JEREMIAH 31 - Cho Bible Common Language 2016

Israel gui Ami Imah Ami Law ba ah Mawng

¹ Bawipa naw pyen ci, “Kei cu Israel Pakhui avan ah Khanpughi ah ka kyak nak la ngami cu kei ah Chang ah ami kyak nak vai ah akhin cu gawk lawk ci nei.

² Sih nak ungka phyawng lawk ciah cun ah chang gui am bang gui am bang hmu ah kei naw Chimgein nak ka m’dang gui ci. Israel chang gui ami ng’düm hlü yah ung,

³ ashou nak ah ka naw ngami ung ka ng’dang ci. Israel chang gui, kei naw angtäi sei ka ning m’hni gui ci, Cun ah kyasei kei naw ng’täi ciah ka m’hni nak cu k’täi ne ka ning m’dang gui ci.

⁴ Hnü ät mä kei naw ka ning cokyang ba gui mä khai. Hnü ät mä nangmi naw nami thing sheei tum ne yeikyai ne nami ng’lamba mä khai.

⁵ Nangmi naw Samaria m’htung ah Sapyit nami geit ba khai, cun ah sapyit ah m’theih pai cu geit ci gui naw ei khai gui.

⁶ Ngäng ciah Chang gui naw Ephraim m’htung ung om ne, “BAWIPA, mi khanpughi ah, Zion m’htung ah mi hang kai nei” cine ng’khü khai gui nei.”

⁷ Bawipa naw pyen ci, “Pakhui gui ung akdäm pi ah kyak ciah Israel ah phäh ah yei ne ng’äi m’cu vä. M’hlüng tai nak ah ng’äi cu m’cu vä, Bawipa naw a chang gui cu hun pyi ci nei; ‘Pawih ba ci gui ami van cu gung gui pyi ci nei.

⁸ Kei naw ngami cu a siiptäng ah ka ka law püi ba gui khai, khomdek ah akcawi ah kaa ka k’bum ba gui khai. Amik m’dauh gui la akshum gui phi ngami awn atäng ah law ba khai gui, käumah ciah hnumi gui phi ngami awn a täng ah law ba khai gui, Ngami cu dämduh ciah pakhui ah kya ne law ba khai gui.

⁹ Kei ah ka Chang gui cu kyap u ne, taigü u ne, kei naw lam ka m’shüm gui nak awn law ba khai gui. Kei naw tuihta gui ah om nak ung khah püi gui ne, kä ami kiuk ng’täät vai ah lam k’ni ung ka khah püi gui khai.” Kei cu Israel ah pa ah mäih ah ka kyak ci, Epharaim cu ka hta ng’vaipi ah kyak ci.

¹⁰ Bawipa naw pyen ci, “Pakhui gui, na ngai vä, kei ah ng’thu gui cu ashou nak khaw yung ah shäu vä. Kei ah ng’thu gui cu ka püi sak gui ci, Cun ung phi ka k’bum ba gui khai, Htoshäm naw htome gui a ngäng ah mäih ah ka ngäng gui khai.

¹¹ Kei naw Israel ah chang cu ka k’phiawn gui ci, m’gäi ciah pakhui ungka ka hun gui ci.

¹² Ngami cu Zion m’htung ah law ne yei ne ng’äi m’cu khai gui, kei ah m’cümhnah awn lünlawi khai gui — Cun ah m’cümhnah cu htang, sapyit tui olive situi la Htome, seipat gui ah kyak ci. Ngami cu tui shawk akni ah mäih ah kyak ci. Ngami cu tui awn akni ah shawi ah dum ah mäih ah kyak khai gui; Ngami naw ami ng’ yak phung gah khai gui.

¹³ Hnumi nong gui cu ng’tam ne yei khai gui, pami gui a ghi a hmaw cu yeikyai khai gui. Kei naw ngami cu ngäng m’bom gui ne, ami thuikyah nak cu yeikyai nak ah, ami ayä nak cu yeikyai nak ah ka m’hlah pe gui khai

¹⁴ Kei naw taigü gui cu ei akni pi awn be sak gui ne, ka chang gui ung hlü ci gui avan cu Kei, Bawipa naw ka pyen nei.”

Israel gui ah Khan ah Bawipa ah Chimgein nak

¹⁵ Bawipa naw pyen ci, “Ramah ung k’aw tumat cu ka ng’yak ci nei. Cun cu akshe ah kyah ah k’aw ah kyak ci. Rachela cu a hta nau gui ah phäh ah kyap ci; Ngami cu hteit pyi ci gui kya sei, ani cu ami k’büi vai phi kä ng’ya hlük ci.

¹⁶ Na kyah ng’düm ne na ng’philitui cu ghu ä. Na hta nau gui ah phäh ah na bi gui avan cu akholä ah kä kyak khai; Ngami cu ga gui ah khaw ah kaa law ba khai gui.

¹⁷ Ngawi ah kaa vai ah phäh ah nami ngaih u vai om ci; Nami hta nau gui cu im ah law ba khai gui. Kei, Bawipa naw ka pyen ci.

¹⁸ “Israel chang gui ayä neta ami pyen cu ka ng’yak ci, ‘BAWIPA, keimi cu sei k’zäng ah mäih ah kami om ci nei, cun ung phi nang naw na bet ng’yak vai ah na na m’thei gui ci. Nang ah ng’hlat law ba vai ah kami pawng püi ci kya sei; na ng’hlah ba püi gui ä. Bawipa, kami Khanpughi.

