JEREMIAH 51 - Cho Bible Common Language 2016

Babilonia Am’khoicha Bamä Nak

¹ Bawipa naw pyen ci, “Kei naw Babilonia la a chang gui hnungtuk he m’di gui khai ah khokhi cu ka law püi ci.

² Khokhi naw ko khi ne a zon ah mäih ah Babilonia m’di khai ah a khohei chang gui cu kei naw ka tüi lawk khai. Cun ah m’di nak ah khaw hnüüp a gawk law ung ngami naw cun ah khaw cu akit päng ung om ne tu u ne, nawng khai gui.

³ Khaw cu aghäng ah Babilonia gakap gui am ami m’la gui ami kah vai, shawiphaw ami sui vai ah a khin kä nami pek gui vai. Chang nong gui kä nami k’phyawn gui vai! Gakap avan nami m’di vai!

⁴ Ngami cu leim u ne ami mang gaw gui lam gui ung sik khai gui.

⁵ Kei, Bawipa m’gäi ciah Khanpughi naw Israel la Judah gui cu, Israel ah Theingcim ciah Tumat ah ka kyak ciah kei cu na hnungfuk püi ne ami hma ung phi kei naw kä nawng gui khai.

⁶ Babilonia ungka dawng vä! Nami ghin vai ah dawng vä! Babilonia ah katnak ah phäh ah kä ning ngawn cu gui u sä. Kei naw tuhbäi phu ka shui yah ci, ami chei ah phäh ka m’kyuk gui yah ci.

⁷ Babilonia cu kei ah kut ung om ciah ghui khap ah mäih ah kyak ci, acun naw khomdek khan avan awk tat sak ci nei. Pakhui gui naw a shin ah wine cu aw u ne vämhtam ci gui.

⁸ Babilonia cu ang ghit ah yung kyak ci, ami m’di ah kyak ci! Acun ah phäh ah thüisei vä! Aleim ah phäh sei shui vä, m’tui ung khan ei hman khai nei.

⁹ Acu ah om tuk ciah akhohei changgui naw, “Kemi naw Babilonia cu bawm tu vai ah kami k’tha ci, cun ung phi ng’phlän pui ci nei. Tuhbäi nawng shüt ne mi im ah mi hteit ba khai nei. Khanpughi naw Babilonia cu ami gäi nak avan awn m’kyuk ne, m’di yawp ci nei.”

¹⁰ Bawipa naw pyen ci, “Ka chang gui m’lau ci gui, ‘Mikmi ming’düng ciah Bawipa naw m’dang ci nei, Mikmi mi hteit ne Bawipa mi khanpughi naw abi cu Jerusalem chang gui am mi m’thein gui khai nei.”

¹¹ Bawipa naw Media ghangpughang gui cu thawh let sak gui ci, a i ah kyasei ci ung ani naw Babilonia cu m’di vai ah angbü ah phäh ah kyak ci. Cun cu ani naw a Taigüim ami m’di ah phäh phu atuk ah kyak ci. Ng’tuk ciah bawi gui naw Thum’khän u ne, “Nami m’la gui k’tah vä! Nami shawi gui m’hnüt ge vä!

¹² Babilonia k’paang tuk vai ah alan cu pe vä. Gaw ngäng ci gui khüighat sak vä! Ng’mah ne ng tuk khai gui tha gui vä!” cik ci. Bawipa naw Babilonia chang gui ah khan ah abi vai a pyen cu bik ci nei.

¹³ Cun ah khopäng ung tuinu gui akda, khawn cham akda on ci, cun ung phi ani ah khin cu ng’pyi pyi ci, ani ah ghin nak cu pit pyi ci nei.

¹⁴ M’gäi ciah Bawipa naw amät ah ghin nak awn ng’taam ci, ani naw Babilonia tuk khai ah chang akda cu khimpea ng’son ah mäih ah law püi khai, ngami cu näng nak awn m’lau khai gui.

Khanpughi M’Taam nak ah Ng’äi

¹⁵ Bawipa naw a huham awn khomdek cu pyang ci; A cüivai nak awn khomdek khan cu tüi pyang ne, Khankho cu ng’phiah sak ci.

¹⁶ Ani ah ang thumkhän awn khomik ah khan ah tui gui m’hnawk ci; khomdek ah ak cawi ah ka khongmei gui ani naw law püi ci. Ani naw khok’aa ung lailüp pyang ci, cun kawn ah ak khei im kyong ah kaa khokhi cu tüi lawk ci.

