JEREMIAH 46 - Cho Bible Common Language 2016

Karchemish ung Egypt naw Ahnim nak gui

¹ Bawipa naw changpakhui gui ah mawng na pyen nak ci,

² Cun cu Egypt ung tün ci. Shin cu Egypt ghangpughang Neko ah gakap gui ah mawng ani naw a pyen ah kyak ci. Cun ah ghangpughang cu Babilonia ghangpughang Nebukhadnezzar naw, Jehoiakim Judah ghangpughang ah a kyak nak akum phli nak ung, Euphratis tuinu pei, kachemish ung a hnim ah kyak ci:

³ “Egypt bawi gui m’lau ci gui, Nami shawi gui m’hnüt ge vä ng’tuk nak ah law ge vä!

⁴ Nami ng’se gui, a gui m’hnüt ne täu sak gui vä! ng’täu ne ng’düi ne, nami lukhu ng’büng vä! nami k’htei gui k’tah ne, nami shawiphaw gui k’bah vä!

⁵ “Cun ung phi a i ang ka hmuh?” cine Bawipa ka ng’shik ci. “Ngami cu kyih nak vai täng ah ng’hlat ci gui nei. Ami gakap gui ami m’ghuih gui nei; kyih nak awn ami näng gui nei, ngami cu ami dawng hningah dawng ci gui nei. Ami hnu ah kä mang ba ci gui nei.

⁶ Akgai ah dawng cicu ashou nak ah kä gawk hlawt ci; gakap gui kä laut hlawt ci gui. Asiip täng, Euphratis ung ngami cu ng’täng ne kyuk ci gui.

⁷ A u ang, Nile tuinu ah mäih ah let lawk ci, Tuikam ung be ne long ciah tuinu ah mäih ah kyak ci?

⁸ Nile tuinu ah mäih ah let ne, Tuikam be sei long ciah tuinu ah mäih ah kyak ci. Egypt naw pyen ci, “Kei cu tholet ne khomdek khan ka küm khai; kei naw mang gaw gui la acun ung om ciah chang gui cu ka m’di khai.

⁹ Thumkhän vä, ng’se gui cu hteit u sä yatha gui ng’phiui u sä! Gakap gui tüi vä: Sudan la Libya ung chang gui shawi kawt ci gui, Lydia ung likap thei gui!”

¹⁰ Shin cu m’gäi ciah uktu Bawipa ah hnüüp ah kyak ci nei; tuh ngawi ani naw phu tuk khai; tuh ngawi ani naw aga gui m’kyuk khai nei. Ani ah khimsen naw abe güt ung ei gui khai, a kyä güt ah ami si aw gui khai nei. Tuh ngawi m’gäi ci naw a ghuh ng’tha nak vai awn khawihnah ci nei. Asiip täng Euphratis ung ah kyak ci nei.

¹¹ Egypt chang gui, Kilead ah hteit ne shei gui shui vä! Nami shei gui avan cu mang vai kä kyak ci, a u phi kä gai sak ci nei.

¹² Pakhui gui naw nami lü ng’aa cu ng’yak ci gui; nami kyah cu chang nü naw ng’yak ci. Gakap tumat cu ahei gakap ah khan ah kai ci, ani nik hnih m’dek ung kya lawk ci goi.

Nebukhadnezzar Alaw ah Mawng

¹³ Egypt tuk khai ah Babilonia ghangpughang Nebukhadnezzar a law sangung Bawipa naw thu na pyen nak ci. Ani naw pyen ci,

¹⁴ “Shin cu Egypt gawnu gui, mikdola, Memphis, la Tahpanhes ung ng’shäu vä: “Nami mät naw nami shung vong ge khai ah om vä; Nangmi ung om ci avan ng’tuk nak ung di khai nei!

¹⁵ A i ah kyasei m’gäi ciah nami khanpughi Apis azung kyak ang? Bawipa naw ani cu that ci nei!”

¹⁶ Nami gakap gui cu ng’vawn u ne kyu ng’ täng ci gui nei; Tumat la tumat ng’pyen na tuk ci gui, ‘Ang ghit ah! Mi chang gui ah im ah mi hteit khai cun kawn ah ga gui ah khimsem mi phiawn nak khai nei!’

¹⁷ “Egypt ghangpughang cu ming k’thai pe vä — ‘Pamcai ciah chang, ak chaw nawng ci.’

¹⁸ Kei cu m’gäi ciah Bawipa, ghangpughang. Kei cu ghing ciah khanpughi. Tabor m’htung cu m’htung gui ah khan ah ang tai ah mäih, Karmela m’htung cu tuinu ah khan ah a hlüng ah mäih ah, tumat ah k’tha mah nak naw ning tuk gui khai.

¹⁹ Thawng kium ah nami kiak khai ah om ge vä, nangmi Egypt chang gui! Memphis cu khong gau ah kyak sak ne di ne a u ah kä om nak ah kyak khai nei.

²⁰ Egypt cu plan ciah seipat ah mäih ah kyak ci, a siiptäng ah ka k’pi gui naw tu lawk ci gui nei.

²¹ Ani naw ang vah ah gakap gui cu am gein kaa ah kyak ciah seihta ah mäih ah kyak ci gui nei. Ngami cu kä ng’düi hlawt, kä ng’tu hlawt ci gui; ami van ng’hlat ne dawng ci gui. Ami ng’ziin nak ah hnüüp, ami di nak ah akhin cu gawk lawk ci nei.

²² Ga gui ah gakap gui naw ami k’et law gui ung Egypt gui cu k’phyu ah mäih ah shiik ne dawng ci gui nei. Ngami naw ani cu ghei awn tuk ci gui, chang naw sing ghing gui chu ne,

²³ bung ak shah nu amdi ah mäih ah kyak ci. Ami chang gui cu khei vai ah da aih ci gui; ami gakap gui cu khanpeh ah mäih ah kä khei tai vai kyak ci.

²⁴ Egypt chang gui cu lung aa sak gui ci; ngami cu a siiptäng ah chang gui naw näng gui ci gui. Kei, Bawipa naw ka pyen ci.”

²⁵ M’gäi ciah Bawipa Israel khanpughi naw pyen ci, “kei naw Amon, Thebes gui ah khanpughi cu, Egypt gui ah khanpughi gui la ghangpughang gui awn atäng ah ka m’kyuk khai. Kei naw Egypt ghangpughang la ami yum ciah chang gui avan cu la ne,

²⁶ ngami ngawn hlü gui ciah Babilonia ghangpughang Nebukhadnezzar la a gakap gui am ka ap gui khai. Cun ung phi a ngawi ah, ng’pyi pyi ciah akhin ung ami om man ah mäih ah chang gui cu Egypt ung om ba khai gui. Kei, Bawipa naw ka pyen ci.”

Bawipa naw Achang gui Hun gui khai

²⁷ “ka chang gui, kä kyi vä, Israel chang gui kä cäicat vä. Cän ah shou ciah khaw, thawng nami kium nak ah khaw ungka, kei naw ka ning gung gui khai nei. Nangmi cu im ah law ba ne ding gei sei nami om khai; nangmi cu ngaih gep ne nami om khai, a u naw kä ning kyihkyawk sak gui khai.

²⁸ Kei cu nangmi ah law ne ka ning hun gui khai. Kei naw ka ning püi pyang sak nak gui ah pakhui khaw avan cu kei naw ka m’di gui khai. Nangmi cu kä m’kyuk ah kä ka ning hteh sak gui khai; cun ung phi kei naw ka ning m’kyuk gui ung akdei dang ah bik khai. Kei, Bawipa, naw ka pyen nei.”