JEREMIAH 52 - Cho Bible Common Language 2016

Jerusalem a Ng’kyak ah Mawng

¹ Zedekiah cu Judah ghangpughang ah a kyak law yah ung akhokhum m’ku lei ät lawk ci, ani naw Jerusalem ung kum gha lei ät uk ci. Anu ah ming cu Hamutal, Libnah mang gaw ung om ciah Jeremiah ah hta ah kyak ci.

² Ghangpughang Zedekiah cu ghangpughang Jehoiakim ah mäih ah Bawipa hnungtuk püi ne katnak bik ci.

³ Bawipa cu Jerusalem la Judah chang gui ah khan ah m’lungshe aih neta, a hmuh nak ung ka naw k’täm gui ci. Zedekiah naw Babilon ghangpughang Nebukhadnezzar cu hnung tuk püi ci.

⁴ Cun ah kyasei Nebukhadnezzar naw nga gui avan awn law ne, Zedekiah ah uk nak a kum kaw nak, acha gha nak ah a hnüüp gha nak ung Jerusalem cu law ne tuk ci. Ngami cu mang gaw k’pung ah phung tu u ne, a caun ah ng’veing ah m’dek k’paang co ci gui,

⁵ Ngami naw cun ung Zedekiah uk nak akum gha lei ät güt ung khaai gui ci gui.

⁶ Acu kum a cha phli nak ah a hnüp kaw hnüüp ung a mi cawi gha nak nui law aih sei chang gui ami ei vai kä om ba ci,

⁷ Mang pang gui cu ng’gäi yawp ci. Babilonian gui naw mang gaw cu veing ne khaai pang u sei phi, khomü ah gakap gui ami van cu luat yawp ci gui. Ngami cu mang ah dum täng, pang goi ah ani ng’lak m’kawt ung hteit u ne, Jordan khongnawi täng ah dawng ci gui.

⁸ Cun ung phi Babilonian gakap gui naw ghangpughang Zedekiah cu gawt u ne, Jerikho, khawdo pei ah phak ci gui, a gakap gui ami van naw dawng tak ci gui.

⁹ Zedekiah cu Hamath khopäng Riblah mang gaw ah ghangpughang Nebukhadnezzar ah hteh püi ci gui, a cu ah Nebukhadnezzar naw ani cu m’kyuk nak pek ci.

¹⁰ Riblah ung ani naw Zedekiah ah hta gui cu Zedekiah naw a hmuh ge ah sih nak pe gui ci, Judah ang vai gui phi sih nak pe gui ci.

¹¹ Cun kawn ah ani naw Zedekiah ah mik gui cu kawih pe neta m’si gui awn khit ne Babilon ah hteh püi ci gui. Zedekiah cu a sih güt Babilon thawng ah om ci.

Taigüim ami M’di ah Mawng

¹² Babilonia ung Nebukhadnezzar ghangpughang ah a kyak nak akum gha lei kaw nak, a cha hma nak ah a hnüp gha hnüüp ung, ghangpughang m’shümthein ci la gakap bawi ah kyak ciah Nebuzaradan cu Jerusalem un glut ci.

¹³ Ani naw Taigüim, mang im la Jerusalem ung küikyang ciah chang gui avan ah im gui cu m’khih yawp ci;

¹⁴ a gakap gui naw mang gaw k’paang cu phyek ci gui.

¹⁵ Cun kawn ah Nebuzaradan naw mang gaw ung om shüt ciah chang gui bilo thei ciah chang gui la Babilonian gui ung ng’dawn lawk ci gui cu Babilonia ah hteh püi gui ci.

¹⁶ Cun ung phi du khaih pikbäih ci gui la khawh a i kä tak ci gui cu Judah ah nawng gui shüt ne, sapyit lo la lolai gui ung bilawh sak gui ci.

¹⁷ Babilonian gui naw Taigüim kyong ah ami tha ah kyei tung gui, la ng’hlee gui cu kyei tui kan mah mah ah shudeng u neta kyei avan ci Babilon ah hteh püi ci gui.

