JEREMIAH 42 - Cho Bible Common Language 2016

Jeremiah naw ak Taigü pek gui vai ah Chang gui naw K’thäh ci gui

¹ Gakap bawi gui ami van, Kareah ah hta Johanan la Heshaial ah hta Azariah gui cu ang bum päng ung chang gui awn law u neta

² kei cu na pyen nak ci gui, “Na bä ni, kami k’thäh cu na bi pe gui ä! Bawipa kami khanpughi ah keimi ah phäh ah na tai gü pe gui ä. Kami k’pawih ba ci avan ah phäh ah na k’taihü pe gui ä, Cau läi kami da man te ci; tuhbäi api hta kami k’pawih lawk ci, na hmuh ah mäih ah kyak ci.

³ Bawipa kami khanpughinaw kami hteh nak vai ah lam la kami loi lawh vai cu ana m’hnuh gui vai ah na taigü pe gui ä.”

⁴ Kei naw m’shang gui ne, “Bä khai, Bawipa, mi khanpughi ah nami k’thäh ah mäih ah ka ning taigü pe gui khai, ani naw a pyen phung cu ka ning m’thein gui khai. A i phi nangmi am kä ka ning m’zih gui khai.” Ka cik ci.

⁵ Cun kawn ah ngami naw ami na pyen nak cu,” mikmi ah phäh ah Bawipa mi khanpughi naw aning pek gui ah thumkhän avan cu kä mi läk ah a kyak ung, mikmi ana hnugtuk püi nak gui ung Bawipa cu düng ci la bekhüt ciah saksi ah kya sä.

⁶ Keimi kä ana yei sak gui ung phi, ana yei sak gui ung phi keimi naw k’thäh u ngä sei na k’taigü nak ah Bawipa mi khanpughi cu kami ngai khai nei. Ani kami ngaih ah a kyak ung keimi ah khan ah avan cu bä khai nei.”

Jeremaih ah Taigü Bawipa ah M’than nak

⁷ Hnüüp gha lung khata Bawipa naw na ng’thu püi ci;

⁸ Cun ah kyasei Johanan khata Bawipa naw na ng’thu püi ci; ahei chang gui avan cu a täng ah ka khü gui ci.

⁹ Kei naw ka pyen nak gui cu,” Nami k’thäh nak awn kei nami na tüih nak ah Bawipa, Israel khanpughi naw pyen gui ci.

¹⁰ Nangmi cu shin ah khaw ung nami om lä vai nami ng’yak hlü ah a kyak ung, kei naw ka ning colcyang gui khai, kä ka ning m’shet m’kat gui khai kei naw ka ning geif gui khai, kä ning mawi gui khai. Nangmi ah khan ah ka law püi ah dishum nak naw kei cu ak däm ah na azä sak ci nei.

¹¹ Babilonia ghangpughang cu kä kyih ba vä, kei naw ka ning om püi gui ci nei, ani ah huham ung kei naw ka ning gung gui khai nei.

¹² A i ah kyasei ciung kei ung chimgein nak om ci, nangmi ah khan ah chimgein nak a om vai ah ani cu ka pyang khai, cun kawn ah nami im ah ka ning hteh ba sak gui khai. Kei, Bawipa naw ka pyen ci,’

^13-15 Cun ung phi Judah ung nami om ba ciah chang gui naw Bawipa nami khanpughi ui kä nami om vai, shin ah khaw ung om rai ah kä nami maa en vai. “Ka nei kei mi hteit ne Egypt ah kami om khai, au ah ng’tuk nak kä kami aut ba khai, ng’tuk nak ah ng’khii kä Ng’zak ba vai, ei ah kä cawi ba vai” cine kä nami pyen un vai. Cun ah nami pyen ah a kyak ung, m’gäi ciah Bawipa, Israel khanpughi naw pyen ci, “Nangmi cu hteit ne Egypt ah om vai ah nami ling ah a kyak ung,

¹⁶ Nami kyih ah ng’tuk nak naw ning k’phaa law gui khai, nami kyihkyawk ah ei cawi nak naw ning läk law gui khai, nangmi cu Egypt ah nami sik khai,

¹⁷ Egypt ah hteit ne om vai ah ling ciah chang avan cu ng’tuk nak ung baw, ei cawi ne baw, gaw pyan ne baw sik khai. Tumat phi kä k’pawih ba khan, Ngami ah khan ah kei naw ka law püi ah lei gai cu tumat naw phi kä phiawn nak khai.’

¹⁸ Bawipa, Israel khanpughi naw pyen ci, “Kei ah ka m’lungshe nak la ka nget ngawn nak naw Jerusalem chang gui a shawi gui ah mäih, Egypt ah nami hteh ung läi nami khan ah ka nget ngawng nak naw ning shawi gui khai nei. Nangmi ui a teng she ah nami kyak khai; Chang gui naw ning giah m’gin gui ne, nami ming cu plah taam nak ah mang khai gui. Nangmi naw shin ah hmun cu kä nami hmu tu ba khai.”

¹⁹ Kei naw k’täi ne, “Egypt ah kä hteit ne Judah khaw ung nami om shüt ciah chang gui am Bawipa naw ning m’thein gui ci nei. Cun ah kyasei kei naw tuhbai ka ning k’bai gui ci,

²⁰ nangmi cu aktung ah nami hma ci, nangmi ah hmawk ah Bawipa mi khanpughi ah tiagü vai ah nami na K’thäh ci, ani naw ang thumkhan phung nami bik kai ah phi shai nami tak ci.

²¹ Tuhbäi dei naw ka ning m’thein gui ci, cun ung pi Bawipa mi khanpughi naw na tüi sei ka ning m’thein gui nü cu kä nami läk ci.

²² Cun ah kyasei shin cu shüm ba vä; nangmi hteit ne nami om nak hlü ah khaw päng ung ng’tuk nak, ei cawi nak la gawpyan nak awn nami sik khai” cik ci.