¹⁹ Keimi naw nang kami ning hlah tak ci, Cun ung phi tuhbäi kami ng’hlat law ba hlük ci nei. Nang naw na na m’kyauk gui kawn ah, keimi cu kami lu bat ne kami thüi ci nei. Keimi cu lung aa ne kami thui hmai ci nei. A i ah kyasei ci ung keimi cu kami hmaw sang ung kami hmakak ci nei!

²⁰ “Israel, nang cu ka yum pi k’bäihah ka hta, ka m’hni pi k’bäih ah a hmaw ah na kyak ci. Kei naw nang ah ming ka m’dang yah phung ung, na m’hni nak cu ka ngaih-tüh ci. Kei ah ka m’lung cu nang ung gawk sei, kei ung chimgein nak om ci.

²¹ M’hnüt nak ng’ling ne lam cu m’hnüt ä; na hteh nak te ah lam cu shui teng ba ä. Law ba vä, Israel chang gui, nami hteh tak ah gawnu Im ah law ba vä.

²² Nangmi a i güt nami awng aa khai ang, yum nak kä om ciah chang gui? Hnumi naw pami a shung vong cu a küikaa ah mäih ah, kei naw küikaa ci la akthai cu ka tüipiang ci nei.

Khanpughi ah Chang gui ah Malam ung Ami Ng’büh Mang nak

²³ M’gäi ciah Bawipa, Israel khanpughi naw pyen ci, “kei naw chang gui cu ami khaw ung ka m’thawh ba gui ung, Judah khaw la gaw nu gui ung ngami naw pyen bam ä khai gui, ‘Theingthap ciah khomhtung Jerusalem, Theingcim ciah hmun a om nak cu Bawipa naw hriham pe sä!’

²⁴ Chang gui cu Judah khaw la gaw nu gui avan ung om khai gui, lo k’bi gui la htome ng’bum ung htomeshäm gui om khai gui.

²⁵ Cümbawng ci gui cu kei naw hüizang sak gui ne, ei ah cawi ne aktha ken ci phung cu phü khai ah ka m’bei gui khai.

²⁶ Cun ah kyasei chang gui naw pyen khai gui, ‘Kei cu ip neta, tho ne ka ng’htei cha ci!

²⁷ Kei, Bawipa naw ka pyen ci, kei naw Israel khaw la Judah khaw cu chang la khisa awn kabe sak nak vai ah akhin cu gawk lawk ci nei.

²⁸ Kei naw m’htei ge ne phu ne mawi ne, m’hlaan ne m’di ne, ka maih sak gui ah mäih ah kei naw m’htei ge ne geit kaw ne cokyang ne ka ci ba gui khai.

²⁹ Cun ah khin a gawk law ung, shin ah ng’thu cu chang gui naw kä pyen ba khai gui. ‘Nupa gui naw sapyit thui ei u sei, hta hmaw gui ami ha kyim ci.’

³⁰ Cun ak vaisü ung sapyit ak thui ei ci gui ami van cu, ami mät ah ha kyim khai; ngami cu ami katnak ah phäh ah ami van sik khai gui ciah kyak ci.

³¹ Bawipa naw pyen ci, “Israel chang gui la Judah chang gui awn ng’thukhän thai ka bi nak vai ah akhin cu gawk lawk ci nei.

³² Cun cu kei naw ngami Egypt ah kut ungka ka luh law püi ba gui yah ung ami pupa gui awn ka bi ah thukhäu phyim ah mäih ah kä kyak ci. Kei cu ngami ah cei ah mäih ah kya ngä sei phi, ngami naw cun ah thukhäm cu kä k’pang ci gui.

³³ Kei naw Israel chang gui awn ka bi vai ah thukän thai cu shin ah kyak ci: kie naw ka thukhän cu ami kyong ung tha ne, ami m’lung ung ka guk khai, kei cu ngami ah kanpughi ah ka kyak khai, ngami cu kei ah chang ah kyak khai gui.

³⁴ A u naw phi Bawipa hmat vai ah mawng apigaw-chang kä theithang khai, a i ah kyasei ci ung a hmaw pikbäih ungka naw ang vaipikbäih ung khüt sei, chang avan naw kei nah mat khai, kei naw ami katnak ka m’geinsei gui khai, ami cheishah nak kä ka shüm ba khai. Kei, Bawipa naw ka pyen nei.”

³⁵ Bawipa naw kho hnüüp ung dei khai ah khohni la khomü ung ng’shü khai ah chapa la aisi gui cu na pe gui ci. Ani naw tuinu hnaawk ne ng’hmum sak ci; ani ah ming cu m’gäi ciah Bawipa ah kyak ci.

³⁶ Khawpuui a om ah chuih Israel pakhui khaw cu om khai cine ani naw shaitak ci.

³⁷ Hnüüp ät ung khan khomik cu nüt dawng hning ne khomdek ah ang’nei cu ami hmuh kawn ah bawtah, ngami naw katnak ami bi avan ah phäh ah ani naw Israel chang gui cu maa na gui khai. Bawipa naw pyen püi ci nei.

³⁸ Bawipa naw pyen ci nei, “Jerusalem mang gaw cu akhei täng Hananela Tänghän ung ka naw Akit m’kawt ung khüt sei Jerusalem avan cu kei ah mang gaw ah cawh ba nak vai ah akhin cu gawk lawk ci nei.

³⁹ Khogii ng’can cu acun ah akhei täng ungka naw kareb m’htung ah khüt ne koah m’htung cu veing ci.

⁴⁰ Aksi gui ami phuh nak la ng’awt ami gawh nak ah khong nawi la kidron tuihta ah ahan khan khobung avan, ak kyang täng ng’se m’kawt ung khüt cicu kei ah phäh ah a theingcim hmun ah a kyak khai. Mang gaw cu a u naw phi ka shu sheiuh kä m’di m’shum ba khai.”