¹⁸ Acun ah mäih ah sonkiang theingthap sak nak ung ami mang ah m’sawng gui, m’vut khawk gui, mei imm gui pyan nak ung mang ah a i baw gui, khawihnah nak ah si m’cun nak khawk gui, tui ng’ui m’khih nak ung mang ah khawk gui, la Taigüim khawihnah nak ung mang ah ahei kyei gui cu hteh püi ci gui.

¹⁹ Ngami naw ghui la ngui awn pyan phung cu hteh püi ci gui: Khawk hta gui, mei cak ami m’kawn nak ah hlaw k’am gui, khawihnah nak ah asi ami m’cun nak ah khawk gui, m’vut khawk gui, mei im ng’düi gui, tui ng’ui m’khih nak ah khawk gui, ami douthak ah sapyit tui ami shawi nak ah khawk gui phi hteh püi ci gui.

²⁰ Ghangpughang Solomon naw a pyan ah kyei gui kyak ciah k’tung hnih, ng’hletäng gui, tuiam nu, la seikawng gup shui gha-lei-goi gui cu khiin vai ah gih aih ci gui.

^21-22 Tungnu goi cu ng’teih cawih ci goi: tumat cu 8 metre ah lüng ci, ang veing ci 5-3 metre ci lawk ci. Tung goi cu akyong ah khui ne 75 millimetre ciah shah ci. Tung goi ah amawng cu 2-2 metre hlüng khai ah kyei awn pyang ne, angveing avan ung shele khing ami cüi the ah gui ami bah ah kyak kci, avan cu kyei awn ami pyan ah kyak ci.

²³ Tung päng ung pyan ah cun ah gui ung shele khing phia ci lawk ci, kawkip lei chuk cu m’dek ungka naw hmuh ah kyak ci.

Judah Chang gui Babilonia ah Ami Hteh püi gui

²⁴ Cun kawn ah mä gabawi Nebuzaradan naw, Taigü tung Seriah, Taigü kem Zephaniah la ahei Taigüim ung küikyang ciah bawi thum gui cu pha ne hteh püi ci.

²⁵ Cun kawn ah ami naw mang gaw ungka ak plalwk cu, gabawi phyim man tumat, mang gaw ung om lä ci gui ah ghangpughang m’shüm thein ci gui chang chih, gabawi khem ne bik ci, gakap ah mawng guk then nak ung täng pang ci tumat la ahei küikyan ciah chang chuk kip cun phi pha ne hteh püi gui ci.

²⁶ Nebuzaradan naw cun gui cu Babilonia ghangpughang ah om nawk Riblah mang gaw

²⁷ Hamath khopäng ah hteh püi gui ci. Acu ah ghangpughang naw m’ghuih gui neta sih nak pe gui ci. Cun ah kyasei Judah chang gui ami khaw ung ka naw omktu khaw ah ami hteh püi gu ah kyak ci.

²⁸ Shin cu Nebukhadnezzar naw pha ne a hteh püi gui ami guk ah kyak ci: Ghangpughang ah a kyak nak akum chih nak ung 3, 023 pha ne a hteh püi ci,

²⁹ akum gha lei cheit nak ung Jerusalem ah ka 832;

³⁰ Akum m’ku lei thum nak ung 745-Nebuzaradan naw pha ne a hteh püi gui. A cun ah ng’dawn ah chang 4, 600 cu pha ne a hteh püi gui ah kyak ci.

³¹ Evilmerodak, Babilonia ghangpughang ah a kyak law kum, ani naw Judah ghangpughang Jehoiachin cu m’gein neta apha nak ungka hlawt ba ci. Cun ah a kyak cu Jehoirehin pha ne ami hteh püi kawn ah akum thumkip lei chih nak, a cha gha lei goi nak ah a hnüüp m’ku lei hma nak hnüüp ah kyak ci.

³² Evilmerodak naw ani cu m’gein ne akni ah om püi ne, Babilonia ah ani awn atäng ah om ktu ah kya ne om ci gui ah ahei ghangpughang gui am a pek ah to bä oi ciah m’taan kyak nak cu ani am pek ci.

³³ Cun ah kyasei Jehoiachin cu thawng kyum sui ng’thawng sak neta, ani a ghin ah chuih ghangpughang ah ei nak ung a täng ah ei tuk ci.

³⁴ Ani a ghin ah chuih a hnüüp tä sei, ang yak hlü ah a mang vai phi pek ci gui.