JEREMIAH 36 - Cho Bible Common Language 2016

Baruk naw Taigüim Kyong ah Ca K’chaw Phat ci

¹ Josiah ah hta Jehoiakim Judah Ghangpughang ah a kyak nak akum phli nak ung, Bawipa naw na pyen nak ci,

² Ca k’chaw cu la neta Israel la Judah ni, pakhui avan ah mawng kei naw ka ning m’thein gui cu na guk vai. Josiah ghangpughang ah a kyak law yah ung ak htük ah kei naw ka ning thu püi ah a khin ung tün ne tuk bäi ung khüt ciah kei naw ka ning m’thein gui nü nü cu na guk vai.

³ Ngami ah khan ah kei naw ka law püi vai ah ka pawng püi ah m’dishum nak gui avan cu Judah chang gui naw ami ng’yak ung, ami shetkat nak ungka ng’hlat tei law ba hman khai gui aw. Cun ung ami cheishoh nak la ami katnak gui cu kei naw ka m’geinsei gui khai.”

⁴ Cun ah kyasei Neriah ah hta Baruk cu naw avan ca k’chaw ung guk ci.

⁵ Cun ung phi cun kawn ah chang m’shüm thein nak gui cu Baruk am ka pek ci; “Kei cu Taigüim ah hteh vai ah kä ka gah ba ci.

⁶ Cun ung phi cun kawn ah chang gui naw ei ami hlawi ba ung nang na hteh vai ah kei naw ka ng’ya hlük ci. Nang naw ca k’chaw cu m’lau ne na phat vai, cun ung chang gui naw Bawipa naw ana pyen nak nü la nang am m’cu ne ka ning m’thein cu ng’yak khai gui. Ami pigawnu gui ah ka lawic ciah Judah chang gui mah mah ah chang nü naw ang yak vai ah na bi vai.

⁷ Ngami cu Bawipa ah k’taigü u ne akshe ami bi nak ungka naw ng’hlat tei law hman khai gui, ciah kyasei ci ung Bawipa naw a chang gui cu kyih vai kyak ciah amlungshe nak la a nget nak awn om püi gui ci.”

⁸ Baruk naw Bawipa ah ng’thu cu Taigüim kyong ah, kei naw ka m’thein ah mäih bä ah phat ci.

⁹ Jehoiakim, Judah ghangpughang ah a kyak nak, kum hma nak ah a cha kaw nak ung chang gui naw Bawipa ah m’kuum nak gah vai ah ei hlawi ci gui. Ei hlawi nak cu Jerusalem ung om ciah chang avan la Judah khaw gawnu gui ungka lawk ci gui ami van naw bik ci gui.

¹⁰ Chang gui ami van naw ami ngaih sang ung, Baruk naw ca k’chaw ung om ci nü kei naw ka pyen nak phung cu phat ci. Ani naw cun cu Taigüim kyong, Shaphan ah hta Kemariah, yung secretary ah a khan ung abi ah kyak ci. Ani ah khan cu ak khan khan kyong Taigüim, m’kawt thai luh nak ah pei ung om ci.

Bawi gui ah Ma ah Ca K’chaw Phat ci

¹¹ Mikaiah, Kemariah hta, Shaphan ah tu naw la k’chaw ung Bawipa ah pyen gui Baruk naw a phat cu ng’yak ci.

¹² Cun kawn ah ani cu Bawimang im ah kyong, yung secretary ah a khan, bawi gui ami van ah ng’bum nak ah hteit ci. Elishama yungbawi Shemaiah ah hta Delaiah, Achbor ah hta Elnathan, Shaphan ah hta Kemariah, Hananiah ah hta Zedekiah la bawi gui ami van cu a cu ah om ci gui.

¹³ Baruk naw chang gui ah ma ah a phat angyak gui nü cu Makaiah naw m’thein gui ci.

¹⁴ Bawi gui naw Jehudi (Nethaniah hta, Shelemiah ah tu, Kushi ah tu k’phyim) cu tüi ne, Baruk naw chang gui ah ma ah a phat ah ca k’chaw cu a law püi vai ah m’thein sak ci gui. Baruk naw ca k’chaw cu ani ah om nak ah law püi ci.

¹⁵ “Ngami naw,” Ngo yä, ca k’chaw cu keimi ah ma ah phat ä” ci u sei, Baruk naw phat ci.

