JOB 41 - Cho Bible Common Language 2016

¹ Nang naw k’samnu leviathan cu nga m’kaih awn na pha man ne ma? Kä cun ung am lei kä hnün hlawt khai ah gui awn na khit hning ne ma?

² Nang naw ani cu ah na ung gui awn na khit hning khai ma? Kä cun ung ang being guh cu m’sii m’kaih awn na khit hning khai ma?

³ Ani naw na luat sak vai ah ning ng’paa nak khai ma? Na m’gein vai ah ning ng’coipa khai ma?

⁴ Ani cu nang awn yum ät ni ne khong län ung na bii bik khai ah shaita ne ma?

⁵ Nang naw na vuh ah khahta na cawhpeh nak ah mäih ah na cawhpeh nak khai ma? Na changshäm hnumi hta gui ah gü ng’lah nak vai ah nak pawng khai ma?

⁶ Nga hleih ci gui naw ani ami hleih vai ah k’thäh khai gui ma? Sumlei ci gui naw ani ami yoih vai ah m’chün pit pit khai gui ma?

⁷ Nang naw ani k’phlep gui cu nga kah htung awn na be sak khai ma? Ani ah lu cu nga k’htei awn ng’täih khai ah na shun khai ma?

⁸ Ani hnü ät na tawn ung cun kawn ah kä na tawn ba hlük khai nei. Ani awn nani ng’läng na nak cu a i yah ung phi kä na m’hnih khai nei.

⁹ Leviathan hmuk ciah chang päng cu aktha maih sei kyu ne ng’yän ci nei.

¹⁰ Cun ah k’sam nu cu am lung thawh law ah akiyak ung, kyih aih vai kyak ci nei. A u phi ani ah ma ah kä ng’düi dat cinei.

¹¹ Acun cu ng’tuk püi neta amät phyawng ei hning ci om ne ang? Khomdek khan avan ung cun ah bi hning khai a u kä om ci nei.

¹² Leviathan ah a kho gui ah mawng la ani a i hlawk ah dämduh ne gaigawng ci, ciah mawng cu ka ning m’thein gui khai.

¹³ Ani ah akhan vun cu a u naw kä lim hning ci. M’si ng’thuh htu awn täng ciah avun ng’lep goi cu a u naw kä k’täih hlawt ci nei.

¹⁴ A u naw ani ah m’gawng cu aan sak hlawt khai ang? Am gawng kyong ah ng’tän ne om ciah a ha gui cu kyih aih vai kyak ci nei.

¹⁵ Ani ah ak pang ung lung ah mäih ah kya ne shawi ah mäih ah ng’phoh ciah ak phlep gui om ci nei.

¹⁶ Cun ah ak phlep gui cu ng’et ne ng’phoh aih ci gui kya ne khokhi phi kä lut hlawt khai kyak ci nei.

¹⁷ Cun gui cu a i awn phi k’phyan ne kä m’khüt vai ah khäng htek ne ng’htak ci gui.

¹⁸ Ani am si ah akyak ung Khokdei pyü ne Amik gui cu khohni pyü ah mäih ah kyak ci.

¹⁹ Ani ah m’gawng ung mei k’däi lut law ne Mei ah pying yawp ci.

²⁰ K’am ah ka ah m’ghaw ui ciah mei a khu law ah mäih ah a hna ung meikhu lut lawk ci.

²¹ Ani ah ng’ghi nak ah khokhi cu mei k’eh mei ah uih ah akdang ung mei cak lut lawk ci.

²² Ani ah hnü gawn cu huham mah aih sei hmuciphung naw kyih ci gui.

²³ Ani ah avun cu a dän nak a i phi kä om ne m’sii ah mäih ah m’liu ci.

²⁴ Ani ah m’lung cu lung song ah mäih ah khäng ne Lungsum ah mäih ah m’liu ci.

²⁵ Ani ang düih law ung aktha ghat pi ci gui phi kyi kyawk ci gui. Ngami cu kyi aih u ne akgu ah mäih ah kyak ci gui.

²⁶ Ani k’phleim bai nak vai ah a i khim phi kä om ci, A i sü m’la, a i k’htei naw phi ani kä pluk na hning ci.

²⁷ Ani naw m’sii tawn cu htang gong ah mäih, kyei tawn cu sing k’thu ah mäih ah ngai ci.

²⁸ M’la awn kah ung kä dawng ci, yaili awn kah ung lung cu ani ah phäh ah htang ko ah mäih ah kyak ci.

²⁹ Ani naw thah htung cu htang gong ah mäih ah ngai ne, k’htei awn shun ung gaih düt ci.

³⁰ Ani ah apoi ung ak phlep gui cu ghat ne k’am koi k’hauh awn täng ci, ani ng’vaak ne a hteh ung m’dek cu lai thawn ah mäih ah kyak ci.

³¹ Ani naw tuinu cu k’hnawk ne k’am ng’kyah ah mäih, situi ng’liah ah mäih ah m’vom sak ci.

³² Ani naw deikhang ciah lam cu hnu na ne tuinu cu a bawk ah m’bawm sak ci.

³³ Khomdek khan ung ani awn m’tumtäng nak vai a i khisa kä om ci. Ani cu kyihkyawk nak kä om ciah kyak ci.

³⁴ K’thamah pi ciah khisa gui phi ani naw a i ah kä sui ci. Ani cu khisa avan ah ghangpughang ah kyak ci.