah mäih ah pumsa geinvai ne ka ghin ah k’dam k’hteeu ne ami na ngawn ung bä khai ah ka ngai ci nei.

¹⁶ Kei ka m’lungsi ci, ka ghin nak ka cümbawng ci. Ka mät na nawng vai, ka ghin nak naw a i kä m’khüt ci nei.

¹⁷ A i ah kyasei chang cu nang ah phäh ah a küikyang aih ang? A i ah kyasei ani ah bi cu na ngaih pek ang?

¹⁸ Nang naw a ngawi hta tä teng m’kein ne, minut päng ung na m’nüm ci nei.

¹⁹ Kei naw ka m’shi ka m’düh yah ung na cu a hei ah kä ng’hlat ne na om khai ang?

²⁰ Chang teng ciah nang Thawng bawi, kei ah ka katnak naw ning nat sak ne ang? A i ah kyasei kei cu na bungkhäh nak ah na na mang ang? Nang ah khan ah gih aih ciah phuih ah ka kya ne ang?

²¹ Kei ah katnak cu kä na na m’geinsei hning ne ma? Kei naw hma ciah ka bi gui cu kä na na m’geinsei hning ne ma? Kä shou pha sei kei cu ng’phuh hmun ung ka hteit lawk khai, ka htait pyi khai nei.