¹⁷ Ashin abi ah kiasei, chang gui cu gu ang ne, a i kä hmuhmat cigui; A gup pyang ci gui cu ami m’lung kä ni aih ci, a i ah kyasei ci ung ami pyan ah khanpughi gui cu akcang ah kä kya ne, kä ghing ciah akiak ah phäh kyak ci.

¹⁸ Cun gui cu akholä ah kyak ci gui, päipih vai kyak ci gui; cun gui teng khai ah Bawipa a law ung Bawipa naw cun gui cu m’di gui khai.

¹⁹ Jakob ah khanpughi cu ngami ah mäih ah kä kyak ci; ani cu apäng tüipiang ciah tumat ah kyak ci, ani naw Israel gui cu amät ah chang akcang ah ghü gui ci. M’gäi ciah Bawipa cu ani ah ming ah kyak ci.

Bawipa ah Ng’kii

²⁰ Bawipa naw pyen ci, Babilonia, nang cu kei ah ng’ki, ka ng’tuk nak likhim ah na kyak ci. Kei naw nang cu pakhui gui la uk nak khaw gui tei nak vai ah ka ning mang ci.

²¹ Ng’se gui la ng’cum ci gui püi sak gui nak, yatha gui la mawng ci gui püi sak gui nak,

²² Pami gui la hnumi gui püi sak gui nak, aghi gui a hmaw gui hnim gui nak, pami htagui hnumi hta gui ngawn gui nak,

²³ Htoshäm gui la ami ng’htome gui, lai k’bi gui la ami laithon nak gui, uktu gui la ami bawi ng’vai gui güüt nak gui!”

Babilonia M’kyuk nak

²⁴ Bawipa naw pyen ci, “Babilonia la achang gui naw Jerusalem ah khan ah ami bi ah akshe gui avan ah phäh ah kei naw ka pek ba gui cu nangmi naw nami hmuk khai.

²⁵ Babilonian nang cu khomdek khan avan m’di ciah khomhtung awn na täng ci. Cun ung phi kei, Bawipa cu nang ah ga ah ka kyak ci. Kei naw nang cu ning k’pang ne m’dek awn ka ning pingtei sak khai, m’vut ah ka ning kyak sak khai.

²⁶ Na di nak ungka lung gui cu a i cawh kyan nak ung phi kä mang ba vai. Nang cu ngawu yä loung khong ah na kyak khai. Kei Bawipa naw ka pyen ci.

²⁷ “Ng’tuk nak vai alan hleek vä, phyung heng tum vä, cun ung pakhui gui naw ng’yak khai gui! Babilonia ng’tuk püi vai ah pakhui gui pawng htein vä! Ararat, Minni la Ashkenaz uk nak khaw gui am ng’tuk vai ah mawng m’thein vä. Ng’tuk ung lam ma khan bawi tumat tha vä. Khanpeh bum gui ah mäih ng’se gui cu law püi vä.

²⁸ Babilonia ng’tuk püi vai ah pakhui gui pawng htein vä. Media ghangpughang, ami ng’vai gui la mi bawi gui la ngami naw ami k’pan ah khopäng gui ung gakap gui avan cu chang tüi ne pyen ah gui vä.

²⁹ Khomdek cu ng’tum ne thüng ci, a i ah kyasei ci ung Bawipa naw Babilonia cu bung hmu, a u ah kä om nak ah kyak khai ah abi nak vai a law püi ah phäh ah kyak ci nei.

³⁰ Babilonian gakap gui cu kä ng’tu ba u ne, ami ng’tuk im kyong ah om ci gui. Ngami cu ami thagui maih sei hnumi ah mäih ah kya lawk ci gui. Mang gaw m’kawt gui cu ng’gäi yawp ci, ami im gui cu mei naw ui ci.

³¹ Mang gaw akit päng ung ng’gäi ne a kyak cu ng’shä chang tumat ci naw law gäk gäk ne Babilonia ghangpughang am m’thein lawk ci gui.

³² Ga gui naw tuinu-kan nak yung cu tu ne khäm u ne, gatuk im gui gui mei awn m’khih ci gui. Babilonian gakap gui cu catne ng’hlet ci gui.

³³ Kä shou pha sei ga gui naw k’shawm gui ne, khlang ung htang leh ah mäih ah leh gui khai gui. Kei, m’gäi ciah Bawipa, Israel Khanpughi naw ka pyen nei.”

