JOB 1 - Cho Bible Common Language 2016

Satan naw Joba m’nüm ci.

¹ Uz khaw ung Joba ming nak ciah chang tumat om ci. Ani cu Khanpughi khawihnah ne akni ung bekhüt ci. Ani cu chang niah kyak ci. Akshe kä a bi vai ah geing nak ci.

² Ani ung a hta pami chih la a hta hnumi thum om ci.

³ Ani ung htome phya chih kip, kalauk phya thum kip, seipat phya gha la ng’sela phya hma om ci. Anu ung a changshäm phi akda om ci, Ani cu ak kyang täng ung ang bühmang pi ah kyak ci.

⁴ Joba ah hta gui cu angtän ah ei awk pawi bi u ne, ami van küm ci, ci gui. Acun päng ung ami be gui thum phi khü ci, ci gui.

⁵ Pawi päng ah a ngawiu ung khongawi, Joba cu ang dawt ah thou law neta, a hta gui tumat ciah phäh ah ami theingthap nak vai ah khawihnah dou thak ci ci. Ani naw ak phlüt ah cun ah abi cu a hta gui tumat mat naw kä ngaih-tüh ah Khanpughi a i ah kä sui ne akat nak vai a kyih ah phäh ah kyak ci.

⁶ Khanchang gui Bawipa ah ma ah ami law vai ah akhin a gawk law yah ung, Satan phi ami ng’lung ah law tuk ci.

⁷ Bawipa naw ani cu ng’shik ci, “Nang a i ang na bi?” Satan naw m’shang ba ne, “Kei cu khomdek khan ah ng’väi ne shi ah cä ah ka hteit shüi shüi ci nei” cik ci.

⁸ Bawipa naw, “Ka changshäm Joba cu na hmat man ne ang? Ani ah mäih ah bekhüt ne akni ah om ciah chang khomdek khan ung, tumat phi kä om ci nei. Ani naw kei na khawihnah ne akshe kä a bi vai ah geing nak ci nei” cik ci.

⁹ Satan naw pyen ba ne, “Joba naw a i kä a gah ah a kyak ung nang cu ning khawihnah khai ang?

¹⁰ Nang naw ami mät a k’phlüt ah na shungvong ci nei, Abi phung cu nang naw phyuhtheh pe ne khopäng avan ung be khai ah sei m’na gui na pek ci nei.

¹¹ Cun ung phi tubäi ani ung om ci avan na lak pek yawp vaisü ung ani naw na hmai ma ung ning plahtam khai nei!” cik ci.

¹² Bawipa naw Satan a pyen nak ba cu; “Ä ya, ani ung om ci nü cu, nang ah huham ung ka ning ap ci, Cun ung phi Joba amät cu kä na nat sak en vai,” ci nak ci, cun ah kyasei Satan cu hteit ci.

Joba ah Ahta gui la Akhawh gui Dishum ci.

¹³ Hnüüp ät ung Joba ah a hta gui cu ami phäi ng’vaipi ah im ung ami ei awk sangung,

¹⁴ Chang lamhteit tumat cu Joba ah dawng ne law neta, “Keimi cu sei gui awn lai kami thawn ci, ng’sela gui cu a pei ah khulim hmu ah om ci gui.

¹⁵ Sabean chang gui naw ang ghit ah tu law u ne, avan m’guk ci gui nei. Ngami naw na changshäm gui avan ngawn ci gui nei. Kei bäng ka pawih ci, Nang am ng’thu ning m’thein khai ah kei bäng ka phyawng ci nei.”

¹⁶ Ani naw ang thu pyen kä a phleh pha ung, ahei changshäm naw law ne, “Ng’kyeek naw deng sei htome gui la htoshäm gui avan si yawp ci gui nei, Kei bäng phyang ne ng’thu ka ning m’thein lawk ci nei” cik ci.

¹⁷ Ani naw ang thu pyen k ä a phleh pha ung ahei changshäm naw law ne, “Chaldean bum thum gui naw kei mi ah law ne, na tu law gui ne, kalauk gui avan hteh püi ci gui, Changshäm gui avan ngawn ci gui, kei bäng ka pawih ci, Nang am ng’thu ning m’thein lawk khai ah kei bäng ka pawih ci nei.

¹⁸ Ani naw ang thu pyen kä ang pyi pha ung, ahei changshäm naw law ne a pyen cu, “Nang ah na hta gui cu na hta ng’vaipi ah im ah pawi ne ami ei awk sangung,

¹⁹ khaw ng’gau khaw ah ka puikhaw khi lawk ci. Acun naw im cu khi hlit ne chang gui avan ngawn gui ci. Kei bäng phyawng ne ng’thu ka ning m’thein lawk ci nei” cik ci.

²⁰ Cun ung Joba cu ng’düi law ne a sui k’teek ci. Ani cu alu teiu ne m’dek ung a hmai gawk khai ah kyu ne ng’baup ci.

²¹ Ani naw, “Kei cu a i kä law püi ah ka lawk ci, a i kä hteh püi ne ka sik khai. Bawipa Naw na pek ci, tuhbäi ani naw la ba ci nei. Ani ah ming cu m’tamkhah nak om sä!” cik ci.

²² Cun ah mäih gui nü ah kyasei phi, Joba naw Khanpughi kat na ne ng’thu kä pyen ci.