JOB 3 - Cho Bible Common Language 2016

Khanpughi ah Ma ah Joba Ng’thu m’da ci

¹ Ak hnu ah Joba cu adüm ah kä om law ba hlawt ne, ang tüi nak hnüüp cu plah tam ci.

Joba

^2-3 O Khanpughi, kei ah ka ng’tüi law nak hnüüp cu phyun taam ä; Ami na hta nak law nak mü cu phyum tam ä!

⁴ Khanpughi, cun ah hnüüp cu mü hmüp ah m’hlat ä; Cun ah hnüüp cu kä shüm en ba ä; Cun ah khan ah akdei kä ng’shü en sak ä.

⁵ Cun ah hnüüp cu ng’ziin ne mü nu sä; Cun ah hnüüp cu ng’mei naw shung sä, khohni kä so en sä.

⁶ Cun ah mü cu khokum ungka maih sä, Mü hnüüp khei nak ung kä khei tuba vai nei;

⁷ Cun ah mü cu pang ne dim ship ship sä, yei nak maih ciah mü ah kya sä.

⁸ Cecai ci gui m’thein gui vä, cun ah hnüüp cu plah taam u sä, ngami naw Leviathan a i cha ah k’pan vai cu hmat ci gui nei.

⁹ Thaih ke aisi cu kä k’khang khai ah k’pang vä; Cun ah mü ung khaw a thaih law vai ngaih u nak kä om sä.

¹⁰ Ana ng’tüi law sak la yaica thüsei ana bui awt sak ah phäh ah, Cun ah mü cu plah tam nak om sä.

¹¹ Ka nu ah puk khui ung kä cung Ka ng’tüi law vai am sih vai cu kei naw ka yum ci nei.

¹² A i ah kyasei ka nu naw am khuuk khan ah ana k’pawm ang? A i ah kyasei ang kyang ung suuk ana tu ang?

¹³ Kei cu cun yah ung ka sih vaisü ung Tuhbäi ng’düm ne ka om khai süte nei.

¹⁴ Cun cu cau mang im gui co ci gui ah ghangpughang gui la uktu gui ah ih mäih ah kyak khai süte nei.

¹⁵ Ami im ghui la ngui awn be sak ciah manghta gui ah mäih ah kei cu ka ih ung,

¹⁶ Ami yoih yawih nak ah hta ah mäih ah kei cu ka ip khai süte.

¹⁷ Changshe naw akshe ah om gui cu phuh hmun ung ng’düm ci gui. Bawngbai ciah bii bik ci gui phi ng’düm ci gui nei.

¹⁸ Thawng kium gui phi ding gei sei om ci gui, M’lau pyaan züih sha ung luat ci gui.

¹⁹ Chang nü cu a cu ah om ci ming thang ci la a u ah kä hmat gui, Khlei htein gui cu ak hnu ah luat ci gui.

²⁰ A i ah kyasei chang gui geinvai sak ne ami ghin lä ang? Thüsei ciah chang gui naw a i ah kyasei akdei ami gah ang?

²¹ Ngami naw sih nak cu ngäng ci gui, cun ung phi cun cu kä law phung ci; Ngami naw khawh cham ah ta ng’phuh hmun cu ng’ya hlük ci gui.

²² Ngami cu si ne ami ng’phuh güt kä yeikyai ci gui:

²³ Khanpughi naw ngami ah malam amawng cu thuh pe gui ne, amawngma päng ung shum gui ci.

²⁴ Kei cu ka ei nak vaisü ung ka kyap ci, Ng’hlaw ei nak ung kä ka kyap ci,

²⁵ Kei naw ka kyihkyawk gui nü cu gawk lawk ci nei.

²⁶ Kei ung dimdeih nak, düm nak kä om ci, Ka yaica nak gui cu kä ng’pyi hlawt ci nei.