JEREMIAH 50 - Cho Bible Common Language 2016

Babilon Ami Khäm ah Mawng

¹ Shin cu Babilon mang gaw la a chang gui ah mawng Bawipa naw ana pek ah ng’thu ah kiah ci:

² “Chang pakhui gui am ng’thu m’thein vä! Hmat sak gui vä! m’hnüt nak cu pe ne, ng’thu cu ng’shäu vä! Adüm ah kä nami gim vai nei! Babilon cu ng’kia pyi ci nei! A khanpughi Marduk cu ng’pyäuh pyi ci nei! Babilon ah agup gui cu thüi ng’aa ci gui nei, ani ah shemshai ciah agup gui cu deng pyi ci nei!

³ Asiip täng ah ka pakhui cu law ne Babilonia cu tu lawk ci nei, ani naw cun cu bung ah pyang khai nei. Chang gui la khisa gui cu dawng khai gui, acu ah a i phi kä om ba khai” cik ci.

Israel gui Ami law ba ah Mawng

⁴ Bawipa naw pyen ci,” Cun ah khin a gawk law ung Israel la Judah gui ami van kyap u ne, kei, ami na khanpughi cu na shui khai gui.

⁵ Ngami naw ziou hteh nak lam cu ng’shi u ne, acu täng ah hteit khai gui. Ngami naw kei awn ng’täi ciah thukhän bik khai gui, kä m’shet bakhai gui.

⁶ “Kei ah chang gui cu Khomhtung khanah htoshäm naw a maih sak gui ah htome ah mäih ah kyak ci gui. Ngami cu khomhtung tumat ungka naw tumat un glum ciah htome ah mäih ah kyak ci gui, ngami naw ami im a hawi om cicu m’hnin ci gui.

⁷ Ngami cu hma gui ci ami van naw ami tuk gui ah kyak ci. Ami ga gui naw, “Ngami cu Bawipa hnung tuk püi ne hmakak ci gui, cun ah kyasei mikmi naw mi bi cu kä hma ci. Ami pupa gui Bawipa ngaih u ci gui, cun ah kyasei ngami ami mät phi ani ung ami bekhüt vai ah kyak ci.’

⁸ ‘Israel chang gui, Babilonia ungka dawng vä! shin ah khopäng cu hteh ta vä! ak htük ah hteh ta vä!

⁹ Kei naw a siiptäng ah thamah ciah pakhui bum gui cu thawh let sak gui ne, Babilonia cu ka tuk sak gui khai nei. Ngami naw ng’tuk bi u ne cun ah khopäng cu khan khai gui. Ngami cu thei ciah sakap gui ah kyak ci, m’la ami ka hung, ami bü nak ka ng’chei ci.

¹⁰ Babilonia cu gut tep khai gui, gut tep ciah chang gui naw ami ng’yak nlü phang lak khai gui. Kei Bawipa naw ka pyen nei.”

Babilon Angkiak ah mawng

¹¹ Bawipa naw pyen ci, “Babilonia chang gui, kei ah ka pakhui cu nami na gut ci nei. Nangmi cu htang leh ciah seipat ah mäih, hi ciah ng’se ah mäih ah nami yeikyai ci,

¹² cun ung phi damduh ciah nami mang gaw cu a thang she sei thui ng’a khai nei. Babilonia cu avim ung ak zaw pikbäih pakhui ah kyak khai nei; cun cu chawng ne tui kä om ciah khong gau ah kyak khai nei.

¹³ Kie ah m’lungshe ah phäh ah Babilon ung a u kä om ba khai nei: cun cu m’di ne nawng khai gui, acun smn pah ci chang avan cu cat ne cäi khai gui nei.

¹⁴ “Likap gui, Babilon la a pei yung hnungtuk vai ah pawng ge vä. Nami m’la avan awn Babilon cu kap vä, a i ah kyasei ci ung ani naw kei, Bawipa cu katnak bi ne na hnungtuk püi ci nei.

¹⁵ Mang gaw avan veing ne ng’tuk nak cu m’lau vä! Tuhbäi Babilon naw a kut chah ci nei. Akpaang gui cu m’shet ne gäi ci gui nei. Kei naw Babilonian gui ah khan ah phu ka tuk ci nei. Cun ah kyasei ngami ah khan ah phu tuh vä, chang hei gui ami om püi gui ah mäih ah om püi gui vä.

