JEREMIAH 47 - Cho Bible Common Language 2016

Philistia ah Mawng Bawipa ah Ng’thu pyen

¹ Egypt ghangpughang naw Kazak ä atuk pha ung Philistia ah mawng Bawipa naw na ng’thu püi ci.

² Ani naw pyen ci, “Teng vä! Tui gui cu a siiptäng ah ka tho lawk ci, a cun naw tuinu ah mäih ah ng’güt ne lin lawk khai. Cun naw khaw avan la acun ung om ci ng’nü, mang gaw gui la acun ung om ciah chang gui avan lin khai. Chang gui cu m’htei gui vai ah ng’khü khai gui; khomdek khan ah om ci chang ng’nü aknui ah kyap khai gui.

³ Ngami naw ng’se gui ah kho ng’leh ng’yak khai gui, yatha gui ah ng’kyeet, piing gui ah ng’phiui ng’yak khai gui. Nupa gui naw ami hta hmaw gui cu ng’hlat ne kä teng ba khai gui; Ami kut gui cu ng’gung ne ng’bat khai.

⁴ Philistia m’di nak vai ah akhin gawk lawk ci, Tire la sidon ah ka lawk ciah om ba ciah bawm nak avan cu m’chün pit ci gui nei. Kei, Bawipa naw Philistia gui cu ka m’di khai nei, ngami ami van cu Krete tui kem ung ka lawk ci gui nei.

⁵ Kaza chang gui ah khan ah dämduh ciah azä nak gawk lawk ci, Ashkelon chang gui cu kä ship deep ci gui. Om ba ciah Philistia gui cu a i güt thüi kyap khai gui ang?

⁶ Nangmi naw m’lau u ne, ‘BAWIPA ah khimsem, Nang naw a i güt na tu aat khai ang? Khim käp khui ah lut ba ne a düm ah om mä!

⁷ Cun ung phi ani cu a i cha ng’düm khai ang? Kei naw ka pek ah abi vai om ci nei. Ashkelon la tui kem yung ah om ci gui a tuk vai ah kei naw ka thumkhän ci nei.