JEREMIAH 5 - Cho Bible Common Language 2016

Jerusalem ah Kat nak

¹ Jerusalem chang gui, nami lam gui ung dawng vä! Veing ne teng vä! Nami mät ah phäh ah teng vä! Ami sum lei hmun gui ung shui vä! Ng’düng nak bik ciah chang, Khanpughi ung bekhüt vai ah k’tha nak ciah chang, nami hmuh hning khai aw? Nami hmuh ah a kyak ung, Bawipa naw Jerusalem cu m’geisei khai nei.

² Nangmi naw Bawipa khawihnah vai ah nami pyen tupang ung phi, nami pyen ah kä nami bik ci nei.

³ Akcang ah Bawipa naw bekhüt nak cu shui ci nei. Ani naw ning m’gein gui sei phi nangmi naw a i ah kä nami ngai ci; ani naw ning deng gui sei phi, nami ng’thei vai ah nami mak ci. Nangmi cu nami m’lung liing sei, nami katnak ungka kä nami ng’hlat law ba ci.

⁴ Kei naw ka ngai ci, “Shin gui cu dukhaih ci la a i kä hmat ciah kyak ci gui. Ngami cu akgu k’ang ah om ci gui; Ami Khanpughi naw a i athäh, ami Bawipa naw a i ami bi vai angyak hlü cu ngami naw kä hmat ci gui.

⁵ Kei naw huham mah ciah chang gui ah a i ak thäh, ami Bawipa naw a i ami bi vai angyak hlü cu, akcang ah hmat khai gui.” Cun ung phi ngami ami avan naw Bawipa ah huham cu hnungtuk püi u ne, ani ah ng’thu ngaih vai cu mak ci gui.

⁶ Acun ah phäh ah bung ah om ciah phong kawng naw lo gui khai; K’pyama ah om ciah hngei gui naw phyit ne k’teek gui khai. Kawng hta gui naw ami gawnu gui ung mah gui ne, chang gui akpung ah ami law ung phyit ne hlai gui khai, a i ah kyasei ci ung ngami cu ami katnak da aih ci, akhin päng päng ung Khanpughi ami ng’hlah tak ah phäh ah kyak ci.

⁷ Bawipa naw ng’shi gui ci, “Ka chang gui ah katnak a i ah kiasei ka m’geinsei gui vai ang? Ngami naw kei na nawng u ne Khanpughi akcang ah kä kyak ci gui cu khawihnah ci gui nei. Kei naw ka chang gui cu ami phü ah ka m’bei gui ci. Cun ung phi ngami cu chang ah chu hta kat püi u ne pawmya chang gui awn akhin ng’pyi sak ci gui.

⁸ Ngami cu ei phü neta gängtha ciah ng’se k’gäu gui ah mäih ah kya u ne, ami pei ng’leng ah ka gui ah ami chu gui cu, ng’ya hlü aih ci gui.

⁹ Ashin gui ah phäh ah kei naw kä m’kyuk gui ne ka om khai ma, ashin ah mäih ah pakhui ah khan ah phu kä tuk ah om vai ma?

¹⁰ Ka chang gui ah sapyit ng’shun gui tupit khai ah ga gui ka tüi lawk khai nei, cun ung phi avan kä m’di gui vai nei. Ang ban gui tupit ne ami ghawh vai ah kei naw ka m’thein gui khai, a i ah kyasei ci ung cun ah ng’ban gui cu kei ah kaa ah kä kyak ci nei.

¹¹ Israel la Judah chang gui naw kei cu na ap ci gui nei, kei Bawipa naw ka pyen nei.

Bawipa naw Israel Hnungtuk püi ci

¹² Bawipa ah chang gui naw ani maa na u neta, ami pyen cu, “ani naw akzang ah a i kä bi lawk khai nei, mikmi ung ng’tuk nak la kho a zaw nak kä om khai nei.”

^13-14 Ngami naw ami pyen cu, prophet gui cu a kholä nei, ngami cu khokhi nei, ngami ung Bawipa ah ng’thu kä om ci nei. Bawipa m’gäi ciah Khanpughi naw kei na pyen nak ci.” Jeremiah, shin na chang gui naw shin na müih ah ng’thu ami pyen na phäh ah nang ah m’gawn ung kei ah ka ng’thu cu mei ah mäih ah ka pyang khai nei. Chang gui cu sing ah mäih ah kyak khai gui, ngami cu mei naw ui gui yawp khai.”

