JOB 6 - Cho Bible Common Language 2016

Joba

^1-2 Kei ah ka khüikha nak la ka thüisei nak cu khin ah a kyak vaisü ung,

³ Tuinu ung laigin gui ah ta gih pi khai nei, Cun ah kiasei kei ah ng’thu m’ghä gui naw kä ning cäicat sak khai nei.

⁴ M’gäi ciah Khanpughi naw am’la gui awn na kap ci, Ngami ah ami m’äm cu kei ah pumsa avan ung gawk ci nei. Khanpughi naw kei ana kyih vai hnungtuk nak cu m’hnüt k’bäi ci nei.

⁵ Ng’sela cu khu a ei ung bä ciah ngai ci, Seipat naw khu chawng a ei ung düm ah om ci.

⁶ Cun ung phi kä tuihlim ci, m’shi kä shum ah ei cu a u naw ei hning khai aw? Ai m’tui akikok ung abä nak a i om ne ang?

⁷ Kei ung cun ah mäih ah ei cu kä chem ci, kei ah ka ei nü naw kei na gaw sak ci.

⁸ Kei naw ka k’thäh cu a i ah kyasei Khanpughi naw kä ana pek ang? A i ah kyasei kei ah taigü kä a na m’shan ang?

⁹ Ani naw ma ne kei ana ngawn ah akyak ung phi!

¹⁰ Ani naw abi vai ka hmat ung phi, kei cu yei ne ka ng’htawt khai nei. Ka m’neh cu a i hlawk ah adäm ung phi ai kä kyak khai nei. Khanpughi cu theingcim ciah kei naw ka hmat ci; Ani ah thumkhän cu kei naw kä ka hnungtuk phung khai.

¹¹ Kei naw ghing ne om nak vai a i thagui ang ka gah? Ngaih u nak kä a om ung a i vai ka ghin ang?

¹² Kei cu lung awn ami na pyan ang? Kei ah pumsa cu kyei ah kya ne ang?

¹³ Ka mät naw ka mät ka hun nak vai kei ung thagui Kä om ci; na m’htei khai ka ng’hlah shi vai a hawi kä om ci nei.

¹⁴ Shin ah mäih khüikha nak ung ka om sangung kei ung bekhüt ciah teihpüi hlü ci nei — Kei naw Khanpughi ka nawng ung phi, kä ka shui ung phi.

¹⁵ Cun ung phi ngami ka teihpüi gui, khaw kä a aa ung kawi ciah tuihta ah mäih ah nangmi naw nami na m’hleei ci nei.

¹⁶ Tuihta gui cu goh la khüi awn be ci gui nei,

¹⁷ Cun ung phi kho ang ling law ung maih yawp ci gui cun ung phi tuihta cu ket ne chawng ci.

¹⁸ Sumlei hteit hton ci gui cu tui shui ne maih ci gui; Ngami cu khong gau ung ng’väi ne sik ci gui.

¹⁹ Shebala Tema ah ka hteih hton ci gui cu ng’shui shüi ci gui,

²⁰ Cun ung phi tuihta ket ah pei ah ami ngaih u nak maih sei sik ci gui.

²¹ Nangmi cu kei ung acun ah tuihta ah mäih ah nami u nawk Nangmi naw kei ah ghin ma hmat u ne, kyih nak ung nami na khü naw na kaih ba ci.

^22-23 Kei am m’cümhnah nami na pek vai, käcung kei ah hnün ung tumat mat am ng’mü khawh pek vai, Käcung ga gui ungka, käcung m’gäi m’cik ciah kut ungka na na hun vai ah ka thäh man ne ang?

²⁴ Ä, na m’theithang ä; kei ah ka katnak gui na m’thein ä. Kei cu adüm ah om ne ka ning ngai khai nei.

²⁵ Düng nak ah thu gui cu ngaih gep vai kyak ci, cun ung phi nangmi akholä nami pyen ci.

²⁶ Nangmi naw alä düt käcung khokhi düt ka pyen ciah nami ngai ci; A i ah kiasei ngaih u vai kä om ciah ka ng’thu cu nami na m’shan ang?

²⁷ Nangmi naw hmeihta khlei htein gui ah phäh ah m’shüih tawk ne nami bik ci, Nami ng’kawt ciah nami teihpüi gui ungka nami mät nami bühmang vai ah nami bik ci!

²⁸ Kei ka hmai na teng vä, kä ka hleei ci nei.

²⁹ Nangmi cu a shou nak ah nami gawk ci nei. Kä taga cicu m’düm vä. Kä na m’kat vä. Kei cu ka ng’düng ci nei.

³⁰ Cun ung phi nangmi naw kei ka hleei ciah nami ngai ci Nangmi naw lima ci ungka düng ci cu kä ka pyen hning khai ah nami ngai ci nei.