JOB 11 - Cho Bible Common Language 2016

Zophar

^1-2 Shin ah akholä gui cu a u chang naw phi kä m’shang khai ma? Ng’thu akda ah pyen nak naw chang cu ng’düng sak ne ma?

³ Joba, keimi naw kä ka mi ning m’shang hlawt khai ah na ngai ne ma? Nang ah yüihsha nak ah ng’thu naw keimi cu ang thu kaa ah na om sak gui khai ma?

⁴ Nang naw na ng’thu awn na caang ciah na pyen ci; Khanpughi täng ah na ng’ciim ciah na pyen ci.

⁵ Khanpughi naw aning m’shan vai cu a i hlawk ah ang ka ng’yak hlü!

⁶ Ani naw cüivai nak ah mawng akda cu ning m’thein khai; Chang ah ngaihtüh nak ah kawn ah thuuk aih ciah amawng gui om ci nei. Na mät ah khinkha nak ah ta ken tuba khai ah Khanpughi naw ning m’kyuk ci nei.

⁷ Khanpughi ah a dämduh nak la a huham ah akhüt nak la ang gii nak cu nang naw na hmu hning ne ang?

⁸ Khomik cu Khanpughi ah phäh ah akhüt nak kä om ci, cun ung phi nang ah kä na gawk nak ah ahei khaw ah ng’shawng ei ci nei. Khanpughi naw khomdek khan ah sih nak cu hmat ci, cun ung phi nang naw kä nah mat ci.

⁹ Khanpughi an dämduh nak cu khomdek ah ng’ghaw tuba ci, tuinu ah ta ng’shawng tuba ci.

¹⁰ Avaisü ah Khanpughi naw ning pha ne thawng ung aning chum ah akyak ung a u naw maa na hning khai ang?

¹¹ A u chang gui a kholä ah kyak ci cicu hmat ci, ngami naw akshe ami bi cun phi hmuk ci.

¹² Chang gu k’ang gui cu cüivai ciah mäih ah mi ng’tün ung phi ng’se ng’lüng ah ng’tüi ah mäih ah kyak ci.

¹³ Joba, na m’lung ngaih düng sak ne Khanpughi ah hteit ä.

¹⁴ Akshekha gui la hmakat nak gui cu na im ungka naw ahei ah k’täm ä.

¹⁵ Cun kawn ah khüighat thamah ne khomdek khan cu ma na ba.

¹⁶ Cun kawn ah na yaica nak gui avan cu na m’lunghnga kiong ungka kieim yawp khai nei. Cun cu tui k’hlaw kieim khäta a u naw kä a shüm ba ah mäih ah kyak khai nei.

¹⁷ Nang ah ghin nak cu hnüüp lunglai ung khokdei ah ta dei pi khai nei. Na ghin nak ung a hmüp nak gui cu kho athaih law ah mäih ah ng’shü lawk khai nei.

¹⁸ Nang cu na m’lung üp sei ngaih u akbe awn na om khai nei; Khanpughi naw ning shungvong ne hüiyaang nak ning pek khai.

¹⁹ Nang naw nag a gui cu kä na kiih ba khai; Chang akda naw na m’htei tu vai ah ning k’thäh lawk khai.

²⁰ Cun ung phi chang omk’she gui naw kä yei ne ning teng khai gui, phyawn nak vai ah lam kä om ciah hmuk khai gui. Ngami ah ngaih u nak tumat ah kyak ciah sih nak cu gawk lawk khai.