JEREMIAH 35 - Cho Bible Common Language 2016

Jeremaih la Rechabit gui

¹ Josiah ah hta Jehoakim cu Judah ghangpughang ah akiak sang ung Bawipa naw na pyen nak ci,

² Rechabit pahta gui ah om nak ah hteit neta ng’thu püi gui ä. Cun kawn ah Taihü im kyong akhan tumatung law püi gui neta sapyit tui pe gui ä.”

³ Cun ah kyasei kei naw Rechabit pahta kyong chang gui cu la gui ne — Jauzaniah la a hta gui avan cu —

⁴ Taigüim ah ka hteh püi gui ci. Kei naw ngami cu Igdaliah hta prophet Hanan ah ng’düih püi tumat ah ak khan ah ka hteh püi gui ci. Cun ah akhan cu aküikyang ah cawi kyak ci, chei bawi gui ah akhan gui pei ung

⁵ Kei naw sapyit tui be ciah khap gui la k’am gui cu Rechabit gui ah pei ah than eta, ka pyen nak gui cu,” sapyit tui api ah aw vä,”

⁶ Cun ung phi ngami naw, “Keimi sapyit tui kä kami awk ci nei kami pupa Rechab ah hta Jonadab naw na m’theingui ci, keimi la kami htangshon gui naw sapyit tui kä ka mi awk vai ah pyen ci.

⁷ Im kä kami cawh vai, lo kä kami bi vai, sapyit kä kami geit vai, dä kami khleih vai ah phi na m’thein gui ci. Angtäi sei phung ung kami om vai ah ani naw na thumkhän gui ci, cun ah kyasei shin ah khawung keimi cu chang lam k’hteit ah mäih ah kami om ci.

⁸ Jonadab naw ana pek gui ah m’shümthein nak avan cu keimi naw kami ngai ci. Keimi kami mät naw sapyit tui kä ka mi awk ci, kami chu gui, kami htapa gui, kami hta hnumi gui a u naw phi kä awk ci.

^9-10 Kami un nak vai ah im kä kami kaa kä om ci. Keimi naw kami pupa Jonadab ah na ng’thumkhän gui ang nü nü cu keimi naw akbe ah kami läk ci.

¹¹ Cun ung phi Ghangpughang Nebuchadnezzar naw mi khawpäng a tuk law yah ung, Babilonian la Sirian gakap gui phiawn nak ah Jerusalem ah hteh vai ah kami k’bäi ci. Cun ah kyasei keimi Jerusalem ung kami om ah kyak ci.”

^12-13 Cun kawn ah m’gäi ciah Bawipa, Israel khanpughi naw htet be, Judah la Jerusalem chang gui ka pyen nak gui vai ah na m’thein ci: “Kei, Bawipa naw, ka ning shik ci, c i ah kyasei kei na ngaih vai la kei ah m’shüm thein nak läk vai ah nami ma ang.”

¹⁴ Jonadab htangshon gui naw, sapyit tui kä awk vai ah ani ah thumkhän cu ngai ci gui, tuh ngawi güt ung a u naw phi kä awk ci gui. Cun ung phi kei naw k’pang ne ning thu püi gui ngä sei phi, nang mi naw kä nami ngai ci.

¹⁵ Kei naw k’täi ne ka changshäm prophet gui avan ka ning tüih law gui ci, ngami naw akshe ah nami htet nak nawng ne ng’düng ci nami loi vae ah ning m’thein gui ci gui. Ngami naw ahei khanpughi gui kä sei nangmi cu nangmi la nami pupa gui am ka pek ah khaw ung hteit ne nami om.” Cun ung phi nangmi naw kä nami na ngai ci, ai ah kä na nami sui ci.

¹⁶ Jonadabah htangshon gui naw ami pupa ah pek ah thumkhän cu läk ci guim cun ung phi nangmi naw kei kä na nami na ngai ci.

¹⁷ Cun ah kyasei kei, m’gäi ciah Bawipa, Israel khanpughi naw nangmi Judah la Jerusalem ah khan ah kei naw ka shaitak ah dishum nak avan cu ka law püi khai. Kei naw cun cu ka bik khai, a i ah kyasei ci ung kei naw ka ning thu püi gui kä ngai u ne, ka ning khügui ung kä nami äi ci.”

¹⁸ M’gäi ciah Bawipa, Israel khanpughi ah pyen cu kei nak Rechabit pah ta gui am kam’thein gui ci, “Nangmi naw nami pupa Jonadab naw aning pek gui ah thumkhän cu nami ngai ci; nangmi naw ani ah m’shümthein avan nami läk ci, ani ah ning

¹⁹ Cunah kyasei kei m’gäi ciah Bawipa, Israel khanpughi naw shaitak ka bi cu Rechab ah hta Jonadab ah htangshon ung angtäi sei kei ah bii bik khai pami ah ng’shon khai.”