¹⁶ Cun ah khaw ung m’shi kä phu en sak gui vä, geit phi kä khäm en sak ghi vä. Acun ung om tuk ciah akhawhei chang phung naw ng’tuk ciah gakap gui cu kyih u ne, ami im ah hteit ba khai gui nei.’

Israel gui ami law ba ah mawng

¹⁷ Bawipa naw pyen ci, “Israel chang gui cu phongkawng naw gawt ne ak püi gui ah htome ah mäih ah kyak ci gui. Ak htük ung Assiria Uktubawi naw a tuk gui, cun kawn ah Babilonia ghangpughang Nebukhadnezzar naw ami guh adep gui.

¹⁸ Acun ah phäh ah kei, m’gäi ciah Bawipa, Israel khanpughi naw ghangpughang Nebukhadnezzar la a khopäng cu Assirian uktu bawi ka m’kyuk ah mäih ah ka m’kyuk khai.

¹⁹ Kei naw Israel chang gui cu ami khaw ung ka m’thou ba gui khai. Ngami naw kmmel m’htung la Bashan khawung ami geit cu eikhai gui, Ngami naw Ephraim la kilead khopäng ung thou ci avan cu ami ng’yak hlü ah ei khai gui.

²⁰ Cun ah khin a gawk law ung Israel ah katnak kä hmuh ba vai, Judah ung cheishoh nak kä om ba khai, a i ah kyasei ci ung kei naw phiawn ngäsei ghing ci gui cu kei naw ka m’geinsei gui khai. Kei Bawipa naw ka pyen nei.”

Babilonia ah Khan ah Khanpughi ah Ng’thumcha nak

²¹ Bawipa naw pyen ci, “Marathaim la Pekok chang gui cu tu gui vä, ngawn gui ne m’di gui vä, kei ah ka thumkhän phung cu nami bi vai nei. Kei, Bawipa naw ka pyen nei.

²² Ng’tuk nak ah ak’aw cu cun ah khaw ung mi ng’yak khai nei, dämduh ciah dishum nak om khai nei.

²³ Babilonia naw khomdek khan avan cu khai ne ng’deng khaiah ng’kii awn teei ci, tuhbäi cun ah ng’kii cu ng’bäät pyi ci nei! Cun ah khopäng ah khai ah cun ah a kyak law ah phäh ah pakhui gui avan cu m’lau ci gui nei.

²⁴ “Babilonia, nang naw na na ng’tuk püi ci, nang naw kä hmat ne kei ah cuun ung na awk ci nei.

²⁵ Kei naw likhim gui ka gim nak ah hmun cu ka hmawng pyi ci nei, kei kamlung she nak awn cun gui cu ka k’plawk ci nei, a i ah kyasei ci ung kei, m’gäi ciah uktu Bawipa naw Babilonia ung ka bi vai a om ah phäh ah kyak ci nei.

²⁶ Akit päng ungka naw tu vä, htang ami tha nak ah khei gui cu a hmunah gäi vä! Nami gut tep gui cu htang pum ah mäih ah pum vä! khopäng cu m’di vä! A i phi kä nawng en shüt vä!

²⁷ Ami gakap gui avan ngawn vä! ngawn gui yawp vä! Babilonia Chang gui cu ng’ziin pyi ci gui nei!

²⁸ (Babilonia ah ka laut ne dawng lawk ci gui cu Jerusalem ah lawk ci gui, ngami naw a Taihü im ung Babilonia gui naw ami biahkhau ah Bawipa kami khanpughi naw a i cha ah phu a tuk cu pyen lawk ci gui nei.)

²⁹ “Likap gui naw Babilonia ami tuk vai ah m’thein gui vä. A i hawkcha ah li la m’la bi vai ciah hmat ciah chang nü cu tüi vä. Mang gaw cu kei vä, a u phi käk’phiaan en vä. Ani abi gui avan ah phäh ah pe ba vä, a ni naw chang gui a om püi ah mäih ah om püi tu ba vä, a i ah kyasei ci ung, ani naw ng’shei ne kei, Israel ah Theingzim ci Tumat cu ana hnung tuk püi ah phüh ah kyak ci.

³⁰ Cun ah kyasei ani ah chang hong gui cu mang gaw lam gui ung ngawn gui vai, ani ah gakap gui avan cu can ah hnüüpung m’di gui vai. Kei Bawipa naw ka pyen nei.

