JEREMIAH 33 - Cho Bible Common Language 2016

Ngaih u vai Kyak ciah Ahei Shaitak

¹ Kei cu mang im väng kyong ah thawng ka kium yah ung Bawipa ah ng’thu cu gawk law ba mä ci.

² Bawipa, khomdek pyang ci, m’hnüm neta a hmun ung k’süm ci naw na ng’thu püi ci. Bawipa ming nak ci naw pyen ci,

³ “Na khü vä, ka ning m’shang gui khai; nangmi naw kä nami hmat ah cäicat vai ah chüula ciah amawng cu ka ning m’thein gui khai.

⁴ Kei, Bawipa, Israel khanpughi naw ka pyen ci, Jerusalem ung im gui la Judah ung bawi mang im cu khai ne ami tuk ah phäh ah sheka yawp khai

⁵ Am shah gui naw Babilonian gui cu ng’tuk püi khai gui, ngami naw im gui cu kei naw ka m’lungshe nak la ka nget ngawng nak awn ka ngawn sheh gui ah a hook gui awn be sak khai gui. Kei naw shin ah mang gaw cu ka ng’hlah tak ci, a i ah kyasei ci ung awn ung om ciah chang gui naw akshe ami bi ah phäh ah kyak ci.

⁶ Cun ung phi shin ah mang gaw la lun chang gui cu kei naw m’tui m’seih gui khai, ami gai vai ah ka m’tho ba gui khai. Kei ah bä aik ciah deeih nak la ngain gep nak ka m’dang gui khai.

⁷ Kei naw Judah la Israel cu ka bühmang sak gui khai, a zan kaa ah mäih ah ka cokyan ba gui khai.

⁸ Kei na hnungtuk püi ne ami katnak gui cu ka m’si pe gui khai, ngami ah ami katnak la ami hnungtuk nak cu kei naw ka m’gein sei gui khai.

⁹ Jerusalem cu kei ah phäh ah yeikyai nak, m’tamkhah nak la ng’häh leh nak ah a phung ak kyak ci; Jerusalem chang gui ah phäh ah akni ka bi nak ah mawng cu, khomdek khan ah pakhui päng naw ami ng’yak ung kyi ne ng’hlet khai gui.”

¹⁰ Bawipa naw pyen ci,” Shin ah hmun cu bung puk ah mäih ah kyak ci, chang la khisa a i phi kä om ci. Ngami hman ci gui; Judah khaw ung gawnu gui la Jerusalem ung lam gui cu a ghawng ah kyak ci; cun ung chang la khisa a i phi kä om ci. Cun ung phi shin ah hman ghi ung

¹¹ Zeikiai nak, hüithaw nak, hta m’um pawi ung yeikyai nak gui nami ng’zaba khai. Chang gui naw m’hlüngtai douthak nak kei ah Taigüim ah law püi ne ng’äi ami m’cu cu nami ng’yak khai; Ngami naw pyen khai gui, ‘M’gäi ciah Bawipa cu m’hlüngtai vä, a i ah kyasei ci ung ani cu nik ci, am hni nak cu ng’langtäi ci.’ Kei naw shin ah khaw cu a cau kaa ah mäih ah bühmang khai ah ka pyang khai, kei, Bawipa naw ka pyen nei.

¹² M’gäi ciah Bawipa naw pyen ci, ‘Bunghmu ah mäih ah kya ne, chang la khisa gui ah kä om nak ah shin ah khaw cu htoshäm gui naw ami htome gui ami chah nak vai ah khulim khaw ah kya ba khai.

¹³ Khaw gui yung ah gaw nu gui, m’htung nawi gui, Judah khaw a htum täng, Benjamin khopäng, Jerusalem ah pei yung ah pi gaw gui la Judah gawnu gui ung htoshäm gui naw ami htome gui cu khei ba khai gui nei kei, Bawipa naw ka pyen nei.”

¹⁴ Bawipa naw pyen ci, “Israel la Judah chang gui am kei naw ka bi ah shaitak cu, kei naw ka be sak nak vai ah akhin gawk lawk ci nei

¹⁵ Cun ah akhin ung kei naw David ah düng ciah htangshon cu ghangpughang ah ka ghü khai nei. Cun ah ghangpughang naw düng ci la taga cicu khaw avan ung bik khai nei.

¹⁶ Judah Chang la Jerusalem chang gui cu gun gui vai, ngami cu phiwng ne om khai gui. Cun ah mang gaw cu, “Na hunphiawn gui ciah BAWIPA” ciah khü khai gui

¹⁷ kei, Bawipa naw shai ka tak cu, David ah htangshon cu angtäi sei, Israel ghangpughang ah kyak khai,

¹⁸ levi pakhui ungka cu angtäi sei taigü ah kyak khai, ngami ka nii ni ne m’khih-douthak, htang-douthak la khawihnah nak gui cu douthak khai gui.”

¹⁹ Bawipa naw na pyen nak ci,

²⁰ “Kei naw mü la hnüüp pum ung thukhän ka bik ci, cun ah kyasei ami khin a gawk law päng ung ngami lawk ci gui; cun ah thukhän cu kä she hlawt khai nei.

²¹ A cun ah mäih ah kei naw ka changshäm David ung thukhän ka bik ci, angtäi sei ani ah htangshon cu ghangpughang ah kyak khai, levi pakhui taigü gui ung phi thukhän ka bik ci, ngami naw angfäi sei dab ii bik khai gui; cun ah thukhän cu kä shekak khai.

²² Ka changshäm David ah htangshon gui cu ka da sak gui khai, Levi pakhui taigü gui cu ka da sak gui khai, cun ah kyasei ngami cu Khankhomik ung aisi gui la tuinu kem ah laigin ah mäih ah kä khei tai vai ah kyak khai gui.”

²³ Bawipa naw na pyen nak ci,

²⁴ “Kei naw ka ghü ah Israel la Judah kyong khui goi cu, kei naw ka hnungtuk püi gui ciah chang gui naw ami pyen cu nah mu ng’ya man naw? Cun ah kyasei ngami naw ka chang gui cu a i ah kä sui une, changpakhui ah phi kä ngai law ka ci gui,

²⁵ Cun ung phi kei, Bawipa ung amü a hnüüp thukhän om ci, khomdek la khankhaw k’pang khai ah thukhän ka pyang ci.

²⁶ Kei naw shin ah ka bi cu ang hteicha ah maih ah kei naw Jakob ah htangshon la ka changshon David ah htang shon ung ka bi ah thukhän cu htei cha khai ah ka bik khai kei naw David ah htangshon ungka tumat cu ka ghü kaai, ani naw Abraham, Issak la Jakob ah htangshon gui cu uk khai, Kei naw ka chang gui cu chimgein gui ne, ka ng’bühmang ba sak gui khai,”