JEREMIAH 41 - Cho Bible Common Language 2016

¹ Acu kum acha chih nak ung Ishmaela, Nethaniah ah hta Elishama ah tu, mang ah kyong khui ungka, ghangpughang ah bawi ng’vai gui ungka tumat ah kyak ci naw chang sing gha khah püi ne kedaliah hmuk khai gui ah mizpah ah hteit ci gui. Ngami ami van naw ei van ne atäng ah ami ei yah ung,

² Ishmaela la chang sing gha naw ami sem phawng u ne. Kedaliah cu ngawn ci gui.

³ Ishmaela naw Israel gui mizpah ung kedaliah awn om ci gui ami van la acun ung om ciah Babilonian gakap gui cu ngawn gui ci.

⁴ A ngawi ung, Ketaliah ami ngawn a u naw kä a hmat pha ung.

⁵ Shechem, Shilon la Samaria ah ka chang cheit kip gawk lawk ci gui. Ngami cu ami m’kha mu k’tei u ne, ami sui k’teek u ne, ami sa phi aat ci gui. Ngami naw püi ci gui.

⁶ Ishmaela naw ngami hmu gui khai ah mizpah ah ka naw hteit ci, ani cu lam ung a hteh ah pum kyap ci. Ngami ah law neta ani naw a pyen cu, “Nami bü ni, law ne kedaliah cu teng law vä.”

⁷ Ngami mang gaw kyong ah ami om yah ung Ishmaela la a chang gui naw ngawn gui u neta, ami pumsa cu tui shawk ung shum ci gui.

⁸ Cun ung phi chang sing gha ng’bum ci gui naw Ishmaela ami pyen nak cu,” Nabä ni, kä na ngawn gui ä! Keimi ung cung htang, barli, olive-situi la khoitui lo ah kami thuh om ci nei, cik ci gui, cun ah kyasei ani naw m’hlawt gui ci.

⁹ Ishmaela naw angawn ah chang gui ah pumsa gui a thun nak ah tuishawk cu ng’kawm ci, cun cu Israel ghangpughang Baasha naw a tuk law yak ung Ghangpughang Asa naw a cawh ah kyak ci. Ishmaela naw tuishawk cu chang gui ah pum awn be sak ci.

¹⁰ Cun kawn ah ani naw ghangpughang ah hta hnumi gui la mizpah ung om ciah chang avan cu pha gui ci, ngami cu kedaliah naw am htei gui vai ah gabawi Nebuzaradan naw atha te ah kyak ci. Ishmaela naw cun gui cu pha gui neta Ammon khopäng täng ah hteh püi gui ci.

¹¹ Johonan la gakap ang’vai gui ami van naw Ishmaela naw cheishoh ne abi gui cu ng’ya u neta,

¹² ami chang gui awn a hnu ah läk law u ne kibeon ung tui k’büm nu pei ah k’pha ci gui.

¹³ Ishmaela ah chang phaa gui naw Johanan la gabawi ng’vai gui cu hmu u neta, ngami cu yei ci gui,

¹⁴ ngami ah om nak ah ng’hlat ne dawng lawk ci gui.

¹⁵ Cun ung phi Ishmaela la achang cheit cu Johanan hmu heta dawng u ne Ammun khaw lam ah phyawng ne hteit ci gui.

¹⁶ Johanan la gabawi gui naw, mizpah ung kedaliah a ngawn kawn ah Ishmaela naw pha ne alaw pui gui cu m’htei gui ci gui-cun gui cu gakap gui, hnumigui, ak hmaw gui, la hnumi m’htei ci gui ah kyak ci.

^17-18 Ngami naw Babilonian gui cu kyih gui ci gui, a i ah kyasei ci ung Babilonia ghangpughang naw khaw uktu ak a tha ah kedaliah cu Ishmaela naw a ngawn ah phäh ah kyak ci. Ngami cu Babilonian gui ami phiawn nak vai ah Egypt ah hteit ci gui. Lam ah ngami cu Bethlehem ah pei, Chimham ung ng’dümci gui.