JOB 2 - Cho Bible Common Language 2016

Satan naw Joba M’nüm ba mä ci

¹ Bawipa ah ma ah khanchang gui ami dang law nak ba vai ah hnüüp gawk law ba khäta, Satan phi ami ng’lung ah law tuk ci.

² Bawipa naw ani cu ng’shi ne, “Nang a hawi ka ang na law” cik ci.

³ Bawipa naw, “Ka changsahäm Joba cu na hmat man ne ang? Ani ah mäih ah bekhüt ne akni ah om ciah chang khomdek khan ung tumat phi kä om ci nei. Ani naw kei cu na khawihnah ne akshe kä a bi vai ah geing nak ci nei.” Nang naw amwng ama kä om ciah phäh ah ani na tuk vai ah kei na na tük phlawh ci nei. Cun ung phi Joba cu abekhüt man ah bekhüt gäk gäk ci nei” cik ci.

⁴ Satan naw m’hlan ba ne, “Chang naw ghing ne a om vai ah phäh ah apäng avan chah khai nei.

⁵ Cun ung phi tuhbäi a pumsa na nat sak ah a kyak ung ani naw na hmai ma ah ning plah tam khai nei” cik ci.

⁶ Cun ah kyasei Bawipa naw Satan cu pyen nak ci, “Ä ya! ani cu nang ah huham kyong ung om ci nei, cun ung phi kä na ngawn en vai nei,” cik ci.

⁷ Cun kawn ah Satan cu Bawipa ah ma ungka hteit ba neta, Joba ah pumsa avan cu hlut sak ci.

⁸ Joba cu hlut khei a chet nak vai k’am heeuh akpi lanetam’vut ung htiet ne ngok ci.

⁹ Akchu naw pyen nak ci, “Nang cu ayan ä kaa ah mäih ah na bekhüt ci, a i ah kyasei Khanpughi kä tam plah ne kä na sih ang?”

¹⁰ Job naw mshang ci, “Nang akholä ah na ng’thu ci! Khanpughi naw akni ana pek gui ung yei ne mi dou ci, ani naw khuikha nak ana pek law ung mä a i hawkcha ah maa thei vai ang? A i chü ah akhuikha ung phi Joba naw Khanpughi ka hnungtuk ci.

Joba ah Teihpui gui Lawk ci gui

¹¹ Job ah teihpui gui thum cu Eliphay, Teman ah ka, Bidad, shua khaw ah ka, la Zophar, Naamah khaw ah ka ah kyak ci gui. Ngami naw Job a i hlawk ah akhüikha cu ng’ya u netahteit ne m’htei tu vai ah kbai ci gui.

¹² Ngami naw Job cu ashou nak ah ka naw hmu u ne phi ka hmat ba ci gui. Ani hmu law u neta ngami cu thuikyap ci gui. Ami sui teek ne kyap u ne m’vut phyang ne ami lu bu ci gui.

¹³ Ngami nawmu chih la hnüüp chih ung a i phi ka pyen ne ani cu hngoh pui ci gui. A i ah kyasei ci ung ani a i hlawk ah ayaica cu ngami naw hmuk ci gui.