³⁴ Babilonia ghangpughang naw Jerusalem cu tu pit ne ei ci. Ani naw mang im cu hlüng ah mäih ah ghawng sak ne; k’phyu ng’ghaw ah mäih ah m’zawih ci. Ani naw ang zak hlü gui cu la neta, k’pawih ci gui cu ghawt ci.

³⁵ Zion chang gui naw pyen u sä, “Keimi ah khan ah ami bi ah c cawi m’sau nak gui cu Babilonian naw k’chaw na sä!” Jerusalem chang gui naw pyen u sä, “Keimi ah yaica nak gui cu Babilonia naw k’chaw na sä!”

Bawipa naw Israel M’htei khai

³⁶ Cun ah kyasei Bawipa naw Jerusalem chang gui a pyen nak gui cu, “kei naw nangmi ah mawngma cu la u ne, nangmi ah khan ah ami bi ah mäih ah nami ga gui ah khan ah ka bik khai. Kei naw Babilonia ah tui khawng cu kawi sak ne, a tuinu gui ka ket sak khai.

³⁷ Cun ah khopäng cu di ne ng’pum khai, khisa gui ah om nak ah kyak khai. Cun cu ten gung kyihkyawk vai kya ne, a cun ung a u phi kä om khai, cun hmuk ciah chang avan cu cäicat khai gui.

³⁸ Babilonian gui ami van cu phongkawng hlui ah mäih ah m’ngaw u ne, kawng hta ah mäih ah ng’ging ci gui.

³⁹ Ngami cu ei aw hlü aih u ne ang? Kei naw ngami ah phäh ah ei pawi pyang pe gui ne, awk sak gui ne ka yei sak gui khai. Ngami cu ip u ne kä ng’shüm law bap hung khai gui.

⁴⁰ Kei naw ngami cu htome, Mehta, htome hta ah mäih ah ngawn vai ah ka hteh püi gui khai. Kei Bawipa naw ka pyen nei.

Babilon ah a Ng’kyak law vai

⁴¹ Babilon naw amawng Bawipa naw pyen ci: “Khomdek khan avan naw amtaan ah mang gaw cu tu ne khäm ci gui nei! Babilon cu changpakhui gui ah phäh ah kyihkyawk vai ah kya lawk ci nei.”

⁴² Tuinu cu Babilon ah khan ah long ne, m’ngawk tui ng’hnawk naw küm ci nei.

⁴³ Gawnu gui cu ten gung kyihkyawk vai ah kya u ne, a u naw kä a om nak, hteh phi a u naw kä a hteh nak ah tui kä om ciah bung ah kiakk ci nei.

⁴⁴ Kei naw Babilonia khanpughi Bela cu ka m’kyuk khai, am guuk ah khawh gui a chah vai ah ka cik khai: a u pakhui naw phi kä khawihnah ba khai. “Babilon k’paang gui cu ng’kia pyi ci nei.

⁴⁵ Israel chang gui, acun cu dawng ta vä! kei ah kyihshe ciah ka m’lungshe nak ung ka nami phiawn vai ah dawng vä —

⁴⁶ Ng’thu ng’lak nami ng’yak ah phäh ah nami k’tha kä ken sä, kä kyikyawk vä. A kum tä sei ng’thu ng’lak aheihei cu püi thei ci — khaw ung kiawi m’sa nak gui, ghangpughang tumat la tumat ng’tuk nak cu gawk law thei ci.

⁴⁷ Cun ah kyasei Babilonia ung agup gui kei naw ka ng’thumcha nak vai ah akhin cu gawk lawk ci nei. Khopäng avan cu lü ng’aa sak ne, a chang avan cu ngawn gui khai gui nei.

⁴⁸ Asiip täng ah ka ani m’di khai ah lawk ciah chang gui ah kut ung Babilonia ang kyak awn ah khomdek khan la khan khomik ah om ci nü cu yeikyai ne m’lau khai gui nei.

⁴⁹ Babilonia ah phäh ah khomdek khan ung chang gui sik ci gui, tuhbäi Babilonia cu ng’kiak khai, a i ah kyasei ci ung ani ah phäh ah Israel chang akda asih ah phäh ah kyak ci. Kei, Bawipa naw ka pyen nei.”

Babilonia ah Om ciah Israel gui ah Phäh ah Khanpughi ah Ng’thu

⁵⁰ Babilonia ah om ciah a chang gui a pyen nak gui cu; “Nangmi cu sih nak ung nami phyawng pyi ci! Tubäi hteit vä, kä ging en vä! Cun ung phi nangmi im awn ami ng’shawng law ung, nami Bawipa, kei cu na khaih na vä, Jerusalem cu shüm vä.

