JEREMIAH 6 - Cho Bible Common Language 2016

Jerusalem cu Ga gui naw khai ci gui

¹ Benjamin chang gui, nami phiawn vai ah dawng vä! Jerusalem ung ka lauk vä! Tekoa ung phyungheng tum vä, Beth Hacaherem ung m’hnüt nak ah mei im co vä. Leigai la dishum nak cu a siiptäng ah ka lawk khai nei.

² Zion mang gaw cu kyom ci nei, cun ung phi cun cu m’di khai gui nei;

³ Ghangpughang gui cu ami gakap gui awn atäng ah acun ung phung tuk khai gui. Ngami naw ami hteh nak päng ah ami phung phäh phäh tuk khai gui. Ngami naw ami phung gui cu mang gaw ah ang vein gung co khai gui. Ngami naw ami hteh nak päng ah ami phung phäh phäh tuk khai gui.

⁴ Ngami naw pyen khai gui, “Jerusalem tuk vai ah pawng m’hteim vä! Pawng ge vä! Mikmi naw hnüüp ng’lung ung mi tuk khai nei!” Cun ung phi cun kawn ah ngami naw pyen khai gui, “Shin cu cü aih khai nei, kho hnüüp ng’pyi law vai ci nei, kho hmüp law pi pi ci nei.

⁵ Mikmi naw mü ung mi tuk khai nei, mang gaw ah pang khäng gui cu mi m’di khai nei.

Küknet ciah Israel gui

⁶ M’gäi ciah Bawipa naw ghangpughang gui am Jerusalem ge nak vai ah singdung gui chuk tawn sak gui ne m’dek m’htung gui phluu sak gui ci. Ani aw pyen ci, “Hnungtuk püi nak da aih sei Kei naw shin ah mang gaw cu ka m’di khai.”

⁷ Tuiton naw tuini a khäm ah mäih ah Jerusalem naw akshe gui khäm khai nei. Mang gaw kyong ah ngon sih nak la didap nak cu ka ng’yak ne; lembai nak la gopyam nak bäng ka hmuk ci.

⁸ Jerusalem chang gui aw, shih ah genbai nak gui cu nangmi ah phäh ah m’kyihm’hting nak ah kya sä, kä cun ung Kei naw ka ning nawng gui ling khai; Nami mang gaw cu a u naw kä ghin om nak hlawt ah khong’gau ah ka lat khai.

Hnungtuk ciah Israel gui

⁹ M’gäi ciah Bawipa naw na pyen nak ci, “Sapyit ghin ung ah ak theih k’bih züm züm ah mäih ah Israel gui cu heng züm züm vai nei. Cun ah kyasei akhin a om yah ung chang nü nami gun vai nei.”

¹⁰ Kei naw ka m’shang ci, “Kei naw ngami ng’thu püi gui ne, ka m’cäi gui ah a kyak ung a u naw kei na ngai khai ang? Ngami cu m’lung liing u ne nang ah thu ngaih vai ha mak cu gui nei; kei naw ka pyen vai ah na na m’thein cu ngami naw gaih tuk ci gui nei.

¹¹ Nang ah m’lungshe nak naw hnungtuk püi gui ne kei phi na ui ci nei. Bawipa, kei naw cun cu kä ka kawt ba hning ci nei.” Cun kawn ah Bawipa naw kei na pyen nak ci, “Kei ah ka m’lungshe nak cä lam gui ung om ciah a hmaw gui la ng’bum ciah chang nong gui ah khan ah yuk huk ä. Ami cei gui la ami chu gui phi la yawp khai gui, a ghipa aih gui phi kä k’pawih nak khai gui.

¹² Ami im gui, ami lolai gui la ami chu phi chang hei gui om pe gui khai gui. Shin ah kho ung om ciah chang gui cu kei naw ka m’kyuk law gui khai.

¹³ Chang nü nü dämduh ci, zawken ci naw, kä ng’düng nak awn k’tha na ne ngui shui ci gui; prophet gui la taigü gui naw phi chang m’hleei ci gui.

¹⁴ Ngami naw ami khei khan ng’khawk düt khai ah bo; p ci gui. Ngami naw “Avan bä ci nei” ci u sei avan kä bä ci!

¹⁵ Shin ah shemshai ci ami bi ah phäh ah ngami ng’aa ca u ne ang? Ka nei, ngami kä ng’aa mui ci gui; a i hawkcha ah ami hmawi a shet vai phi jä hmat ci gui. Cun ah kyasei ngami cu chang hei gui ami kiuk täng ah mäih ah kiuk täng khai gui; Kei naw ka m’kyuk law gui ung cun cu ngami ah ng’pyi nak ah kyak khai. Kei, Bawipa naw ka pyen nei.

