JEREMIAH 9 - Cho Bible Common Language 2016

¹ Kalu cu tui shawk tui ah mäih, kamik gui cu tui hta lawng ah mäih ah a kyak vai ka ng’ya hlük ci, Cun ung kei cu ami ngawn gui ah ka chang gui ah phäh ah amü a hnüüp ka kyap hning khai nei.

² Bungpuk ah ka düm nak vai ah hmun ka ng’ya hlük ci, cu ah kei cu ka chang gui ungka ka hteit hning khai. Ngami ami van cu kä bekhüt ci gui, ng’gang ne shuk ci gui.

³ Ngami cu akphlüt ah hleei pyen ge vai ah om ci gui; Düng nak ah hnün ung kä ng’düng nak gui naw kho uk ci. Bawipa naw pyen ci, “Ka chang gui naw akshe cu tumat ng’pyi sei tumat bik ci gui, kei ami na Khanpughi ah käng kiaa man ci gui.”

⁴ Chang päng naw a teihpüi cu ngaih nak khai, a u naw phi a phäi nau kä ngaih gep khai; phäi nau päng cu Jakob ah mäih ah hleei hlak ne, chang päng naw a tein püi ah a hmai m’shet ci.

^5-6 Ngami ami van naw ami teihpüi gui lam h ma sak u ne, a u naw a hman kä pyen ci; Ngami naw ami m’lei cu hleei nak m’thei u ne, ami katnak cu kä nawng hlawt ci gui. Ngami naw ngawn pha nak tumat kawn ah tumat bi u ne, hleei hlak nak tumat cu ahei tumat naw läk law ba ci. Bawipa naw pyen ci, ani ah a chang gui naw ani cu hnungtuk ci gui.

⁷ A shin ah kiasei m’gäi ciah Bawipa naw a pyen cu, “Kei naw ka chang gui cu m’si m’cim ah mäih ah ka m’cim gui khai, ka m’nüm gui khai. Kei ah ka chang gui naw akshe bik ci gui — Kei naw a i ka bi pe gui khai ang?

⁸ Ngami ah m’lei cu sih nak ah m’la ah mäih ah kyak ci; akphlüt ah a hleei pyen ci. Chang päng naw a impei longgi awn ng’khawt nak ng’thu pyen ci. Cun ung phi cun cu ani ah phäh ah m’hling bang ah kyak ci.

⁹ Shin gui ah phäh ah kei naw kä m’kyuk gui ne ka om khai ma? Shin ah mäih pakhui ah khan ah kei naw phu kä tuk ah ka om khai ma? Kei, Bawipa naw ka pyen ci.

¹⁰ Kei naw ka pyen ci, “Khomhtung gui ah phäh ah kei ka thui kyap khai, khulim gui ah phäh ah ka kyap m’lau khai, a i ah kyasei ci ung ngami cu chawng u sei, cun gui cu kan ne a u kä hteit ba khai. Khiksa gui ah ng’ging gui cu a u naw kä ng’yak ba ci; kha gui la khisa gui phi dawng yawp ci gui.”

¹¹ Bawipa naw pyen ci, “kei naw Jerusalem cu, im ng’phrek ciah ng’awt ng’bum, sa ui gui ah om nak ah hmun ah ka pyang khai; Judah mang gaw gui cu chang ah kä om nak bung ah kyak khai gui.”

¹² Kei naw ka ng’shik ci, “BAWIPA, ai ah kyasei kho cu di ne khong gau ah kya ne chawng sei, a u phi kä hteit hton ba ne a kyak ang? A u ang shin hmat khai ah cüi vai nak a om? Ani naw chang hei gui am thein tu ba thei vai ah a u am nang naw na m’thein khai ang?”

¹³ Bawipa naw m’shang ci, “Shin ah a kyak law cu kei ah ka chang gui naw ka peit gui ah ka m’thei thang gui ami nawng düüt ah phäh ah kyak ci nei. Ngami naw kei ah thu kä ngai u ne kei ah pyen kä bik cu gui.

