JEREMIAH 8 - Cho Bible Common Language 2016

¹ Cun ah akhin ung Judah ghangpughang gui law Bawi gui ah guk gui, taigü gui, prophet gui la Jerusalem ung om ciah ahei chang gui ah guk gui cu phuh hmun ung ka la khai gui.

² Bum ne phuh nak vaisü ung ami guh gui cu eek ah mäih m’dek ung ng’zän khai gui. Cun gui cu ng’zaih düt u ne, hni ni, cha ni, aisi ni gui ah ma ah ng’pho khai gui, cun gui cu shin ah chang gui naw m’hni gui ne, abii bi u ne, ng’shi k’thah gui ne, ami khawihnah gui ah kyak ci.

³ Shin ah pakhuishe chang gui ungka k’pawih ba cu gui, kei naw ka k’püi nak hmun gui ung on ci gui cu ami ghin vai ah k’dam ah ami sih vai cu m’hni khai gui. Kei, m’gäi ciah Bawipa naw ka pyen nei.”

Katnak la M’kyuk nak

⁴ Bawipa naw a chang gui ka pyen nak gui vai ah ana m’thein cu, “Chang tumat cu ang täät ah a kyak ung kä thu ba ne om khai ma? Chang tumat cu lam a hma ah a kyak ung kä ng’hlat law ba ne om khai ma?

⁵ Ka chang gui, kei na ng’hlah ta u neta, a i ah kyasei kä ng’hlah law ba phung ah nami om ang? Nangmi cu nami gup gui ung ng’bat u ne, kei ah nami ng’hlah law ba vai ah nami mak ci.

⁶ Kei naw gaung na ne ka ning ngai gui ci, cnun ung phi nangmi naw düng ciah thu kä nami pyen ci. Nangmi ungka tumat naw phi nami cheishoh nak ah phäh ah kä nami a yä ci; nangmi ungka tumat naw phi “A i ah a hma ka bi ne?” cine kä nami ng’shik ci. A chang nü cu ng’tuk nak ung hteit khai ah ng’se ah ng’güüt ah mäih ah amät ah lam phäh phäh nami k’pang ci.

⁷ Zong ciah khaw gui naw phi ami law ba nak vai ah akhin hmat ci gui. Müm gui, va m’chawng gui la ngamzawk gui naw phi ami lum nak vai ah akhin cu hmat ci gui. Cun ung phi ka chang gui, nangmi naw kei naw ka ning uknak gui ah thukhän cu kä nami hmat ci.

⁸ Nangmi naw a i hawkcha ah kei ah ka thukhän hmat ne, nami cüivai ciah nami pyen khai ang? Teng vä, thukhän gui cu kä ng’düng ciah cacim saya gui naw m’thawng pyi ci gui nei.

⁹ Nami cüi vai chang gui cu lü ng’aa ci gui nei. Ngami cu ng’gogan u ne, cuun ung awk ci gui nei, Ngami naw kei ah ng’thu cu hnungtuk ci gui, tuhbäi a i cüivai nak ang ngami naw ami gah?

¹⁰ Cun ah kyasei ami lolai gui cu kaanak ciah ak thai gui am pe gui ne, ami chu gui cu ahei pami gui am ka pe gui khai. Akdämduh ak zawken chang nü naw kä ng’düng nak awn ngui gah vai ah k’tha nak ci gui. Prophet gui la taigü gui naw phi chang gui m’hleei gui ci gui.

¹¹ Ngami naw ka chang gui ah leim cu a i baw düt ah ngai ci gui. Ngami naw, avan kä khan pha mui sei, “Avan khan ci nei” cik ci gui.

¹² Ka chang gui aw, nangmi naw shin ah shemshai ci gui nami bi ah phäh ah nami ng’aa ne ang? Ka nei! Nangmi cu akcang ah kä nami ng’aa ci; nangmi naw ng’aa vai phi kä nami hmat ci! Cun ah kyasei nangmi cu a hei gui ami ng’kiak ah mäih ah nami ng’kia tuk khai nei; kei naw ka ning m’kyuk gui ah a kyak ung cun cu nangmi ah ng’pyi nak kyak khai. Kei, Bawipa naw ka pyen nei.

¹³ “Lo bik ci naw geit bum ne a khäm ah mäih ah kei naw ka chang gui cu ka khäm gui hlük ci. Cun ung phi ngami cu a hnah ng’yai sei phi kä m’theih ciah sapyit ah mäih, kä m’theih ciah thei ghing ah mäih ah kyak ci gui; cun ah kyasei kei naw khi akpung ah chang gui am khi ka khäm sak gui ah kyak ci.

¹⁴ “A i ah kyasei mi ngoh tu lä ang” cine Khanpughi ah chang gui naw ng’shik ci gui, “Law vä, mikmi cu mang gaw khäng gui ah dawng ne, acu ah mi sik khai nei. Bawipa mi Khanpughi naw mi sih vai ah na m’kyuk gui ci nei; mikmi naw ani hnungtuk ne mi kat ah phäh ah mi awk vai ng’tuui tui na pe gui ci nei.

¹⁵ Mikmi naw dimdeeih nak vai la gai nak vai cu mi ngaih u ci, cun ung phi akholä ah kyak ci; cun ah vaisü ung kyihkyawk vai gawk lawk ci.

¹⁶ Mi ga gui cu Dan mang gaw ung gawk law pyi cu gui; mikmi ngaw ami se gui ah ami gin cu mi ng’yak ci. Ami ng’se gui a viik law ung khi avan cu ng’thüng ci. Mi ga gui aw law u ne, mi khaw la cun ung om ciah ang nü, mi mang gaw gui la chang gui avan cu m’du cu gui.”

¹⁷ Bawipa naw pyen ci, “Ngäng vä, nami ng’lung ah k’phyu gui ka tüi lawk khai, a u naw kä a m’hlawt ah k’phyu m’äm mah gui ka tüi lawk khai, cun gui naw ning k’dawk gui kahi.”

Achang gui ah Phäh ah Jeremiah ah ayä nak

¹⁸ Ka azä nak cu a u naw kä gai sak hlawt khai; kei ka m’lung ung ka gaw ci.

¹⁹ Ngai vä! Kho avan ung ka chang gui kyap u sei ka ng’yak ci nei. “Zion ung Bawipa kä om ba ne ma? Zion ghangpughang cun ung kä om ba ne ma?” 2 Bawipa, ami ghangpughang naw m’shang gui ci, “Nami agup gui khawihnah u ne, akholä ah kyak ciah akho hei khanpughi gui ah ma ah kawp u ne, a i ah kyasei kei cu nami na m’lungshe sak ang?

²⁰ Chang gui kyap m’lau ci gui, “Kho cha cu ng’pyi pyi ci, geit khäm nak cu ng’kawn pyi ci, Cun ung phi mikmi hun nak kä mi gah phak ci.”

²¹ Kei ah ka chang gui cu ami dep gui ah kya sei, kei ah ka m’lung cu ng’deng pyi ci gui nei: Kei cu thüi kyap ne, ang htei ah ka thüi aih ci nei.

²² Kilead ah shei kä om ne ma? Acu ah shei bawi kä om ne ma? A i ah kyasei ka chang gui gai nak kä ami gah ang?