JOB 4 - Cho Bible Common Language 2016

Akhtük bäih Ng’ge Ng’pai nak ( 4:1—14:22 ) Eliphaz

^1-2 Joba, kei naw ka ning htau püi ung na hnga khak khai ang? Kei cu düm ah kä ka om ba hlawt ci nei.

³ Nang naw chang akda na m’theithang gui ci. Aktha ken ci am thagui na pek ci.

⁴ Chang tumat mat cu kyu ng’täng ne aktha ken sei, acüm bawng ah a kyak ung, Ani angdüih law ba vai ah nang ah ng’thu gui naw thamah sak ci.

⁵ Tuhbäi khüikha nak nang ah khan ah a gawk law läi ung, acun büiawt vai ah na kyim aih ci nei.

⁶ Nang cu Khanpughi na khawihnah ci kya ne, na ghin nak ung pyen vai kä om ci, Cun ah kyasei nang ung m’lung üpnak la ngaih u nak a om vai kyak ci.

⁷ Tuhbäi ngaih tuh ba ä. A u chang düng naw leigai büiawt man ne ang, pyen shüm ä.

⁸ Chang gui naw shekat nak ah lai thawn u ne, Cheishoh nak ah m’shi phu u sei ka hmuk ci nei; Tuhbäi ngami naw cheishoh nak la shetkat nak cu aat ba ci gui nei.

⁹ Khanpughi naw ngami cu am lungshe nak awn puikho khi ah mäih ah m’di gui ci.

¹⁰ Changshe gui cu phongkawng ah mäih ah m’ngaw ng’pyang ci gui, cun ung phi Khanpughi naw adüm ah om sak gui ne ami ha ci hnget gui ci.

¹¹ A lawh a ei vai kä om ciah phongkawng gui ah mäih ah, ngami cu sik khai gui, ami hta gui avan cu püipiang khai gui.

¹² Hnü ät ung ng’thu tumat adüm hta ah gawk lawk ci, Adüm aih ah kiasei kei naw kä ka ng’ya veih ci.

¹³ Ana büm ah mäih ah kei ah ka ih nak cu na tüihtok ci,

¹⁴ Kei cu ng’hlet ne ka cat ci; ka pumsa avan kyi ne ng’thüng ci.

¹⁵ Khokhi häi naw ka hmai na khi sei, Kei cu kyi ne ka lumu tho ci.

¹⁶ Cän ung a i baw ng’düi sei ka hmuk ci; Cun cu a i ang ciah ka pyen law khäät te ci kä ka pyen hning ci. Cun kawn ah a diing nak ungka k’aw lut law sei ka ng’yak ci.

¹⁷ “Khanpughi täng ah ng’düng ciah chang om hning khai ang? Tüisho ciah ma ah theingthap ci om hning khai ang?

¹⁸ Khanpughi naw a khanchangshäm gui phi kä ngaih gep gui ci; a khankhochang gui phi ani naw ami katnak hmu gui ci.

¹⁹ M’dek awn a tüipyan cu ani naw ngaih gep khai ah nami ngai naw, cun cu m’hu ah mäih ah güüt hning ah m’vut ah mäih ah kyak ci nei.

²⁰ Chang cu khongnawi täng ung ghing ci, cun ung phi kä ngaih-tüh ah mühun täng ung shi thei ci.

²¹ Ani asih ung akaa avan cu shum ci, cüivai nak phi maih ci nei.”