JOB 16 - Cho Bible Common Language 2016

Joba

^1-2 Shin ah mäih cu ayan kä ng’ya tu man ci nei. M’lung üp nak vai ah nami na peit cu shedam nak ah kyak ci nei.

³ Nangmi cu a shin ah mäih laih laih ah nami ng’thu hlü lä ne ang? Akphlüt ah näng nak ng’thu awn nami ng’thu hlü ne ang?

⁴ Nang cu kei ah hnün ung om ne, kei cu nang ah hnün ung ka om vaisü ung, nangmi ah mäih ah kei phi ka ng’thu hning khai nei. Hmuhmat nak awn be ne ka lu phi ka k’thüng hning khai cun kawn ah tuinu ah mäih ah phu sei ng’thu ne ka ning hteh hning khai sü.

⁵ Kei naw m’shüm thein ne k’tha ning pe gui ne, ning shungvong gui ne ka ng’thu hning ci nei.

⁶ Cun ung phi tuhbäi kei naw a i ka pyen ung phi a kholä nei. A düm ah ka om ung phi kei ah nat nak cu kä gei lawk khai nei.

⁷ O Khanpughi nang naw kei cu na na ng’yai sak ci nei. Kei ah ka kyong hang gui phi na di sak gui pyi ci nei.

⁸ Bawipa, kei cu na na pha pyi ci nei. Bawipa nang cu ka ga ah na kyak ci nei. Kei ung ka guh la ka vun bäng om ba ci nei. A cun cu teng neta chang gui naw kei ung katnak om ciah pyen ci gui nei.

⁹ Khanpughi naw m’lungshe neta kei cu na shum sak ci nei. Ani naw kei cu thüisei ne ang küi ah na teng ci nei.

¹⁰ Chang gui naw kei cu na m’lep nak ci gui. Chang khli naw kei cu ng’lung na ne ka hmai na k’beeih ci gui nei.

¹¹ Khanpughi naw kei cu changshe gui ah kut ung na ap pyi ci nei.

¹² Kei cu ding gei sei ka om ci nei. Cun ung phi Khanpughi naw ka gawn ung nak hteeu ne na hnim ci nei. Khanpughi naw kei cu tai ne kah ah mäih ah na mang ne,

¹³ akit päng ung m’la awn na kap ci nei. Cun ah m’la gui naw kei na leim sak ci ne. Cun ung phi ani naw kei cu kä na m’gein phak ci nei.

¹⁴ Ani naw kei cu leng ba ba ne nak phleim ci nei; Thüi ne m’lungshe ciah gakap ah mäih ah ani naw kei cu na tuk ci nei.

¹⁵ Kei cu sui akheei sui ne ka thüi kyap ci nei, Ka shung ciah kya ne m’vut ung ka ngok ci nei.

¹⁶ Kei cu ka hmai sen ne ka mik tüt ne ng’phling law güt sei ka kyap ci nei.

¹⁷ Cun ung phi kei kä ka kyawi m’sa ci nei. Khanpughi ah ang awi hta ah ka taigü ci nei.

¹⁸ O Khomdek, kei ah cheishoh nak gui cu kä thup en ä! A taga vai ah kei naw ka ng’khü phi kä ng’düm sak en ä.

¹⁹ Kei täng ah ak htek ah ng’düi ne saksi khai cu Khankho ah om ci nei.

²⁰ Ka teihpüi gui naw na päipih ci gui, Kei cu Khanpughi ah ma ah ka ng’plitui chah ne ka kyap ci nei.

²¹ A teihpüi ah phä ah ng’thu pyen ciah chang ah mäih ah kei ah phäh ah Khanpughi ah ma ah ng’thu pyen khai cu ka ng’ya hlük ci nei.

²² Kei ah ka khokum gui cu tuhbäi ng’pyi lawk ci nei. Kei cu kä ng’hlah law ba nak ah lam ung ka hteit ci nei.