JEREMIAH 37 - Cho Bible Common Language 2016

Zedekiah naw Jerimiah Angzoih Thäh nak

¹ Babilonia Ghangpughang Nebukhadnezzar naw Jehoiakimah hta Jehoiachin ah hnün ung Josiah ah hta Zedekiah cu Judah ghangpughang ah hmoh ci.

² Cun ung phi Zedekiah, abawi gui la chang gui naw Bawipa naw ana pek ah ng’thu cu kä läk ci gui.

³ Ghangpughang Zedekiah naw Shelemiah ah hta Jehukala la marseiah ah hta Taigü Zephaniah cu kei ah tüi law ne, mi pakhui ah hnün ung om ne, Bawipa, mei khanpughi ah tai gü vai ah ng’shi thäh law sak ci

⁴ Cun sangung kei cu thawng ung kä ka kyu phak ci, chang gui ah ng’lung ah ang päize ah ka hnün tho ci.

⁵ Cunzah ung Babilonian gakap gui naw Jerusalem cu khaai ci gui, ngami naw Egyptian gakap gui naw Egypt khawgii kan ne kai lawk ci gui cicu ng’ya u neta, ng’hlat ba ci gui.

⁶ Cun kawn ah Bawipa, Israel khanpughi naw ana m’thein

⁷ Zedkiah ka pyen nak vai cu, “Egypt gakap gui cu nang ning bawm khai gui ah kai lawk ci gui,’ Cun ung ami im ah ng’hlat ba khai gui.

⁸ Cun kawn ah Babilonian gui law ba u ne, mang gaw tuk khai gui, khäm khai gui, m’khih khai gui.

⁹ Kei, Bawipa naw ka ning thukbäigui cu, Babilonian gui kä law ba khai gui cine ngai ne, nami mät naw nami mät kä nami m’hleei en vai nei, a i ah kyasei ci ung ngami cu law ba khai gui nei.

¹⁰ Nangmi naw Babilonian gakap avan nami hnim ah a kyak ung phi leim ci gui bäng om ba ne phung kyong ah ami ng’zän ung phi, cun ah chang gui cu tho law ba u ne shin ah mang gaw cu m’dek ah khüt khai ah m’khih khai gui nei.”

Jeremiah Pha ne Thawng ung Chum ci gui

¹¹ Babilonian gakap gui cu Jerusalem ungka naw ng’hlat ba ci gui, a i ah kyasei ci ung Egyptian gakap gui ami ng’lat law ah phäh ah kyak ci.

¹² Cun ah kyasei tün ne Jerusalem nawng shüt ne Benjamin khopäng ah hteit ne ka kyong khui khawh cu ka ng’pai tuk khai ah kyak ci.

¹³ Cun ung phi kei, Benjamin m’kawt ung ka gawk law yak ung, acun ung ng’vaipi ne bii bik ciah gakap gui ah ami bawi Irijah ming nak ci, Shelemiah ah hta, Hananiah ah tu naw ng’düih sak neta, “Nang cu Babilonian chang gui täng ah na dawng ci nei!” cik ci.

¹⁴ Kei naw m’shang ne, “Cun ah kä kyak ci nei. Kei kä ka dawng vaisü ung ani naw kei naw pha netah bawi gui ah na htet püi ci.

¹⁵ Ngami cu anghtei ah m’lungshe u neta, kei cu na tuthat u ne, yung secretary Jonathan ah im ung na üp ci gui, cun ah im cu thawng ah pyang ci gui.

¹⁶ Kei cu m’dek ka akhan kyong ah na tha ne aksho na chum ci gui.

¹⁷ Cun kawn ah Ghangpughang Zedekiah naw na la law tuneta manu im kyong ah adüm ah ana ng’shi cu, “Bawipa ah ng’thu a i baw om naw?” Kei naw, “om ci nei,” cineta ka m’khah ba cu, “Nang cu Babilonia ghangpughang am ning ap khai gui.”

¹⁸ Cun kawn ah ka ng’shi cu, “Nang naw kei thawng ung na na chum vai ah nang, na bawi gui la shin ah chang gui hnungtuk gui ne kei naw a i katnak ang ka bi?

¹⁹ Nangmi la nami khaw Babilonia ghangpughang naw kä tu lawic khai nei, cik ci gui ah na prophet gui cu a i ah ang ami kiak?

²⁰ Tuhbäi ka bawi aw, kei cu na ngai ne ka ning thäh cu na bi vai ah ka ning paa nak ci nei. Nabäni, Jonathan ah im ung thawng kä na chum en ba ä, na na chum ba ung, a cu ah ka sik khai nei.”

²¹ Cun ah kyasei ghangpughang Zedekiah naw Ebäi ne mang im kyong ah na khai shi ci. Kei a cu ah om ngä sei, mang gaw ung m’htut avan kä angpyi pha ung m’htut ami yoih nak ah kaa naw a hnüp tä sei m’htut pum ät ci na pe lawk ci gui.