JEREMIAH 48 - Cho Bible Common Language 2016

Moab Amdi nak

¹ Shin cu Moab ah mawng m’gäi ciah Bawipa naw a pyen ah kyak ci: “Nebo chang gui cu m’gein gui vä — Ngami ah gaw nu cu di pyi ci nei! Kiriathaim cu tu ne khäm ci gui, m’gäi ciah amang pang cu gäi ci gui, achang gui cu lü ng’aa ci gui nei;

² Moab ah bämang nak cu maih pyi ci. Ga gui naw Heshbon cu tu ne khäm u ne, Moab khui khaw m’di vai ah pawng ci gui nei. Madmen gawnu cu kä shipdeep khai nei; gakap gui kai law ne tuk khai gui nei.

³ Horonaim chang gui cu, “Kiawi m’saa nak, m’dimshum nak!” cine m’lau khai gui nei.

⁴ “Moab cu m’di pyi nei; a hmaw gui ah kyah cu ngai vä.

⁵ Luhith ah hteh nak lam ung ami hngääk gui la Horonaim zu kyum nak lam ung thüi ne ami kyah cu ng’ya vä.

⁶ Ngami naw, ‘Nami ghin hlü ung ang ghit ah dawng vä!’ Bung hmu ah ng’sela ak’zäng ah mäih ah dawng vä!’

⁷ “Moab, nang cu na thagui la na khawh cham na ngaih u ci, cun ung phi tuhbäi nang cu ning hnim khai gui; Nami khanpughi chemosh cu a manghta gui la a taigü gui mah ah omktu khaw ah hteit khai gui

⁸ Gaw nu tumat phi kä di ci kä om khai; khong nawi, khodo avan di khai. Kei, Bawipa naw ka pyen ci.

⁹ Moab ah phäh ah ng’phuh hmun lungtung cu ng’ling vä; cun ah khaw cu di law ge khai nei. Acun ah gawnu gui cu m’di khai gui nei, a u phi cun ung kä om ba khai nei.”

¹⁰ Amlung avan awn Bawipa ah bii kä bik ciah chang cu taam vä! kä tu ne kä ngawn ciah chang cu taam vä!

Moab Mang gaw gui adi ah Mawng

¹¹ Bawipa naw pyen ci, “Moab cu angtäi sei ngaih gep ne om ci, a i yah ung phi omktu ah kä hteh püi man ci gui. Moab cu hlüng tumat ungka naw tumat ung kä lawng ne, kä thäu phung ah sapyit tui ah mäih ah kyak ci. A htang cu kä dip hung ci. A tui cu angtäi sei nik ci.

¹² “Cun ah kyasei tuhbäi, Moab cu sapyit tui ah mäih ah huk khai ah channg ka tüih law nak vai ah akhin gawk lawk ci nei. Ngami sapyit hlüng cu ghawng khai ah ci u ne, khui khai ah cik khai gui nei.

¹³ Israel chang gui naw ami ngaih u ah khanpughi Bethela cu kä ami yum ngak ba ah mäih ah, Moab chang gui cu ami khanpughi chemosh ah khan ah ami yum ngak nak kä om ba khai nei.

¹⁴ “Moab chang gui, a i ah kyasei nami mät cu chang m’gäi gui, ng’tuk näng pyi ciah gakap gui ah nami pyen ang?

¹⁵ Moab la amang gaw gui cu m’di pyi ci gui nei; Ami chang nong kyom gui cu ngawn gui ci gui nei, kei, ghangpughang, m’gai ciah Bawipa naw ka pyen ci.

¹⁶ Moab ah ng’ziin nak cu ng’et lawk ci nei; adi nak cu gawk lawk ci nei,

¹⁷ Acun ah pei ng’leng ung om ci gui, acun ah ming thang hmat ci gui avan, cun ah pakhui khaw ah phäh ah thui sei vä. Pyen vä; ‘Ani ah uknak huham cu she pyi ci nei; abämang nak la amgäi nak kä om ba ci nei’

¹⁸ Dibon ung om ciah nang mi, m’taam nak ah hmun nami om nak ungka kyum law ne, m’dek ung m’vut ung ngo vä; Moab m’di ciah chang cu shin ung om ne, acun ah mang gaw k’pang gui cu m’di pyi ci nei.

¹⁹ Aroer un om ciah nangmi, lam ung düi ne nami ngäng vai; a u gui ami dawng cu nami ng’shi gui vai, ngami ung a i i ah a kyak cu nami k’tä vai nei.

²⁰ “Ngami naw ning m’shan gui khai, ‘Moab cu ng’kiak pyi ci nei, ani ah phäh ah kyap vä, ani cu thüisei ci nei. Moab cu di pyi ci nei ci ne; Arnon tuinu lawng yung ung ng’shäu vä!

²¹ Khohlüng mang gaw gui ah khan ah ng’thumcha nak gawk law pyi ci nei, cun gui cu: Holon, Jahzah, mephath,

²² Dibon, Nebo, Beth Diblathaim,

²³ Kiriathaim, Bethgamula, Bethmeon,

²⁴ Kerioth la Bozrah ah kyak ci. M’khoicha nak cu akshou ang et Moab mang gaw gui avan ah khan ah gawk lawk ci nei.

²⁵ Moab ah m’gäi nak cu ami den pyi nei; ani ah huham cu ami m’di pyi nei. Kei, Bawipa naw ka pyen nei.”

Moab cu Ng’neim sak khai

²⁶ Bawipa naw pyen ci, “Moab cu awktat sak vä, a i ah kyasei ci un gkei ana hnung tuk püi ah phäh ah kyak ci. Moab cu amät ah m’lauk ung ng’hkei khai, chang gui naw gaih tuk khai gui.

