JOB 12 - Cho Bible Common Language 2016

Joba

^1-2 Ä! Nang cu chang gui ah m’lau k’o ah na kyak ci nei. Nang na sih ah akyak ung, cüivai nak cu nang awn atäng ah si tuk khai nei.

³ Cun ung phi kei cu nang hlawk ah ka kyak ci nei, nang ah kä ka ng’neim pi ci nei; Nang ah pyen avan cu chang nü naw hmat ci nei.

⁴ Tuhbäi ka teihpüi gui naw phi na gaih tuk ci gui nei; ngami naw na gaih tuk ci gui, cun ung phi kei ka düng ci, katnak kä om ci. Cun ung phi Khanpughi naw ka taigü ana m’shan nak vai ah akhin om pyi ci nei.

⁵ Nangmi ung khüikha nak kä om ci, gaih vai ah nami na kyak nak ci; Nangmi naw ng’tääng hlük cicu nami buh tawn ci.

⁶ Cun ung phi m’guk ei gui la khanpughi kaa ah om ci gui cu ding gei sei om ci gui, ami khanpughi cu ami mät ah k’thagui ah kyak ci.

⁷ Kha gui la khisa gui naw phi akda ning m’theithang hning ci gui;

⁸ Khomdek khan la tuinu ung a tüi pyan gui ah ami cüivai nak cu ng’shi gui ä.

⁹ Ami van naw Khanpughi naw a kut awn atüi pyan gui cu hmat ci gui nei.

¹⁰ Khanpughi naw atüi pyan gui ah ghin nak cu lam shüm gui ci; chang ah ghin nak cun phi ani ah huham kiong ah om ci.

¹¹ Cun ung phi cun cu nam lei naw ei k’hlim am nüm Ah mäih, na k’hga naw yei nak ng’thu ang yak ah mäih ah kyak ci.

^12-13 Chang vai gui ung cüivai nak om ci, cun ung phi Khanpughi ung cüivai nak la huham om ci. Chang vai gui ung akiong gai nak om ci, cun ung phi Khanpughi ung hnünthawh nak vai ah akiong gai nak la huham om ci.

¹⁴ Khanpughi naw a phyeit cu a u naw co ba hning khai aw, Khanpughi naw thawng ung a chum cu a u naw m’hlaut hning khai aw?

¹⁵ Khanpughi naw kho k’aa ak pan ung kho käu ci, Ani naw tui k’hlaw a chah ba ung tui lawk ci.

¹⁶ Khanpughi cu khüighat ne angtäi sei näng m’khüt ci; hleeihlak la hleeihlak ci gui cu ani ah huham kiong ah om ci.

¹⁷ Ani naw uktu gui ah cüivai nak cu ghawt yawp ne, ang vaihta gu cu akgu ang ah mäih ah kyak sak gui ci.

¹⁸ Ani naw ghangpughang gui cu mangkiang ungka k’täm gui ne thawng kyum ah kyak sak gui ci.

¹⁹ Ani naw taigü gui la huham chang gui cu ng’neim sak gui ci.

²⁰ Ngaihgep ah chang gui cu dip sak gui ne, chang vai gui ah cüivai nak cu ahei ah ghawh pe gui ci.

²¹ Ani naw huhamah ci gui cu thüisei sak gui ne, uktu gui ah thagui cu ng’pii sak ci.

²² Ani naw sihnak ah a hmüp nak ung akdei cu tüi ci.

²³ Ani naw changpakhui gui cu khüighat sak ne dämduh sak ci, cun ung phi cun kawn ah ani naw hniim hgui ne m’di gui ci.

²⁴ Ani naw ami ng’vaihta gui cu gu ang sak gui ne, Püipiang sak gui ne ng’go ng’gan sak gui ne maih sak gui ci;

²⁵ Ngami cu hmüp khui ah ng’vaak u ne, awktat ciah mäih ah kyu shüi shüi ci gui.