JEREMIAH 32 - Cho Bible Common Language 2016Jeremiah naw Khaw Thong ci 1 Zedekiah Judah ghangpughang ah a kyak nak akum gha nak ung Bawipa naw na ng’thu püi ci, cun cu Babilonia ung Nebukhadnezzar ghangpughang ah a kyak nak akum gha lei cheit nak ah phi kyak ci. 2 Cun yah cu Babilonia ghangpughang ah gakap gui naw Jerusalem ami tuk yah ah khin ah kyak ci, kei phi cun yah ung mang im ah väng kyong ah ami na chum ah kyak ci. 3 Ghangpughang Zedekiah naw acu ah kei cu thawng ung na chum ci. Bawipa ah ng’thu pyen ka ng’shäu ah pyen ne nak bün ci: “kei naw Babilonia ghangpughang am shin ah mang gaw ka khäm sak khai, 4 ghangpughang Zedekiah cu kä piawng khai. Ani cu Babilonia ghangpughang am ap khai gui; ani naw ani cu hmai chum ne hmu ne, amät naw ng’cecäk püi khai. 5 Zedekiah cu Babilonia ah hteh püi khai gui, kei naw kä ka om püi pha ah chuih ani cu a ra om khai. Ani naw Babilonian gui cu a tuk gui ung phi kä näng hlawt khai. Kei Bawipa naw ka pyen nei.” 6 Bawipa naw na m’thein ci, 7 ka pukhaw, shallum ah hta Hanamela cu kei ah law ne, Benjamin khopäng Anathoth ung khaw bung cu kei naw ka hleih vai ah na k’thäh lawk ci, a i ah kyasei ci ung kei cu ani ah ang et pikbäih amät yah ah kya ne, ka kaa vai ah ka hleih hning ciah kyak ci. 8 Acun ah Bawipa naw a pyen ah mäih ah, Hanamela cu mang im väng kyong ah kei ah law ne, khaw ka hleih ah kei na ng’thu püi ciah ka hmat ci. 9 Kei naw Hanamela ah khaw cu hleih ne ngui khin ne ka pek ci; a phu cu ngui phe gha leo chih ah kyak ci. 10 Kei naw cagu ne saksi ah ma ah gune m’hnüt neta, ngui cu khin ne ka pek ci. 11 Kei naw hleih nak ah ca guk ani-nik hnih kyak ciah — ng’khleih nak ca guk ung m’hnüt ah ca guk acun ah mawng la kä m’hnüt cu la neta — 12 Baruk, Neriah ah hta, mahseiah ah tu am ka pek ci. Kei naw cun gui cu ani am, Hanamela, hleih nak ah ca guk ung m’hnüt nak gu tuk ciah saksi gui la cun ah im väng ung ngo tuk ciah chang gui ah ma ah ka pek ci. 13 Kä cun pha ung kei naw Baruk ka pyen nak ci, 14 “m’gäi ciah Bawipa, Israel khanpughi naw ng’thu ning k’bäi ci, hleih nak ah ca guk, m’hnüt ah ca guk la kä m’hnüt, ani nik hnih na lak vai, cun kawn ah m’dek hlüng ung na tha vai, cun cu khokum akda ung khäng khai. 15 M’gäi ciah Bawipa, Israel khanpughi naw im gui, lo gui la sapyit lo gui cu shin ah khaw ung hleih bam ä vai nei, cine pyen ci. Jeremiah ah K’taigü 16 Kei naw khaw hleih nak ah ca guk cu Baruk am ka pek awn ah kei cu ka taigü ci, 17 “Uk ciah Bawipa, nang naw khomdek la khankhomik cu dämduh ciah na huham la na m’gäi nak awn na tüipiang ci; nang ah phäh ah a i phi kä khak ci. 18 Nang naw ng’täi ciah na m’hni nak cu chang phia khak am na m’dang ci, cun ung phi chang gui ami nupa ah katnak ah phäh ah nang naw na m’kyuk gui ci. Nang cu dämduh ne huham ah ciah khanpughi ah na kyak ci, nang cu m’gäi ciah Bawipa ah na kyak ci. 19 Nang naw cüi vai nak awn pawng m’htein ne m’gäi ci gui na bik ci; nang naw chang nü ah bi na hmuk ci, ami mät ah hnün thawh ah ciah nang naw na m’cü mhnah gui ci. 20 Cau pui nang naw Egypt khaw ah cäicih gui vai la cäicat gui vai vu na bik ci, nang naw na bi gäk gäk ci, cun ah kyasei tuhbäi ung nang khaw nü ung ning hmat ci gui. 21 Cäi-aih nak gui vai la cäicat nak gui vai awn mi ga gui cu kyihkyawk sak gui ne, nang naw na chang gui Israel gui Egypt khaw ah kaa law püi ba nak gui vai ah na huham la na m’gäi nak cu na mang ci 22 Nang naw shin ah naming ne anglei nik ciak khaw cu pe gui ne ami pupa gui am shaitak nak na nik ci. 23 Cun ung phi ngami shin ah khaw ung law ba u ne, shin ami kaa hak awn ah ngami naw nang ah thumichän kä ngai ci gui, na m’theithang ah mäih ah kä om ci gui; nang naw ami bi vai na pyen cu ngami naw kä bik ci gui. Cun ah kyasei ngami ah khan ah shin ah m’dishum nak avan cu na law püi ah kyak ci. 24 “Babilonian gui naw shin ah mang gaw tu ne khäm