JOB 5 - Cho Bible Common Language 2016

¹ Joba, ng’khü ä. Chang tumat mat naw ning m’chang khai ang, teng ä. Nang naw na ng’hlah shi vai ah khanchang na mät naw na mät ng’ä na ä,

² Khüikha ne na mät na sih en vai ah na mät naw na mät ng’ä na ä, Cun cu gu ang ne akholä bi ah kyak ci nei.

³ Kei naw m’lung üp nak dang sak ciah akgu-ang gui ka hmuk ci, Cun ung phi ngami ah im ah khan ah kei naw ang ghit plah taam nak ka khü ci.

⁴ Ami hta gui naw phyawn nak kä hmu hlawt khai gui; yung ah m’kawt ung ngami shungvong gui ne ng’düi khai a u kä om ci.

⁵ Ei cawi ciah chang gui naw akgu-ang ah thui-an ei khai gui — Htang gui cu ng’hling ah hmu ah phung ghing khai gui — Tui gha ci gui naw ani ah bühmang nak cu m’thüi m’khang ci gui.

⁶ Akshekha cu ang leikni ung kä phung hlawt ci, Khüikha nak cu khomdek ah k’pung ung kä phung hlawt ci.

⁷ Ka akcang! Chang naw amät ah khüikha nak cu amät ah khan ah law püi ci, Cun cu akcang ah mei ah khan ah mei m’ghi a pawng ah mäih ah kyak ci.

⁸ Kei cu nang ah ka kyak vaisü ung, Khanpughi ah ng’hlat ne, ka mawngma cu ka pek khai süte.

⁹ Ani ah bi ah dämduh ciah amawng gui cu mikmi naw kä mi hmat ci, ani naw cäiaih gui vai abi cu kä ng’pyi hlawt ci.

¹⁰ Ani naw khonglei ah khan ah khaw aa sak ne, lolai gui cu tui awn shawi ci.

¹¹ Ä, ng’neim ci gui m’tho gui ci cu Khanpughi nei, thüisei ci gui avan am yeikyai nak pe gui ci nei.

^12-13 Ani naw theileh ci gui ah pawngpüi cu lule lat ci, Cüivai ci gui cu ami mät ah m’hnüt bäi ung pha gui ci. Cun ah kyasei a i phi ami bi ung näng nak kä om ci;

¹⁴ Kho hnüüp phi hmüp khui ah mäih ah ng’vaak ci gui.

¹⁵ Cun ung phi Khanpughi naw du khai ci gui cu sih nak ung hun gui ci; Ani naw pyam tham ci gui cu k’shedam nak ungka hun gui ci.

¹⁶ Ani naw dukhaih ci gui am ngaih u nak pe gui ne, ak shekhaa gui ah düm sak gui ci.

¹⁷ Khanpughi naw am düng ah chang cu yeikyai nak om ci! Ani naw aning m’cäi law ung kä na thüi nak vai.

¹⁸ Khanpughi naw abi ah leim cu hlawp pek ci, a kut awn ning nat sak ne, a kut awn ning khan sak ci.

¹⁹ Akhin päng ung ani naw nat nak päng ng ning hun khai;

²⁰ Khaw a yaw ung ani naw ghin nak ning pek khai, ng’tuk nak a om ung sih nak ung ning shungvong khai.

²¹ Khanpughi naw ng’thushe ungka ning gung khai, dishum nak a gawk law ung ning hun khai.

²² Nang naw cawi m’saa nak la cawikhaih nak cu na gaih tuk khai, Khisa gui cu kä na kyih en vai.

²³ Nang naw na bi ah lolai gui ung lungnu gui kä om khai, khisa gui naw kä ning plawh sheh khai gui.

²⁴ Nang cu na k’pyu ung dimdeih sei na om khai; Nang naw na htome gui na teng ung phyawng gai u sei na hmu gui khai.

²⁵ Nang ung khu m’kim khaw ung khu ng’thoot ne a lim ah mäih ah na hta gui da khai.

²⁶ Khäm vai ah akhin ung hmin ciah cu ng’htang ah mäih ah nang cu ghi ne na ghing khai.

²⁷ Joba, keimi naw shin cu akshou kami ng’thei ci, shin cu ng’düng ci, tuhbäi dou vä.