JEREMIAH 39 - Cho Bible Common Language 2016

Jerusalem Angkyak ah Mawng

¹ Zedekiah, Judah ghangpughang ah a kyak nak ah akumkaw nak a cha gha nak ung. Babilonia ghangpughang Nebukhadnezzar naw agakap gui avan awn law ne Jerusalem cu tu lawk ci.

² Zedekiah ghangpughang ah a kyak nak akum ghalei at nak a cha phil nak ah a hnüüp kaw hnüüpung, mang gawk pang ung ngai ci.

³ (Jerusalem cu ami khäm kawn ah Babilonia ghangpughang ah bawi ng’var gui ami khäm kawn ah Babilonia ghangpughang cun cu Nerkala Sarezer, Samkar Nebo, Sarsechim la ahei Nerkala mah mah ah kyak ci.)

⁴ Ghangpughang Zedekiah la agakap gui aran naw cun gui cu hmu u neta mang gaw ungka phyawng khai gi ah khomii ung k’tha nak ci gui. Ngami cu mang ah dun täng ung hteit u ne, m’kawt lam k’pang gui ah angcä ung hteitne phyawng ne Jordan khongnawi täng ah phyawng ne hteit cu gui.

⁵ Cung ung phi Babilonian gakap gui naw k’täm law u ne Zedekiah cu Jerikho khudo pei ah phak ci gui. Cun kawn ah ngami naw ani cu Ghangpughang Nebukhadnezzar ah hteh püici gui ani cu Hmah khopäng Riblah mang gaw ung om ci, acu ah Nebukhadnezzar naw ng’thumcha nak bik ci.

⁶ Riblah ung ani naw Zedekiah ah hta gui cu Zedekiah ah hmuh ah sih nak pe gui ci, Judah bawi gui phi ngawn gui ci.

⁷ Cun kawn ah Zedekiah ah mik gui cu kawih pen eta guiawn khit he babilonia ah hteh püi vai ah tha ci.

⁸ Cun sangung Babilonian gui naw bawi mang im la Chang gui ah im gui cu m’khih u ne, Jerusalem mang pang cu gäi ci gui.

⁹ Ak hnu ah gabawi Nebuzaradan naw mang gaw ung ami nawng shüh gui la ani ah dawng lawk ci gui awn atäng ah pha gui ne Babilonia ah hteh püi gui ci.

¹⁰ Du aih ciah Chang gui, khawh kä tak ci gui cu ani naw Judah khar ung nawng shüt gui ne lo gui la sapyit lo gui cu pe gui ci.

Jeremiah ah laut nak

¹¹ Cun ung phi Ghangpughang Nebukhadnezzar naw gabawi Nebuzaradan cu thumkhän ne, Shin ah ng’thukbäi apeik gui vai ah pyen ci.

¹² “Hteit ne Jeremiah hmu neta ak ni ah m’hter ä. Akna ah kä na bi vai, cun ung phi angyak hlü phang nami bi pek vai.”

¹³ Cun ah kyasei Nebuzaradan cu bawi ng’vai gui ah kyak ciah Nebushazan, la Nerkala Sarezer la ahei Babilonia ghangpughang ah bawi gui avan law u ne,

¹⁴ mang im kyong ung ah na hteh püi ci gui. Ngami naw Kedaliah, Ahikam ah hta, Shaphan ah tu naw na m’htei ne phyawng ne im ah ka gawk ba vai ah m’htei sak ci gui. Cun ah kyasei kei cu chang gui ah ng’lung ah ka om tuk ci.

Ebedmelek ah Ngaih u nak

¹⁵ Kei cu mang im kyoug ah thawng ung ka kium yah ung Bawipa naw na m’thein ci,

¹⁶ m’gai ciah Bawipa, Israel khanpughi ah pyen cu Sudanese chang Ebedmelek am ka m’thein vai ah kyak ci, “Kei naw ka pyen ah mäih ah ka bik khai kei naw shin ah mang gaw ah khan ah kikap nak la kä bämang nak cu ka law püikhai. Cun gui a kyak yah ung nang naw a cu ah om me na hmuk khai.

¹⁷ Cun ung phi kei, Bawipa naw ka ning shung vong gui khai, nang mi cu, nangmi naw nami kyih gui ah chang gui am kä ningap gui khai gui.

¹⁸ Kei naw ka ning phiawn sak gui khai, nangmi cu sih nak kä ning pe gui khai gui. Nangmi cu nami hnun gui phyawng khai, a I ah kyasei ci ung nang mi naw kei nami na ngaih a ci. Kei, Bawipa naw ka pyen nei.”