³¹ “Babilonia, nang cu chang ah ng’shei nak awn na be ci, cun ah kyasei, kei, m’gäi ciah Uktu Bawipa naw ka ning hnungtuk ci nei! Nang ning m’kyuk nak vai ah kei ah akhin cu gawk lawk ci nei.

³² Khäh ghah ciah na pakhui khaw cu ng’lat ne kiuk ci nei, a u naw ka ning m’tho tuba ci nei. Nang ah mang gaw gui cu mei awn m’khih ne, a pei yung ah om ci ng’nü cu ka m’di khai nei.”

³³ M’gäi ciah Bawipa naw pyen ci, “Israel la Judah chang gui cu Shedam nak gah ci gui nei. Ngami tu ne khäm gui ci ami van naw ngami cu ngäng gui u ne, kä hteh sak gui khai gui.

³⁴ Cun ung phi ngami gung gui ciah tumat cu k’thamah ci-ani ah m’ung cu m’gäi ciah Bawipa ah kyak ci. Ngami ah hmawk cu ani naw bi ne. Khomdek khan ung dimdeeih nak law püi khai, cun ung phi Babilonia chang gui ah khan ah khüikha nak law püi khai.”

³⁵ Bawipa naw pyen ci, “Babilonia ung sih nak gawk sä! Ak chang gui, a uk tu gui la cüi vai chang gui ung sih nak gawk sä!

³⁶ Hleei ciah a prophet gu ung sih nak gawk sä Ngami cu guk’tak aih ci gui nei! Ami gakap gui ung sih nak gawk sä ngmai cu kyi aih ci gui nei.

³⁷ Ang se gui la a zatha gui vu m’di vä! Ami ng’vah ah gakap gui ung sih nak gawk sä. Ngami cu ami k’tha ken aih ci nei! Akhawh cham gui cu m’di vä; tuh ne gut vä.

³⁸ Cun ah khaw ung khaw käu sak ne, atuinu gui cu kawi sak vä. Babilonia cu kyihkyawk vai ah agup gui ah om nak ah khaw ah kyak ci, acun naw chang gui gu sak gui ci.

³⁹ Cun ah kyasei Babilonia cu khogam gui la mümcha she ah kyak ci gui nei. Lawk ciah akhin avan ung cun ung chang gui kä om ba khai gui nei.

⁴⁰ Kei naw ngami la apei yung ah gawnu gui ka m’di gui yah ung Sodom la komorrah khan ah kyak ciah mäih ah Babilon ah khan ah kyak khai nei. A cun ung angawi ah phi a u kä om ba khai nei. Kei, Bawipa naw ka pyen nei.

⁴¹ “Chang gui cu asiip täng khopäng ungka lawk ci gui, ashou nak ah ka m’gäi ciah pakhui ah kyak ci; Ghangpughang gui akda cu ng’tuk vai ah pawng ci gui nei.

⁴² Ngami naw amili la khim cu lak ci gui; ngami m’ghämce ci gui, m’gein nak kä om ci. Tuinu ah ng’güüt ah mäih ah ami k’se gui ami ng’cum cu kyak ci. Ngami cu Babilonia hnungtuk ne ng’tuk ge vai ah om ci gui.

⁴³ Babilonia ghangpughang naw cun ah mawng ng’ya neta, a kut phi kä hnün hlawt ci. Ani cu amlung nat sak sei, anau poi m’neh ciah hnumi ah mäih ah m’neh ci.

⁴⁴ “Jordan lawng yung sing shah ciah bung ka khu m’kim khaw ungka phong kawng a luh law ah mäih ah, kei, Bawipa cu law ne, Babilonian gui ami mang gaw ungka ang ghit ah dawng khai gui ah ka cik khai. Cun kawn ah kei naw ka ghü ah ang vain aw khui khaw cu uk khai. Kei awn m’täng hning vai a u om khai ang? Kei na ng’küknet püi khai a u om khai ang. A i uktu naw kei na hnu na hning khai ang?

⁴⁵ Babilon mang gaw hnungtuk vai ah kei naw ka pawng püi la achang gui ah khan ah bi vai ah kei naw ka pawng püi cu ngai vä. Ami hta nau gui cu saw kaih gui khai gui, chang nü cu kyi kyawk khai.

⁴⁶ Babilon ang kyak ah a kyak ung cun ah k’awna khomdek avan thüng sak khai, ami kyah ah k’aw shan gui cu ahei pakhui khaw gui naw ng’yak khai gui.”