JEREMIAH 40 - Cho Bible Common Language 2016

Jeremiah cu Kedaliah awn Atäng ah Om ci goi

¹ Ramah ung gabawi Nebuzaradan naw a na luat sak awn ah Bawipa naw ng’thu na pyen püi ci. Kei cu m’sii gui awn na khit u ne Jerusalem la Judah ah ka pha ne Babilonia ah ami hteh püi gui awn atäng ah na hteh püi ci gui.

² Gabawi naw kei cu na khii hnga neta a pyen cu, “Bawipa na khanpughi naw shin ah khaw cu m’dikhai ah m’kyihkyawk ci,

³ tuhbäi ani naw abi vai a pyen cu bik ci nei. Shin gui avan cu kya lawk ci, a i ah kyasei ci ung na chang gui naw Bawipa hnugtuk püi ne kafnak bi u ne, ani cu kä ngai ci gui.

⁴ Tuhbäi na kut m’hnak ungka gui k’phian ne ka ning hlawf khai. Nang cu Babilonia ah kei awn atäng ah na hteh tu hlü ah a kyak ung na htät tu hning ci, kei naw ka ning m’htei htang khai. Kä na hteh tu hlü ah a kyak ung phi kä na hteit tu hning ci. Nang cu khopäng avan ung na yum nak ah na hteit hning ci,” ci ah kyak ci.

⁵ Kei naw a i ah phi kä m’shang ne om ngäta, Nebuzaradan naw pyen ci, “Kedaliah, Akikam ah hta, Shaphan ah tu ah hteit ba ä ani cu Babilonia ghangpughang naw Judah gawnu gui uk tu ah atha ah kyak a nei. Nang cu ani awn atäng ah om ni ne chang gui ah ng’lung ah om tu ä, kä cung na hteh nak hlü ah na hteit hning ci nei.” Cun Kawn ah ani naw laksawng la m’htut cu ka hteh püi vai ah na pe ne, ka hteh nak hlü ah ka hteh vai ah na hteh sak ci.

⁶ Kie cu mizpah ah hteit ne kedaliah awn atäng ah om tu ne, can ah khan ung ami nawng shüt gui ah chang gui ah ng’lung ah ka om ci.

Kedaliah, Judah Khaw Uk tu

⁷ Judean bawi gui la gakap gui amshah cu ami kut kä chan ci gui. Babilonia ghangpughang naw Kedaliah cu khaw uktu ah tha ne, Babilonia ah kä ami hteh püi gui avan uk sak ci cia ng’yak ci gui-ngami cu cun ah khaw ung akdu pikbäih gui ah kyak ci.

⁸ Cun ah kyasei Nethaniah ah hta Ishmaela, Kareah ah hta Johanan, Tanhumeth ah hta Seraiah, Netophah ah Ephai ah hta gui la maakah ah ka Jezaniah gui cu ami chang gui mah mah ah Mizpah, Kedaliah ah hteit ci gui.

⁹ Kedaliah naw pyen ah gui ci, “Kei naw ng’thu ka ning bäi gui ci. Babilonian gui ah ma ah nami kut nami chah vai ah nami kyih ba vai kä hlü ba ci nei shin ah khaw ung khäng ne om vä, Babilonia Ghangpughang ah abii bi vä cun ung nangmi ah khan ah apäng avan cu nik khai nei

¹⁰ kei ka mät phi mizpah ung ka om khai, shin ung Babilonian gui ami law ung kei cu nangmi ah hnün ung ka ng’düi khai nei. Nangmi cu sapyit tui, sing theih gui la oliv-situi gui m’sep ne bum ne nami pigaw gui ung om vä.”

¹¹ Cun sang ung, Israel gui ami van, moab, Ammon, Edom la ahei khopäng gui ung om ci gui naw, Babilonian ghangpughang naw Israel om shah gui cu Judah khaw ung om sak gui ne, ami uk tu ah Kedaliah cu tha ci, cicu ng’yak ci gui.

¹² Cun ah kyasei ami päi pyang nak ah hmun gui cu nawng shüt u ne Judah khaw ah ng’hlat law ba ci gui. Ngami cu mizphung kedaliah hteit ah u neta acu ah ngami naw sapyit tui la sing theih akda ah m’sep ci gui.

Kedaliah Ami Ngawn

¹³ Cun kawn ah Jonanahla gakap ami ng’vai gui, kut kä chah Ciah chang gui cu kedaliah ah mizpah ung law u neta,

¹⁴ ani ami pyen nak cu, “Ammon ghangpughang Baalis naw nang ning ngawn khai ah Ishmaela a tüih law cu kä nah mat ne ma? Cun ung phi Kedaliah naw kä yum ci.

¹⁵ Cun kawn ah Johan naw adüm ah ani am a pyen nak cu, ‘Kei naw adüm ah hteit ne Ishmaela cu ka ngawn khai, a u naw a ngawn ah kä ng’hmat khai nei. A i ah kyasei nang ning ngawn khai ah ani ami bi sak ang? A cun naw Jew chang gui avan ning k’buui ne om ci gui cu püi pyang sak gui khai nei, awn naw Judah ung ami nawng shüt ah chang avan ah khan ah phi lei gai gui law püi khai nei.”

¹⁶ Cun ung hi kedaliah naw, “Kä na bi vai! Ishmaela ah mawng nang naw na pyen cu kä ci nei!”