¹⁵ Israel chang gui, Bawipa naw a shou nak ah kaa changpakhui tumat cu ning tu gui khai ah law pui ci nei. Cun cu khüighat ciah pakhui phyimah kyak ci, nangmi naw ng’thu kä nami hmat ah pakhui tumat ah kya ci.

¹⁶ Ngami ah likap gui cu m’gäi ciah gakap ah kya u ne, m’gei nak kä om sei ngawn phak ci gui.

¹⁷ Ngami naw nami om ng’awi, nami buh ci ei khai gui; nami htapami gui hta hnumi gui cu ngawn khai gui. Ngami naw nami sei mak, htome mak gui cu ngawn ne ei khai gui, nami sapyit gui la thei gui cu m’di khai gui. Nangmi naw nami ngaih gep ah mang gaw khäng gui cu ami gakap gui naw m’di khai gui.

¹⁸ Bawipa naw pyen ci, “Cun ah kho hüüp gui yah ung phi kei naw ka chang gui cu m’shiu ne kä ka m’di gui khai.

¹⁹ Shin gui avan a i ah kyasei kei naw ka bi ah ami ning shi ah a kyak ung na m’thein gui vai. Jeremiah aw, ngami naw kei na ng’hlah ta u ne, ami mät ah khi ung akho hei khanpughi gui ah bii bik ci gui. Cun ah kyasei ngami cu ami mät ah kaa ah kä kyak ciah kho ung chang khui hei gui ah bii cu bik khai gui.

Khanpughi naw Achang gui M’cäi gui ci

²⁰ Bawipa naw pyen ci. “Jakob ah htangshon gui m’thein gui ä, Judah chang gui m’thein gui ä:

²¹ Ngai vä, gu ang she khak ciah chang gui, nami mik on sei kä nami hmu hning ci, nami hnga om sei kä nami ng’ya hning ci.

²² Kei Bawipa nei, a i ah kyasei kä nami na kyih ang? A i ah kyasei kei ah ma ah kä nami ng’hlet ang? Kei naw tuinu ah khogii nak ah lawigin ka tha ci nei, cun cu ng’täi ciah khogii, ai naw kä a kan hlawt ah kyak ci. Tuinu cu ng’hnawk ci, cun ung phi cun naw kä phlän hlawt ci, tui hnawk cu hmum ci, cun ung phi cun naw kä m’shet hlawt ci.

²³ Cun ung phi nangmi chang gui! Nangmi cu nami m’lung liing ci, nami käknet ci; nangmi naw kei na ng’hlah ta ne, nami na hteh tak ci.

²⁴ Htui kho k’aa, ling kho k’aa ning pe gui ne, akum tä sei geit khäm nak vai ah khin ning pe gui ngä sei phi, kei naw m’tamkhah vai cu kä nami ngaih-tüh ci.

²⁵ Cun nak vaisü ung nangmi ungka shin ah akni gui cu nami katnak naw k’pang yawp ci nei.

²⁶ “Ka chang gui ah ng’lung ah akshe bik ci gui phi ng’caw tuk ci gui, kha pha nak vai ah ng’vai kiung ciah ah mäih ah ngami naw ng’zän ne ngäng ci gui, cun ung phi ngami ah ami cuun cu chang pha nak vai ah kyak ci.”

²⁷ Sa züh ci naw a pemnu kha gui awn a be sak ah mäih ah ngami naw ami im gui cu ami guttep awn be sak ci gui. Cun ah kyasei ngami cu huham mah ne büh mang ci gui.

²⁸ Akni ei aw u ne plan sa ci gui. Akshe ah ami hnun thawh nak ung m’hnüt k’bäi nak kä om ci. Hmei hta gui am ami gah vai ah chaw kä pek ci gui, ami shedam nak gui amtaga nak kä pek ci gui.

²⁹ “Cun ung phi kei Bawipa naw shin gui ah phäh ah ka m’kyuk gui khai; kei naw shin ah changpakhui ah khan ah phu ka tuk khai.

³⁰ Kyihkyawk vai la cäicat vai cu shin ah kho ung kya lawk ci nei:

³¹ Prophet gui naw a i kä pyen ci gui, hleei hlak ci gui; taigü gui naw prophpet gui ah thum khän ah mäih ah uk ci gui, kei ah ka chang gui naw phi kä maa na gui ci gui. Cun ung phi shin gui avan ak hnu hnüüp ung a gawk law ung ngami naw ai bik khai gui ang?”