¹⁴ Cunnak vaisü ung ami m’lung ling sei, ami pupa gui naw ami bi vai ah ami m’thei gui ah mäih ah ngami naw Baala ah gup gui cu khawihnah ci gui.

¹⁵ Cun ah kya sei, kei, m’gäi ciah Bawipa, Israel Khanpughi naw ka bi law vai cu ngai vä: kei naw ka chang gui am amiei vai geit kaw akha gui la ami awk vai m’guui vai gui cu ka pe gui khai nei.

¹⁶ Kei naw ngami cu ami pupa gui la ami mät naw kä ami ng’yak man ah changpakhui gui ah ng’lung ah ka püi sak gui khai. Cun kawn ah kei naw akbe ah kä ka m’di pha gui ah chuih, ngami hnungtuk püi gui ne gakap gui ka tüi gui khai.”

Jerusalem Chang gui cu M’htei gui vai ah Kyap M’lau ci gui

¹⁷ M’gäi ciah Bawipa naw pyen ci, “A i ah kya lawk khai cicu ngaih-tüh vä! Thüi kyap khai, gook kyah ng’äi kyap ciah hnumi gui khü gui vä.”

¹⁸ Chang gui naw pyen ci gui, kami mik ng’phli tui awn be ne, Kami mik vun kyah ah ng’phli tui awn ang shüih güt ang ghit ah gook kyah ng’äi vai ah m’thein gui vä.”

¹⁹ Zion ung ami kyah ah k’aw cu ngai vä: “Kei mi kami di pyi ci nei! Kei mi akbe ah kami thüisei ci nei! Mikmi naw mi kho mi hteh tak khai nei; mikmi ah im gui cu ng’phye pyi ci nei.”

²⁰ Kei naw ka pyen ci, “Nangmi hnumi gui, Bawipa cu ngai vä, ani ah ng’thu cu ngaih na kheng vä. Nami hta hnumi gui a i cha ah ami thüi kyah vai, 1 nami teipüi gui naw a i cha ah gook kyah ng’äi ami m’cu vai cu m’thei gui vä.

²¹ Sih nak cu m’kawt gui ung law ne, mi mang im gui ung lut lawk ci nei; A cun naw a hmaw hta gui cu lam ung ngawn gui ne, chang nong gui cu sumlei hmun ung ngawn gui ci nei.

²² Aksi pumsa gui cu ng’zaih shüi shüi ci gui nei, cun gui cu lai ung eek ng’pum ah mäih ah ng’püm ne, aat ne ami zaih, a u naw kä a kaw ah htang gong ah mäih ah kyak ci gui nei, Shin cu Bawipa naw ka pyen vai ah ana m’thein ah kyak ci.”

²³ Bawipa naw pyen ci, “Cüivai ci gui naw ami cüivai nak awn kä ami khäh ghah vai, Gai gawng ci gui naw ami thagui awn kä ami khäh ghah vai, büh mang ci gui naw ami khawh awn kä ami khäh gha vai.

²⁴ Chang tumat cu a khäh ghah hlü ah a kyak ung, kei ana hmat nak la ana hmuhmat nak awn a khäh ghah vai, a i ah kyasei ci ung, kei ah ka m’hni nak cu ng’täi ci, kei naw taga ci la düng cicu ka bik ci. Kei, Bawipa naw ka pyen ci.”

^25-26 Bawipa naw pyen ci, “Kei naw shin ah chang gui ka m’kyuk nak gui vai ah akhin cu gawk lawk ci nei: Egypt, Judah, Edom, Ammon, Moab, la khong gau kho chang gui, ngami cu ami lu ak tawi ah k’teiu ci gui ah kyak ci. Shin gui ami van cu ami vun-aat ci gui ah kyak ci, cun ung phi acun dang sak ciah thukhän cu ngami naw kä k’pang ci gui. Shin ah chang gui la Israel chang gui a u naw phi kei ah thukhän kä k’pang ci gui.