¹⁶ Ani naw a phat kawn ah, ngami cäi u ne ng’teng tu u neta, Baruk cu pyen nak ci gui, “Keimi naw shin cu ghangpughang am kami m’thein khai.”

¹⁷ Cun kawn ah ngami naw ani cu ng’shi u ne, “Tuhbäi na m’thein gui ä, shin gui avan cu a i hawkcha ah ang na guk? Jeremiah naw ning pyen pe ne ang? cik ci gui.

¹⁸ Baruk naw m’shang gui ne, “Jeremiah naw la ca ng’lung päng cu na pyen pek ci, kei naw shin ah ca k’chaw ah khan ah hmin awn ka guk ci” cik ci.

¹⁹ Ngami naw ani pyen ah u ne, “Nang la Jeremiah cu hteit ne na ni ng’thuh vai. Nangni a hawi nani om cu a u naw kä a hmat en vai nei.”

Ca K’chaw cu Ghangpughang naw Mei awn M’khih ci

²⁰ Bawi gui naw ca k’chaw cu yung secretary Elishama ah a khan ah tha u neta, ghangpughang ah kyong ah hteit u ne, apäng nü cu ghangpughang am m’thein ci gui.

²¹ Cun kawn ah ghangpughang naw Jehudi cu tüi ne ca k’chaw cu lak sak ci. Ani naw Elishama ah a khan ah kah la neta ghangpughang la ani vei ne ng’düi ci gui bawi gui avan ah ma ah phat ci.

²² Cun cu khaw sik khaw ah kyasei ghangpughang cu khawsik mang im ung mei ma na ne ngok ci.

²³ Jehudi naw päk thum päk phili vai phat khäta, ghangpughang naw khim hta awn kiük ne mei ung k’cawm ci. Ani cu cun ah ca k’chaw mei naw a uih yawp güt acun ah cik ci.

²⁴ Cun ung phi ghangpughang la bawi gui acun ng’yak ci gui cu, a i ah phi ami kyihkyawk nak, ami ayä nak kä m’dang ci gui.

²⁵ Cun ung phi Elnathan, Delaiah la Kemariah ni naw ghangpughang naw ca k’chaw mei awn kä am khih vai ah ng’paa nak ci gui, cun ung phi ani naw a i ah kä sui gui ci.

²⁶ Cun kawn ah ani naw ng’thukbäi ne, manghta Jerahmeela cu Azriel ah hta Seraiah la Abdeel ah hta Shelemiah awn atäng ah kei la ka secretary Baruk cu na pha gui khai ah tüi gui ci. Cun ung phi Bawipa naw keimi cu na thup gui ci.

Jeremiah naw Ahei Ca K’chaw Gu ba ci

²⁷ Kei naw Baruk am ka m’cu pek ah ca k’chaw ghangpughang Jehoiakim naw amkhih kawn ah Bawipa naw ana m’thein cu,

²⁸ ahei ca k’chaw la ba ne, akhtük ah ca k’chaw ung om ci gui cu gu ä,

²⁹ Bawipa naw ghangpughang ka pyen nak vai ah ana m’thein cu “Nang naw ca k’chaw na m’khih ci, a i ah kyasei Babilonia ghangpughang naw law ne, shin ah khaw cu m’di ne, cun ung chang gui la khisa gui cu ngawn gui khai, cine a guk ah Jeremiah cu na ng’shik ci.

³⁰ Cun ah kya sei, tuhbäi kei, Bawipa naw nang ka ning pyen nak ci, ghangpughang Jehoiakim, nang ah htangshon a u naw phi David ah uknak khaw cu kä uk khai nei. Na gook cu hnüüp ung khaw ng’ling ne khomü ung khüi ah toi nak ung ghawh vai nei.

³¹ Kei naw nang, na htangshon gui la na bawi gui cu ka m’kyuk gui khai, a i ah kyasei ci ung cun cu nami van ch katnak ah phäh ah kyak ci. Nang la Jerusalem la Judah ung chang gui naw kei ah thukbäi cu a i ah kä nami sui ci gui. Cun ah kyasei nangmi ka ning m’kyin nak gui ah leigai cu nami van ah khan ah ka law püi khai.”

³² Cun kawn ah kei naw ahei ca k’chaw cu la ne ka secretary Baruk am ka pek ci, ani naw kei naw ka m’cu nü cu guk ci. Akhtük ah ca k’chaw ungka gui nü phi ani naw guk ci, awn ah mäih gui kei naw ka m’cu pek gui phi ani naw guk ci.