JOB 10 - Cho Bible Common Language 2016

¹ Ka ghin ka yai ci. Kei ah ng’thu m’da kha gui cu na ngaih pe ä.

² Kä na m’kyuk en ä, Khanpughi. Na m’thein ä! A i uktu naw a na ng’tuk püi ang?

³ Ana ah na shekhak ciah na mät lüng naw na na k’shekdam nak la changshe gui ah bilawh nak gui ung na hmai kyang cu hman ne maa?

⁴ Kami bilawh gui cu kami bi ah mäih ah na hmuh naw?

⁵ Na ghin khaw cu kei mi ah mäih ah toi tu naw?

⁶ Cun kawn ah a i ah kiasei ka hma nak gui cu phawk ne ka katnak gui cu na m’dang ang?

⁷ Kei cu changshe ah kä ka kyak ah mawng la nang ungka a u naw kä na phyawn hlawt ci cicu na hmat ci.

⁸ Na kut naw na pyang ne na shep ci, cun kawn ah tuhbäi acun ah kut awn na na m’di ci.

⁹ M’dek awn na na pyan cu shüm ba ä; m’dek ah na na cigep law ba khai ang?

¹⁰ Ana hta nak vai ah kapa cu tha mah sak ne; kanu puk khui ah na na ng’ghaw tai sak ci.

¹¹ Nang naw ka pum cu guh gui la k’thang gui awn na pyan ne ka guh gui cu sa gui la vun awn na khum ci.

¹² Nang naw ghin nak la ng’täi ciah m’hni nak na na pek ci, cun kawn ah nang ah m’htei nak naw na m’ghin ci.

¹³ Cun ung phi nang naw angtäi ah ang thup hta ah na na plawh kheih vai ah nang bü laih laih cu tuhbäi ka hmat ci.

¹⁴ Ka hma hngaw law ung na hmuh vai ah na na teng ci, cun ung vah ka hma ngaih nak pek cu na maa na hlawt khai.

¹⁵ Ka hma vai am, nang awn kei ung yaica nak om ci, cun ung phi akcang ka bi yah ung, a phu kheng a i kä gah ci.

¹⁶ Avaisü ka tä law ung phi, Kawng vaisü ah na na yun ci; cäi aih gui vai bi ne na na kyihkyawk sak ci.

¹⁷ Kei na ng’hnungtuk püi ciah saksi gui cu nang ung angtäi ah om ci; nang ah kei ah khan ah m’lungshe nak cu däm law pi pi ci; akthai ah ng’tuk bi vai ah angtäi ah tängpang nak nang ung om ci.

¹⁸ A i kyasei ang, Khanpughi aw, na na tüi law sak? A u naw kä na hmuh pha ung ka sih ung nik khai sü.

¹⁹ Pawi khui ung ka k’täih ne ng’phuh hmun ah hteh ne kä ng’tüi om tu bäit cu ni pi khai.

²⁰ Ka ghin khaw cu ng’pyi law hlü ne ma? Ka mät bäng na nawng ä! Pawih ba hta ciah akhin awn ka zeikiyai tu vai ah.

^21-22 Kei cu shäng shäng khätah hmup ne am tham nak ah khaw, mü ah mäih ah a hmüp nak khaw, sih nak ah khaw la a i kä ng’khailang nak ah khaw, ak khang tu phi ak hmüp ah a kyak nak khaw ah ceit law ne, a ngoi ah phi kä ka law ba khai.