JEREMIAH 38 - Cho Bible Common Language 2016

Tui kä Om ciah Tuishawk ung Jeremiah Gawk ci

¹ Mattan ah hta Shephantiah, Pashhur ah hta kedaliah, shelemaih ah hta Jehulcala, malachiah ah hta Pashur gui naw kei naw chang gui ka m’thein gui cu ng’yak ci gui.

² Kei naw ka m’then gui ah Bawipa naw a pyen ah ng’thu cu,” mang gawpyam nak ung sik khai. Cun ung phi akpung ah hteit ne Babilonian gui ah ma ah a kut chah ci phung cu kä ngawn khai gui; ngami cu ani hnun ghin nak läi cu phyawng khai gui”

³ kei naw Bawipa ah pyen ka m’thein gui cu, “Kei naw mang gaw cu Babilonian gakap gui am ka pe lawk khai, ngami naw khäm lawk khai gui.”

⁴ BAWI gui naw ghangpughang ah hteit neka ami pyen cu, “shin ah chang cu ngawn vai nei. Shinah mäih ah ng’thu pyen ne ani naw mang gaw kyong ah gakap gui cu k’tha ken sak ci. Ani naw chan gui m’htei gui vai ah a i kä bik ci, cmi nat nak vai vah ng’ya hlük ci.”

⁵ Ghangpughang Zedekiah naw m’shang gui ne, “Bä khai nei, nami ng’yak hlü ah ani ah khan ah bi vä; kä ka ning maa na gui khai nei” cik ci.

⁶ Cun ah kyasei ngami naw kei cu na hteh püi u ne, hui awn manghta malachiah ah tui shawk ung na yuk chah ci gui, cun cu mang im väng kyong ah om ci. Tuishawk kyong ah tui kä om ci, ng’ä bäng om ci, kei cu ng’ä ung ka lut ci.

⁷ Ehtiopian chang, Ebedmelek, bawi mang im ung hnumi uk ci naw, kei tuishawk ung ami na yuk chak cu ng’yak ci. Cun ah akhin ung ghangpughang cu Benjamin m’kawt ung yung bii bi ne om ci.

⁸ Ebedmelek cu acu ah hteit neta ghangpughang ah ma ah a pyen cu,

⁹ “Ka bawi aw, shin ah chang gui naw ami bi cu hma ci nei. Ngami naw Jeremiah cu tuishawk ung tha ci gui, ani cu ei ah cawi ne akcang ah sik khai nei, cun sangung mang gaw kyeng ah ei vai kä om ci.”

¹⁰ Cun kawn ah ghangpughang naw Ebedmelek am ng’thukbäi sei, Chang thum khü ne, kei kä ka sih pha ung tuishawk ungka na zu chang tu ba ci gui.

¹¹ Ebedmelek cu chang gui awn mang im m’kümkhan kyong ah hteit neta, k’pyon gui la neta, gui awn na yuk chak lawk ci.

¹² Ani naw k’pyon cu ka chak ka ah, gui naw kä ana shat vai ah ka tha vai pyen sei, acun ah ka bik ci.

¹³ Ngami naw tui shawk ungka na zu chaang tuba ci gui. Cun kawah kei cu mang im väng kyong ah na om sak a gui.

Jeremiah ah M’cäi m’ä nak Zedekiah naw K’thäh Ci

¹⁴ Amawng ahei awn Ghangpughang Zedekiah naw Taigüim luh nak akthum nak ung na hteh püi neta ana pyen nak cu,” kei naw ka ng’ya hlük ci,” ciah kyak ci.

¹⁵ Kei naw m’shang ne, “Kei naw akcang ka ning m’thein ah a kyak ung nang naw sih nak na na pek khai, kei naw ka ning m’cäi m’ä ch a kyak ung nang naw a i ah kü na na sui khai’ ka cik ci.

¹⁶ Cun ah kyasei ghang pug hang Zedekiah naw adüm ah shai tak ha pek ci, “Kei cu ghing ciah khanpughi ah kyak ci, kei naw sih nak kä ka ning pek khai, käcung nang ning ngawn hlük ciah chang gui am kä ka ning ap khai.”

¹⁷ Cun kawn ah kei naw Zedekiah am ka m’thein cu, M’gäi ciah Bawipa, Israel Khanpughi naw pyen ci, “Nang cu Babilonian ghangpughang ah bawi gui ah ma ah na kut na chah ah a kyak ung, nang cu na ghing khai, shin ah mang gaw phi mei awn kä m’khih khai gui. Nang la na kyongchang avan nami ghing khai.

¹⁸ Cun ung phi nang naw na kut kä na chak ah a kyak ung shin ah mang gaw cu Babilonian gui am ap khai gui, ngami naw m’khih khai gui, nangmi phi kä nami phyawng khai.”

¹⁹ Ghangpughang naw m’shang ne, “Babilonian gui ah dawng ci gui ah mi khochang gui cu kei naw ka kyih gui ci nnei. Ngami ah kut ung kei cu ami ap ah a kyak ung na dukdeiu nak khai gui nei.”

²⁰ Kei naw pyen ne, “Nang cu ngami am kä ning ap khai gui nei. Bawipa ah ng’thu na ngaih vai ah ka ning m’cäi ci nei; cun ung avan cu bä khai, nang ah ghin nak phi phyawng khai nei.

²¹ Cun ung phi nang naw kut chah vai ah na maa ah a kyak ung a i ah kya lawk khai ci cu, Bawipa naw ka muimang ung na m’dang ci nei.

²² Cun ung kei naw ka hmuh cu, Judah bawi mang im ung k’pawih ciah hnumi gui aran cu Babilonia Ghangpughang ah bawi gyi ah hteh püi gui khai gui nei. Ngami ami hteh sangung ami pyan cu ngai vä: ‘Ghangpughang cu am hni pi ah ateih püi gui naw m’hleei hlak u ne, ani cu ukmit ci gui. Tuhbäi akhaw gui cu ng’nai ung lut ci nei, ateihpüi gui naw nawng ci gui nei.”

²³ Cun kawn ah kei naw m’khah ba ne, “Na hnumi gui la na htanau gui cu Babilonian gui naw hteh püi guikhai gui, na mät phi ngami ah kut ung kä na phyawng khai. Nang cu Babilonia ghangpughang naw pha ne ning hteh püi khai, shin ah mang gaw cu m’dek ung gawk khai ah m’khih khai gui.”

²⁴ Zedekiah naw m’shang ne, “shinah thum’gawn ah mawng cu chang tumat naw phi kä hmat en sä, nang ah ghin nak ung kyih vai kä om khai nei.

²⁵ Nang awn ni ng’htam bawi gui naw ami ng’yak ah a kyak ung, mikmi naw a i mi pyen ah law ne ning shi lawk khai gui. Angnü na m’thein gui ah a kyak ung sih nak kä ning pek vai cine phi shaitak khai gui.

²⁶ Nang cu acu ah na sik khai kyasei, thawng ung kä ning chum ba vai ah na na ng’paa nak ah mawng bäng na m’thein gui vai.”

²⁷ Cun kawn ah bawi gui ami van law ne na ng’shi lawk ci gui, kei naw ghangpughang naw ka pyen vai ah ana m’cäi bä ah kam’thein gui ci. Ngami naw ai phi kä bi hning ci gui, a i ah kyasei ci ung cun ah ng’htan gui cu a u naw phi kä ng’ya tuk ci.

²⁸ Cun kawn ah kei cu Jerusalem ami khäm güt mang im väng ung na tha ci gui.