Khanpughi ah lam cu Israel gui naw Hnungtuk ci gui

¹⁶ Bawipa naw a chang gui pyen ah gui ci, “Lam kyum gui ung ng’düi neta teng vä. Cau lam phyim gui la lam akni pi a hawi a om cu ng’shi gui vä. A cun ung hteit vä, dim deeih nak awn nami om khai.” Cun ung phi ngami naw, “Kaa, kä ka mi hteit khai!” cine pyen ba ci gui.

¹⁷ Phyung heng tum ngäng ne ngai khai ah chang tumat cu Bawipa naw m’düih ci. Cun ung phi ngami naw, “kä kami ngai khai nei” cik ci gui.

¹⁸ Cun ah kyasei Bawipa naw pyen ci, “Ngai vä, nangmi changpakhui gui, ka chang gui ah khan ah a i ah kya lawk khai cicu hmu hmat vä.

¹⁹ Khomdek aw ngai ä! Ngami ah bilawh avan m’kyuk nak vai ah shin ah chang gui ah khan ah kei naw dishum nak ka law püi ci nei, a i ah kyasei ci ung ngami naw kei ah m’thei thang cu hnungtuk u ne, kei ah ng’thu kä ami ngaih ah phäh ah kyak ci.

²⁰ Sheba ah ka ami law püi ah tui ng’ui ah phi kia, asho nak kho ah ka tui ng’ui gui ah phi kia, kei naw a i ah kä ka ngai ci! Ngami ah douthak cu kei naw kä ka dou khai, ami khawihnah nak ah phäh ah kei kä ka zeikia khai.

²¹ Cun ah kyasei shin ah chang gui ah ami ng’vawn nak vai pyang ne ka ng’tän sak gui khai. Ami pa gui la ami hta gui, ami teihpüi gui la ami paw chang gui si yawp khai gui.

Asiip Täng ah ka Law ne tu lawk ci gui

²² Bawipa naw pyen ci, “Asiip täng khopäng ung ka chang gui lawk ci gui; asho nak ah om ciah m’gäi ciah pakhui naw ng’tuk vai ah pawng ci nei.

²³ Ngami naw ami lo gui la ami khim sem gui cu la ge ci gui; ngami cu m’ghämce u ne chingein nak kä om ci gui. Ngami cu ng’se gui ng’cum u ne tuinu ah ng’hmum ah mäih ah kyak ci gui. Ngami cu Jerusalem hnungtuk ne tuk ge vai ah kyak ci gui.”

²⁴ Jerusalem chang gui naw pyen ci gui, “Keimi naw cun ah mawng kami ng’yak ung, kami kut cu caai ci; keimi ung natnak gawk law sei, hta lawk khai ah hnumi naw a poi am neh ah mäih ah kami m’neh ci.

²⁵ Keimi cu gawhta ung ah kä kami hteit ci, lam gui ung kä kami hteit ci, a i ah kyasei ci ung kyih vai kyak ciah likhim kawt ciah kami ga gui naw ami na koi gui ah phäh ah kyak ci.”

²⁶ Bawipa naw a chang gui pyen na gui ci, “Suishe sui ne m’vut ung ng’hleeo vä. A Htapa tumat bäng ah phäh ah thüi kyap ciah mäih ah nami phlitui cha ne thüi gyap vä, a i ah kyasei ci ung law ne ning m’di gui khai ah chang tumat naw ang ghit ah ning tu law gui khai nei.

²⁷ Jeremiah, m’si m’nüm ah mäih ah ka chang gui cu m’nüm gui ä, ngami a i ah mäih ah ami kyak teng gui ä.

²⁸ Ngami ami van cu ami m’lung ling ne hnungtuk ci gui, kyei la m’si ah mäih ah liu cu gui. Ngami ami van cu theileh ci gui, hteit shüi shüi ne ng’pyen sak ci gui.

²⁹ Meibum cu cang ne ng’ling aih pang sei phi m’si cu tui ne kä long hlawt ci. Kei ah ka chang gui m’cimm hlam gui cu akholä ah kyak ci, a i ah kyasei ci ung shekhak ciah chang gui cu kä k’täm gui hlawt ah phäh ah kyak ci.

³⁰ Ngami cu a phu kä om ciah ang eek ah khü gui vai nei, a i ah kyasei ci ung kei, Bawipa naw ka hnungtuk gui pyi ah kyak ci.