khai gui ah khui gui veing ne co ne khai u ne tu lawk ci gui nei. Ng’tuk nak, ei cawi nak la gawpyam nak naw shin ah mang gaw cu ngami ah kut ung ng’kiak sak khai nei. Nami van naw nami pyen gui abä law cu nangmi naw nami hmuhning ci nei. 25 Cun ung phi uk ciah Bawipa, mang gaw cu Babilonian gui naw tu ne khäm lawk cang khai gui ah kya pang sei phi saksi gui ah ma ah khaw ka thon vai ah nang naw thu nak bäi ci nei.” 26 Cun kawn ah Bawipa naw kei cu na pyen nak ci, 27 “Kei cu Bawipa, hnicim chang avan ah khanpughi nei. Kei ah phäh ah khak aih ci a i kä om ci. 28 Kei naw shin ah mang gaw cu Babilonia ghangpughang Nebukhadnezzar la a gakap gui am ka pe lawk khai nei, ngami naw tu ne khäm khai gui, 29 mei awn m’khih khai gui chang gui naw im m’cung khan ah Baala am tui ng’ui m’khin ne, ahei khanpughi gui am sapyit tui douthak ne kei ami na m’lungshe nak sak ah im gui mah mah ah m’khik khai gui 30 Israel chang gui la Judah chang gui ah ami shonlam ava tüi nak ge ung tün ne ngami naw kü na yei na u ne, ami bilawh gui awn kei cu nam lungshe sak ci gui. 31 Shin ah mang gaw ung om ciah chang gui naw shin ani cawh ah hnüüp ge ung na m’lumg shene m’lung na sou sak ci gui. Kei naw shin cu m’di vai ah ka k’bäi ci, 32 ciah kyasei ci ung Judah la Jerusalem chang gui, ami ghangpughang gui la ami ng’vai gui, ami taigü gui la prophet gui naw ami bi ah shetkat nak gui avan ah phäh ah kyak ci. 33 Ngami naw kei na hnu nak ci gui; Cunung phi kei naw ka m’theithang gui ci, ngami naw kä ngai ci gui, kä ng’thei ci gui. 34 Ngami naw kei na khawihnah nak vai ah cawh ah Taigüim ung m’shem shai ciah a gup gui cu tha ci gui, Taigüim cu lelawi sak ci gui. 35 Ngami nan Hinnom Khongnawi ung Barla am sonkiang cawh pek ci gui, cun cu malek khanpughi an ami htapami hta hnumi gui ami khawihnah nak vai ah kyak ci. Shin ah ani bi vai ah kei naw thumkhän kä ka bi man ci, ngami naw shin ah mäih ah bi ne Judah chang gui katnak bi sak gui khai ah kä ka ngai man ci.” Ngaih u nak Shaitak 36 Bawipa, Israel khanpughi naw na pyen nak ci,” Jeremiak, chang gui naw pyen ci gui, ng’tuk nak, ei cawi nak la gawpyam nak naw shin ah mang gaw cu Babilonia ghangpughang ah kut ung ng’kiak sak khai nei. Tuhbäi kai naw ka ning pyen nak gui phung nami ngaih rai nei. 37 Kei naw ka m’lungshe nak la ka nget ngawn nak awn ka püi pyang sak nak gui ah khopäing aran ungka chang gui cu ka k’bum ba gui khai nei. Cun kawn ah kei naw dimdeeih nak awn law püi ba gui ne shin ah khaw ung phyawng ne ka om sak gui khai. 38 Ngami cu kei ah chang ah kyak khai gui, kei cu ngami ah Khanpughi ah ka kyak khai. 39 Ami mät la ami htangshong ah nikyäp nak vai ah ami na kyih aa thei vai ah: ngami am ami ghin nak ah bünak atumat bäng ka pek khai. 40 Kei naw ng’täi ciah thukhän cu ngami awn ka bik khai. Ngami ah phäha ah akni ka bi cu kä ka ng’düm phung khai, ami m’lung kyong avan awn ami na kyih aa vai ah kei naw ka bik khai, cun ung ngami naw kei käna ng’hlah tak khai gui. 41 Ngami ah phäh ah akni bäng bi ne yei nak ka lak khai, kei naw shin ah khaw ung angtäi ah ka om sak gui khai. 42 “Kei naw shin ah Chang gui ah khan ah leigai ka law püi ah mäih ah kei naw ka shaitak ah akni gui avan cu ka pe gui khai. 43 Shin ah Khaw cu chang la khisa gui ah käom nak kong gau kyak khai, Babilonian gui am pek gui vai cine chang gui naw pyen ci gui. Cun ung phi lolai gui cu shin ah khaw ung hleih ba mä vai. 44 Chang gui naw khleih khai gui, cun gui cu ming guk vai, m’hnüt vai, saksi om khai. Cun gui cu Bangamin khopäng, Jerusalem ah pei yung ah pigaw gui, Judah ung gawnu gui, khomhtung yung ah gawnu gui m’htung nawi gui la Judah khaw a htum täng yung ah kyak khai. Kei naw chang gui cu ami khaw ung ka m’tho ba gui khai. Kei, Bawipa, naw ka pyen nei.” |
Cho Bible Common Language © Bible Society of Myanmar, 2016.
Bible Society of Myanmar