JEREMIAH 43 - Cho Bible Common Language 2016

Jeremiah Egypt ah Ami Hteh püi ah Mawng

¹ Bawipa ami khanpughi naw ka m’thein gui vai ah ana pek gui phang cu chang gui am m’thein ne ka ng’pyi ci.

² Cun kawnah Hoshaiah ah hta, Azariah, kareah ah hta Johanan la ahei m’gäim’cikciah chang avan naw na pyen nak ci gui, “Nang na hleei ci. Egypt khaw ah kä kami hteh vai ah na na m’thein gui khai ah Bawipa mi khanpughi naw kä ning tüi lawk khai.

³ Keimi na na hnung tuk püi gui khai ah Neriah ah hta Baruk naw ning m’tho let ci nei, cun ah kyasei Babilonian gui naw keimi ah khan ah huham mah u ne, keimi na ngawn guihning ci gui.” Cik ci gui.

⁴ Cun ah kyasei, Johanan, käcung gabawi tumat mat käung chang tumat naw phi Judah khaw ah k’pawih shüt vai ah Bawipa ah thumkhän ngai ci kä om ci nei.

⁵ Cun kawn ah Johanan la gakap bawi gui ami van naw Judah ung om shüt ci ng’nücu Egypt ah hteh püi ci gui, ngami awn atäng ah ami püi pyang nak ah kho ah ka law baci gui ah chang avan phi hteh püi ci gui.

⁶ Cuu gui cu pami gui, hnumi gui, a hmaw gui la ghangpughang ah hta hnumi gui ah kyak ci. Gabawi Nebuzaradan naw Kedaliah naw a htei vai ah anawng pek ah chang nü, Baruk la kei mah ah na hteh püi gui ci gui.

⁷ Ngami naw Bawipa ah thumkhän kä ngai u ne Egypt khaw Tahpanhes mang gaw ah khüt ne hteit ci gui.

⁸ Acu ah Bawipa naw ana pyen nak cu,

⁹ Lung am kawm gui amshah la neta, düma khan ung, acoyah im ah valuh nak ah im hmai lam, shin ah mang gaw ung phuh vä. Cun ah na bi cu Israel chang gui naw gui naw hmu tu u sä.

¹⁰ Na m’thein gui vai, Kei, M’gäi ciah Bawipa, Israel khanpughi ka changshäm Babilonia ghangpughang Nebukhadnezzar cu shin ah hmuh ung ka law pui khai, ani naw nang naw na k’phuh ah shin ah lung ah khan ah amang kiang tha ne, acun ah khan ah mang phung nu cu küm khai.

¹¹ Nebukhadnezzar naw law ne Egypt cu hnim khai. Cun ah chang gui gawp yam nak ung sik khai gui cu, gawpyam ne sik khai gui, pha ne ami hteh püi gui vai cu pha ne hteh püi khai gui, ng’tuk nak ung ami ngawn vai gui cu ng’tuk nak ung ngawn gui khai gui.

¹² Kei naw Egypt khan pughi gui ah Taigüim cu mei awn ka m’khih khai, Babilonia ghangpughang naw ami khanpughi gui cu m’khih bawk khai, hteh püi bawk khai. Htome sham naw asuisak ung hli m’chah atheing sak ah mäih ah Babilonia ghangpughang naw Egypt khaw cu theing sak ne, näng nak awn nawng shüt khai.

¹³ Ani naw Egypt khaw Heliopolis ung lung tung theing gui cu m’di ne Egypt khanpughi gui ah Taigüim gui phi m’khih khai.”