JEREMIAH 49 - Cho Bible Common Language 2016Ammon ah Khan ah Bawipa ah Ng’thumcha nak 1 Shin cu Ammon ah amawng Bawipa naw a pyen ah kyak ci: “Israel chang gui a hawi ang? Ami khaw ghung khai a u kä om ne ma? A i ah kyasei kat pakhui gui ah khopäng cu molek khawihnah ci gui am khäm sak gui na ami om sak gui ang? 2 Cun ung phi mang gaw tung Rabbah ung om ciah chang gui naw ng’tuk nak ah k’aw ami ng’yak vai ah kei naw bi nak vai ah akhin cu gawk lawk ci nei, cun cu m’di neta, pigaw hta gui cu mei awn m’khih m’deih vai nei. Cun kawn ah Israel gui naw lak pe gui te ciah chang gui ah ka ami khaw cu la ba khai gui nei. 3 Heshbon chang gui, kyap vä! a ih cu m’di pyi ci gui nei! Rabbah hnumi gui thüikyap vä! Sui she sui ne thüisei vä. Ng’gogan ne dawng vä. Nami khanpughi molek cu ak taigü gui la amang hta gui awn atäng ah om ktu ah hteh püi ci gui nei. 4 A i ah kyasei kä nami bekhüt ciah chang gui ami khähghah ang? Nami k’thagui cu ng’kia pyi ci nei. A i ah kyasei nami huham ngaih u ne, a u naw kä ning tu aat gui hlawt khai ah nami pyen ang? 5 Kei naw nangmi ah khan ah akit päng ung kyih vai ka law püi khai nei. Nangmi nami van nami dawng khai nei. Nangmi tumat ci cu nami hnun phiawn püi ne nami dawng khai, nami gakap gui bum ba gui khai tumat phi kä om khai nei. 6 “Cun ung phi kei naw Ammon cu ka bühmang ba sak khai nei, Bawipa naw ka pyen nei. Edom ah Khan ah Bawipa ah Ng’thumcha nak 7 Shin cu Edom ah mawng m’gäi ciah Bawipa naw a pyen ah kyak ci; “Edom chang gui naw nik ciah ami m’kheicha nak gui maih sak u ne ma? Ngami m’shüm thein ciah chang gui naw a i bi vai cicu kä m’thein ba gui u ne ma? Ami cüivai nak avan cu maih yawp ne ma? 8 Sedan chang gui, ng’hlat ne dawng vä, ng’thup vä! kei naw Esau ah htangshon gui cu ka m’di law gui khai nei, a i ah kyasei ci ung ngami ka m’kyuk nak gui vai ah akhin cu gawk lawk ci nei. 9 Chang gui naw sapyit ami k’bih ung ang shun ung api k’pawih nak ci gui, m’guk-ei gui mü ung law u ne ami ng’büh nak vai bäng lak ci gui. 10 Cun ung phi Esau ah htangshon gui cu kei naw ng’pyi khai ah ka ci gui khai, ami ng’thuh ba hlawt khai gui. Edom chang gui ami van m’di gui nei, tumat phi kä pawih ba ci gui nei. 11 Nami hmeihta gui nawng shüt vä, kei naw ka m’htei gui khai. Nami hmeinu gui cu kei ung shungshet u sä. 12 “M’kyuk vai ah kä kyak ciah chang gui hman naw m’kyuk nak ah khap ami awk ah a kyak ung, nangmi cu kä m’kyuk ah nami hteit khai ah nami ngai ne ma? Ka nei, nangmi cu awn ah khap ung nami awk khai nei! 13 Kei ka mät ka ng’taam ci nei, Borah mang gaw cu hmuh vai ah kyihkyawk vai ah kya ne, bung ah kyak khai nei; chang gui naw m’lepse u ne, aming cu plah taam nak ah mang khai gui nei. Apei yung ah pigaw gui avan cu khonglän ung di khai gui nei. Kei, Bawipa naw ka pyen nei.” 14 Kei naw ka pyen ci, “Edom, kei naw Bawipa ah ng’thu cu ka gah ci nei. Ani naw changpakhui gui am ng’thu m’khäh ne chang tüi ne, ami gakap gui ng’bum sak u ne, nangmi ning tuk gui ge vai ah ami om vai ah m’thein gui ci nei. 15 Bawipa naw nangmi cu k’tha ning ken law sak gui khai, a u naw kä ning chang m’sui gui khai. 16 Chang aha nami ng’shei nak naw ning m’hleei hlak gui khai. Chang gui naw nangmi naw ami kyak vai nami ngaih hlawk ah kä ning kyih gui khai gui. Nangmi cu lung song gui ah khan, m’htung hlüng gui ah khan ung nami om khai; cun ung phi nangmi cu hmu ki ung ah mäih ah ah lüng nak ung nami om ung phi Bawipa naw ning yuk cha ba gui khai. Bawipa naw a pyen nei.” 17 BAWIPA naw pyen ci, “Edom ah khan ah gawk lawk khai ah m’dishum nak cu tükyai aih ci kya sei, acun sunpah ci nü cu cat ne kyi aih khai gui. 18 Cun gui la a pei ah gaw nu gui ami m’di law yah ung Sodom la Komorrah ah khan ah a kyak ah mäih ah Edom ah khan ah kya lawk khai nei. Cun ung a ngawi ah phi a u kä om ba khai nei. Kei, Bawipa naw ka pyen nei. 19 Jordan lawng yung bungpuk sing hmu, khu