²⁷ Moab, nang naw Israel chang gi a i hawkcha na m’lepse nak gui cu shüm ba ä? Gut tep ciah m’guk ei m’bum gui ami pha gui awn m’täng ne na om püi gui ci nei.

²⁸ “Moab ung om ciah nanmi gui, nami gawnu gui cu nawng vä! Lungkheng pang ung hteit ne om vä! Akawk nak un gangbu tu thei cial müm ah mäih kya vä.

²⁹ Moab cu ng’shei aih ci nei. Chang gui a i hlawk ah ng’shei u ne, m’gäi m’cik ne, m’ghämu ne, ami nat naw ami mät a i hlawk ah ami nguih cu kei naw ka ng’yak ci nei.

³⁰ Kei, Bawipa naw ngami ah m’gäi m’cik nak cu ka hmat ci nei. Chang ah ami ng’shei nak cu akholä nei. Ngami ah bi cu kä sho khai nei.

³¹ Jazer ung chang gui ah phäh ah ta Sibmah ung chang gui ah phäh ah kei ka kyap pi khai nei.

³² Sibmah many gaw, nang cu ang ban gui naw Tuiksi tuinu kan ne Jazer ah khüt ciah sapyit ah mäih ah na kyak ci. Cun ung phi tuhbäi khocha ah na m’thein la sapyit gui cu m’di pyi ci gui nei.

³³ Anglei nik ciah Moab ungka yeikyai nak la länlawi nak cu ahei ah hteh püi pyi ci gui nei. Neen nak ungka naw sapyit tui kä long law ba khai ah kei naw ka bik ci nei; sapyit tui pyang ne yei ne m’lau ci tumat phi kä om ba ci nei.

³⁴ Heshbanla Elealeh ung chang gui cu kyap ci gui, ngami ah kyah cu Jahaz ah ka güt naw ng’yak nei; Cun cu Zoar chang gui naw ng’yak ci gui. Hnronaim la Eklath Shelishiyah ah ka naw phi ng’yak nei. Nimrim tui hta phi ket ci nei.

³⁵ Moab chang gui naw ami Khawihnak nak ung m’khin ne ani douthak nak la ami khanpughi gui am khawihnak ami douthak nak cu kei naw ka m’düm khai nei. Kei, Bawipa naw ka pyen nei.

³⁶ “Cun ah kyasei mcab la kir Heres chang gui ah phäh ah kei cu ka thüi kyap ci, cun cu chang tumat naw gook htüm nak ung ami khawh nü avan ng’pyi ci kya khäta tum ne ang ä ah mäih ah kyak ci.

³⁷ Ngami ami van naw ami lu k’teiu u ne ami m’khamu phi k’teiu ci gui. Ngami ami van naw ami kut aat u ne, chang nü naw suishe sui ci gui.

³⁸ Moab gui avan ah im m’kiung khan la chang gui ah ng’bum nak päng ung ahei a i kä om ci, thüikyah nak bäng om ci, a i ah kyasei ci ung kei naw Moab cu a u naw kä a ng’yak hlü ah ka m’shet pyi ci nei.

³⁹ Moab cu ng’pyäuh pyi ci nei! Kyap pyi ci nei! Moab cu thui hmai pyi ci nei. Ani cu di pyi ci nei, a pei ung ah pakhui gui avan naw m’lepse nak ci gui nei. Kei, Bawipa naw ka pyen ci nei.”

Moab Aphyawn nak vai Kä Om ci

⁴⁰ Pakhui tumat naw angphia k’phiaat ciah hmu kiung ah mäih ah Moab cu m’tawn lawk khai nei, cine Bawipa naw shaitak ci nei,

⁴¹ gawn gui la mang pang gui cu tu ne khäm khai gui. Cun ah hnüüp ung Moab gakap gui cu anau poi m’neh ciah hnumi ah mäih ah kyi kyawk khai gui nei.

⁴² Moab cu m’di khai gui, pakhui tumat ah kä kya tu ba khai, a i ah kyasei ci ung kei ana hnungtuk püi ah phäh ah kyak ci.

⁴³ Kyi gui vai, khui gui la cuun gui naw Moab chang gui cu ngäng gui ci gui nei. Bawipa naw a pyen nei.

⁴⁴ Kyihkyawk nak ungka phyawng khai ah k’tha nak ci phung cu khui ung kyak khai, khui ungka kai law ba khai ah k’tha nak ci phung cu gui-cuun gui ung ng’awk khai, a i ah kyasei ci ung Moab ah di nak vai ah a khin cu Bawipa naw am hnüt pyi ah kyak ci.

⁴⁵ Amgein kaa chang dawng gui cu Heshbon ung ng’tungzi khai gui ah k’tha nak ci gui, cun ung phi cun cu mei ah däi ci nei. Ng’tuk vai m’hni ciah Moab chang gui ah ami khogii gui la khomhtung hlüng gui cu mei naw ui pyi ci nei.

⁴⁶ Moab chang gui cu m’gein gui vä! Chemosh khawihnah ci gui cu m’di gui pyi ci gui nei, ami hta pami, hta hnumi gui cu pha ne hteh püi pyi ci gui nei.

⁴⁷ Cun ung phi lawk khai ah hnüüp gui ung Bawipa naw Moab cu bühmang ba sak khai nei. Shin gui avan cu Moab ah khan ah kya lawk khai gui Bawipa naw a pyen ah kyak ci.