⁵¹ Nangmi naw nami pyen khai, keimi cu kami thangshe sei kami thui ng’aa ci nei; keimi na bawm gui khai kä om sei kami yai ci nei, a i ah kyasei ci ung Taigüim kyong ah a Theingcim nak ah hmun cu a khohei chang gui naw la pyi ci gui nei.

⁵² Cun ah kyasei kei naw Babilonia a gup gui ka ng’thumcha nak vai ah hnüüp la khopäng avan ung leimbai ci gui ami ng’hlo-ei nak vai ah hnüüp la khopäng avan ung leimbai ci gui ami ng’hlo-ei nak vai ah hnüüp cu gawk lawk ci nei.

⁵³ Babilonia naw khankho ah hang kai ne ng’tuk im khäng a caw hung phi acun m’di khai ah chang gui cu kei naw ka tüi khai nei. Kei, Bawipa naw ka pyen nei.”

Babilon Amdi ba nak

⁵⁴ Bawipa naw pyen ci, “Babilon ung kyak ah k’aw cu ngai vä, khaw akyong ah adishum ah phäh ah thüi sei ah kyak ci nei.

⁵⁵ Kei naw Babilon cu ka m’di ci nei kä shipdeep khai ah ka tha ci nei. Gakap gui naw hnawk ciah tui hnawk ah mäih ah ng’güüt u ne, nui sei m’lau ne tuk ci gui nei.

⁵⁶ Ngami cu Babilon m’di khai gui ah lawk ci gui nei; ami gakap gui cu tu ne khäm gui ci gui, ami li gui cu hnget yawp ci nei. Kei cu akshe m’kyuk ciah khanpughi ah ka kyak ci, Babilon cu amät ah bi awn kyä khai ah kei naw ka bik khai.

⁵⁷ Kei naw ami uk tu gui — cüivai chang gui, ami ng’vai gui, gakap gui cu awktat khai gui ah ka ci gui khai. Ngami cu hteit ne ip u ne kä ng’shüm law ba khai gui. Kei, ghangpughang naw ka pyen nei; kei cu m’gäi ciah Bawipa nei.

⁵⁸ M’gäi ciah Babilon ah k’paang gui cu m’dek ung gawk khai ah gäi khai gui, ami täng hän m’kawt gui cu m’khih khai gui. Chang pakhui gui ah bilawh avan cu akholä ah kyak ci; Ngami ah k’tha nak gui cu meidäi ung maih ci. Kei, m’gäi ciah Bawipa naw ka pyen nei.”

Jeremiah ah Ng’thu cu Babilonia ah M’khäh ci gui

⁵⁹ Ghangpughang Zedekiah ah chang m’hteng cu Seraiah, Neriah ah hta Mahseiah ah tu ah kyak ci. Zedekiah Judah ghangpughang ah a kyak nak akum phli nak ung, Seriah cu ani awn atäng ah Babilonia ah hteit ci goi, kei naw m’shüm theein nak amshah ka pek ci.

⁶⁰ Kei naw ca-uk tumat ung Babilonia ah khan ah gawk lawk khai ah dishum nak gui avan la Babilonia ah amawng shei gui cu ka guk ci.

⁶¹ Seriah ka m’thein cu, “Nang cu Babilon ah na gawk ah a kyak ung, chang gui ah ma ah shin ung guk nü avan cu m’lau ne ng’htei khai ah na phat vai.

⁶² Cun kawn ah na taigü vai, ‘BAWIPA nang naw shin ah hmun na m’di khai ah na pyen ci, cun ah kyasei shin ah kyong ung a i ak ghingsei phi kä om ba sä, chang phi, khisa phi, cun cu ngawi yä bung ah kya sä.’

⁶³ Seriah, nang naw chang gui ah ma ah shin ah ca uk nap hat yawp ah a kyak ung, shin cu lung ung khoh ne khit neta Euphratis tuinu ung na shum vai.

⁶⁴ Cun kawn ah na pyen vai, ‘Shin cu Babilon ah khan ah gawk lawk khai ah amawng nei — Cun cu hniim ne, kä phong law bap hung khai, a i ah kyasei ci ung cun cu ani ah khan ah Bawipa a law püi vai ah dishum nak ah a kyak ah phäh ah kyak ci.’” Jeremiah ah ng’thu cu shin ung ng’pyi ci.