m’kim ung ka lut lawk ciah phong kawng ah mäih ah kei cu law neta, Edomit gui ami khaw ungka ang ghit ah dawng khai gui ah ka ci gui khai. Cun kawn ah kei naw ka ghü ah ang vai gui naw pakhui cu uk khai gui. Kei awn m’täng vai a u om khai ang? Kei na ng’küknet püi khai a u om khai ang? A u uktu naw kei na hnungtuk püi hning khai ang? 20 Cun ah kyasei Edom chang gui hnungtuk püi gui vai ah ka pawng püi cu ngai vä, Teman mang gaw chang gui ung kei naw bi vai ah ka pawng püi phi ngai vä. Ami hta nau gui cu sawkaih gui khai gui, chang nü cu kyi kyawk khai. 21 Edom angkiak ah a kyak ung k’aw akdäm ah ng’ging sei, khomdek khan cu thüng khai, kyah ah k’aw cu Akaba tui ng’khep güt ah ng’yak vai kyak khai. 22 Hmu naw angphia k’phiant ne amtawn ah mäih ah ga gui naw Bozrah cu tuk khai gui. Cun ah hnüüp ung Edom gakap gui cu anau poi m’hneh ciah hnumi ah mäih ah kyi kyawk khai gui.” Damaskas ah Khan ah Bawipa ah Ng’thumcha nak 23 Shin cu Damaskas ah amawng Bawipa naw a pyen ah kyak ci: “Hamath la Arpad mang gaw gui ung om ciah chang gui ng’ä ai ne khüi kha ci gui, a i ah kyasei ci ung ngami naw thushe ami ng’yak ah phäh ah kyak ci. Tuinu ah khan ah tui ang hnawh ah mäih ah ami khan ah kyasei ngami cu kä ng’düm hlawt ci gui. 24 Damaskas ung chang gui cu ami k’tha ken sei kyi ne dawng ci gui. Ngami cu anau poi m’neh ciah hnumi ah mäih ah na sei m’neh ci gui. 25 Zeikiai nak ah ami mang ah ming thang ciah mang gaw cu, bung ah kyak ci nei. 26 Cun ah hnüüp ung ani ah chang nong gui cu mang gaw lam gui ung ngawn gui khai gui, ani ah gakap gui ami van m’di gui khai gui. 27 Kei naw Damaskas gaw k’paang gui cu mei awn ka m’khih khai, a cun naw ghangpughang Benhadad ah mang im gui phi ui khai. Kei, m’gäi ciah Bawipa naw ka pyen nei.” Kedar Pakhui la Hazor Mang gaw Am’khoicha ah Mawng 28 Shin cu Kedar pakhui la hazor naw akpan khopäng, Babilonia ghangpughang Nebukhadnezzar naw akhäm ah mawng Bawipa naw a pyen ah kyak ci; “Kedar chang gui tu gui ne ak kyang täng changpakhui cu m’di vä! 29 Ami phung gui la ami htomak gui, phung ung zihdung gui la phung kyong ah om ci nü cu la vä. Ami kala-uk gui phi la u neta chang gui m’thein vä, “kyihshe ci naw ning koi gui ci nei” cine chang gui kyak na gui vä. 30 “Hazor chang gui, kei Bawipa naw ka ning m’cäi gui ci, ahei ah dawng ne ng’thup vä. Babilonia ghangpughang Nebukhadnezzar naw ning hnungtuk püi gui neta a pyen cu shin ah kyak ci: 31 “Law vä! phiawn nak ngaih gep nak om ci, cik ciah chang gui tu gui vä! Ngami ah mang gaw gui cu m’kawt gui, khai nak gui akni kä om ci, kä khäng htek ciah kyak ci nei.” 32 “Ami kala-uk gui la ami vuhchah gui avan la vä! kei naw ami lu ak tawi ah k’teiu ci gui cu akit päng ung püi pawng sak gui ne, ngami ah khan ah akit pang ung leigau ka law püi khai nei. 33 Hazor cu ngawi yä bung ah kyak khai nei, saui gui bäng ami om nak ah hmun ah kyak khai nei. A cun ung ngawi ah phi a i ka om ba khai nei. Kei, Bawipa naw ka pyen nei.” Elam ah a Khan ah Bawipa ah Ng’thumcha nak 34 Judah ung Zedekiah ghangpughang ah a kyak thai kawn ah Elam khopäng ah mawng m’äi ciah Bawipa naw na pyen nak ci. 35 Ani naw, “Elam Huham ah sak ciah likap gui avan cu kei naw ka ngawn khai. 36 Kei naw akit gui avan ung Elam cu khi khai ah khokhi ka pyang khai ani ah chang dawng gui ah kä gawk nak ah khopäng kä a om ba güt ung ani ah chang gui cu kho nü ung ka püi sak gui khai. 37 Kei naw Elam chang gui cu ngami ngawn gui hlük ciah ami ga gui ami kyih gui vai ah ka ci gui khai. Kei naw Elam chang gui cu dämduh ciah hnungtuk gui khai ah ka gakap gui ka tüi gui khai. 38 Kei naw ami ghangpughang gui la ami ng’vai gui m’di gui ne, acun ung ka mangkiang ka k’süm khai. 39 Cun ung phi angawi ah Elam chang gui cu ka ng’büh mang ba sak gui khai. Kei, Bawipa naw ka pyen ci. |
Cho Bible Common Language © Bible Society of Myanmar, 2016.
Bible Society of Myanmar