JOB 21 - Cho Bible Common Language 2016

Joba

^1-2 Kei naw ka pyen cu ngai ä, cun cu kei naw ka m’lung üp nak vai ah ka ning k’thäh nei,

³ kei naw ng’thu ka pyen nak vai akhin na peä, Ka pyen kawn ah nami na m’lepse hning ci nei.

⁴ Kei awn kani ng’vawk cicu chang ah kä kya ci, kei naw ka m’lung kä a ng’sau nak ah amawng om ci nei.

⁵ Na teng vä, kei ah ka müi naw nami kut awn nami m’gawng k’bawm ne nami om khai ah ning cat sak gui khai nei.

⁶ Kei ah khan ah gawk lawk ci gui cu ngaih-tüh neta, cäi ne catne ka ng’hlet ci nei.

⁷ A i ah kyasei Khanpughi naw changshe gui ghin sak gui ne ghi ne ng’mang ne om sak gui ang?

⁸ Ngami ung ami hta gui la ami tu gui om ci, Cun gui ami ng’vai law güt teng m’htei ne om ci gui.

⁹ Khanpughi naw ngami ah im ung leigai kä law püi ci, Ngami kä kyi kyawk ne ghing ci gui,

¹⁰ Ngami ah ami sei m’na gui da I gui, kä yaica ne hta nau ci gui.

¹¹ Ngami ah hta nau gui cu htome hta ah mäih ah gü ng’lah ci gui.

¹² Tumkhawn gui awn ng’müi khai ah ng’lam ci gui.

¹³ Ngami cu ami ghin nak ung dimdeeih sei om u ne kä yaica ne ak ding ah sik ci gui.

¹⁴ Chang shekha gui naw ami mät om khai gui ah pyen ne Khanpughi m’thein ci gui. Ngami naw ami ghin nak ung ani ah ng’yak hlü cu kä hmat hlük ci gui.

¹⁵ Ngami naw Khanpughi ah bi bi vai kä hlü khai, Ani ah taigü vai kä hlü khai ah ngai ci gui.

¹⁶ Ngami naw ami mät ah thagui awn m’khüt näng ci gui ah pyen ci gui. Cun ung phi ngami ah ngaih-tüh cu kei naw kä ka dou hning ci.

¹⁷ Chang shekha gui ah mei cu phät man ne ang? Ngami naw leigai bui awt man u ne ang? Khanpughi naw m’lungshe ne changshe gui cu m’kyuk man ne ang?

¹⁸ Htang gong chawng ah mäih ah khokhi naw yon man ne ang? M’vut ah mäih ah puikho khi naw yon man ne ang?

¹⁹ Nangmi naw ak hmawhta gui cu ami pa ah katnak ah phäh ah Khanpughi naw m’kyuk ci nami cik ci. Ka nei, Katnak bik ci gui ami mät cu Khanpughi naw m’kyuk gui ci nei. Ani naw cun ah ami katnak ah phäh ah abi cu dang sak ci nei.

²⁰ Katnak bik ci gui cu ami mät m’kyuk nak gah u sä; M’gäi ciah Khanpughi ah m’lungshe nak cu ami mät naw gah u sä.

²¹ Chang cu a ghin nak ang pyi ah a kyak ung a hta nau gui ah yei nak vai ah ang’tai nak om ne ang?

²² Chang tumat naw ak hlüngtai ah om ne am khoicha hning ung phi Khanpughi cu m’theithang hning khai aw?

^23-24 Chang amshah cu ami sih güt gai ne om ci gui, yeikyai ne ak gei ah sik ci gui, ami pumsa cu akni ah gai gawng ci.

²⁵ Ahei gui cu yeikyai nak kä om phung ci; ngami cu akha deng ah ghing neta sik ci gui.

²⁶ Cung phi chang avan cu a cun ah mäih ah si ne a cun ah mäih ah ng’cim ci gui; ami van cu m’kyiit naw vun gui ci.

²⁷ Nangmi naw nami m’thüi cu kei naw ka hmat ci.

²⁸ Nangmi naw nami ng’shik ci, “Tuhbäi akshe bi ne dämduh ciah chang ah im cu a hawi ang?”

²⁹ Lam hteit ciah chang gui awn kä nami ng’htau man nema? Ngami ah law pyi ba ah ng’thumthein cu kä nami hmat nema?

³⁰ Angtäi se shetkat ciah chang gui cu Cun ah hnüp ung Khanpughi cu m’lungshe neta m’kyuk gui ci.

³¹ Changshekha gui cu ami bi lawh gui ah phäh thung ba gui khai u kä om ci.

³² Ani cu üp awi ciah phuh hmun ah ami ceh law pui ung,

³³ chang phyatkhak naw htümtha tuk ci gui. Khomdek naw phi ani ah a gook ah khan ah akni ah yuk geih ci.

³⁴ Nang naw, akholä awn na nak büi khai ah nak tha nak ci! Nang naw na na m’shan nak phung cu hleei hlak nei.