JEREMIAH 3 - Cho Bible Common Language 2016

Kä Bekhüt ciah Israel

¹ Bawipa naw pyen ci, “pami naw a chu angtha püi ah a kyak ung, cun ah hnumi naw ani htet ta neta, ahei pami a cei nak ba ah a kyak ung, ani naw cun ah hnumi cukä cu na ba hning ci. Acun ah khan avan lelawi sak khai nei. Cung ung phi Israel, nang ung na m’hni da aih ci, nang tuhbäi kei ah na law ba hlük ci!

² Khaw m’htun gui cä teng vä. Pawzam ciah mäih ah nami hnünthawh nak ah kä kyak ciah hmun om ne ang? Arab naw khaw ng’gau khaw ung a guttep vai ah ngäng ah mäih ah nang naw lampei pum ung na m’hni gui cu na ngäng ci nei. Nangmi naw nami pawmya nak awn kho avan nami pawmya sak ci.

³ Cun ah kyak sei khaw aa ng’düm ne, khaw kä a aa ba ah kyak ci. Nang cu pawmya ciah mäih ah na kyak ci, nang ung lüng aa nak kä om ci.

⁴ “Tuhbäi nang naw kei na na pyen nak ci,” Nang cu ka ning pa nei, kei ka hmaw yah ge ung nang naw na na m’hni ci.

⁵ Nang cu akphlüt sei kä na m’lungshe ci; nang naw khonglän ung kä na na thüi nak ci. Israel, cun cu nang naw na pyen ak kyak ci, cung ung phi nang naw akshe cu na bi hnign ah na bik ci.”

Israel la Judah cu ng’yuu ba khai goi

⁶ Josiah ghangpughang ah a kyak sangung Bawipa naw kei cu na pyen nak ci, “kä bekhüt ciah hnumi Israel ah bi cu nang naw na hmuk ci ang? Ani naw kei cu na ng’hlah ta ne, khimhtung hlüngpäng la sung ghing ka päng ung ani cu pawm za ciah mäih ah hnüntho ci nei.

⁷ Ani naw shin gui avan abi kawn ah ani cu akang ah kei ah law ba khai nei. Cung ung phi ani kä ng’hlat law ba ci, ani ah kä bekhüt ciah abe Judah naw avan cu hmuk ci nei,

⁸ Judah naw phi hmuk ci, kei naw Israel cu ng’cha püi ne, ahei ah ka k’täm ci, a i ah kyasei ci ung ani naw kei na ng’hla ta ne pawmya chang ah ani cu kya lawk ci, cun ung phi Judah, Israel ah kä bekhüt ciah abe, ani cu kä kyik ci, ani phi pawmya ah kyak ci,

⁹ ani cu kä ng’aa oang ci. Ani naw khongleo lelawi sak ne, lung gui sing gui khawihnah ne, shemshai shetkat nak bik ci.

¹⁰ Shing gui avan ah kawn ah Israel ah kä bekhüt ciah anau Jodah cu ng’she ne kei ah law ba ci, ani cu amlung kä theing ci, kei Bawipa naw ka pyen nei.”

¹¹ Cun kawn ah Bawipa naw ana pyen nak cu, Israel cu kei ana ng’hlah tak pang ung phi, ani cu kä bekhüt ciah Jodah ah ta abä nak tuba m’dang ci.

¹² Israel ah hteit ne ka pyen nak vai ah ani naw na m’thein ci, “Kä bekhüt ciah Israel, kei ah law ba ä. Kei cu ka chimgein ci, kä ka m’lungshe khai; angawi ah phi nang kä ka ning m’lung she nak khai.

¹³ Na cheishoh la Bawipa na khawpughi na hnungtuk püi nak cu na ng’kiaa vai. Sing fhing ah ka päng ung akhihei khanpughi gui am na m’hni nak na pek la kei ah thumkhän gui kä na läk cu na ng’paa vai, kei Bawipa naw ka pyen nei.

¹⁴ “Kä bekhüt ciah chang gui, law ba vä, kei cu nami na ka nak ci nei. Kei naw gawnun päng ungka, tumat ci, pahta päng ung ka hnih ci ning la gui neta kei naw Zion m’htung ah ka ning hteit püi ba gui khai nei.

¹⁵ Kei naw, kei ah thu ngai ciah uktu ka ning pe gui khai, ngami naw cüivai nak la hmuhmat nak awn uk khai gui.

¹⁶ Nangmi cun ah khaw ung nami da law ah a kyak ung chang gui naw kei ah thu khän m’küm ah mawng kä pyen ba khai gui nei. Nangmi naw cun ah mawng kä ngaih-tüh ba khai gui, kä shüm ba khai gui; ngami naw kä ng’ya hlü ba khai gui, ahei tumat pyang ba khai gui.

¹⁷ Cun ah khun a gawk law ung Jerusalem cu, “Bawipa ah mangkiang” ah khü khai gui, changpakhui avan cu kei na khawihnah khai gui ah a cu ah ng’bum khai gui. Ami m’lung ah ling nak la ami m’lung kyong akshe ah m’thein gui cu ngami naw kä bi ba khai gui.

¹⁸ Israel cu Judah awn ng’dawn ne, khaw ah a siiptäng om k’tu khaw ah ka law u ne, nami pupa gui am angtäi sei ami kaa nak vai ah ka pek gui ah khaw ung lawk khau gui.

Khanpughi ah Chang gui naw Agup Ami Khawihnah nak

¹⁹ Bawipa naw pyen ci, “Israel, Kei naw nang cu ka htanau ah ning dou hlü ne, om nak ah nik ciah khaw cu ka ning pek khai, cun cu khomdek khan ung akiom pikbäih ah kyak ci. Pa ah na na khü vai kei naw ka ng’ya hlük ci, kei kä nami na ng’hlah tak en ba phung vai.

²⁰ Cun ung phi kä bekhüt ciah hnumi ah mäih ah, nangmi cu kei ung kä nami bekhüt ci, kei, Bawipa naw ka pyen nei.”

²¹ Khomhtung khan ung k’aw tumat ng’yak nei; cun cu Israel chang gui ah ami kyah la ami ng’pa nak kyak ci, a i ah kyasei ci ung ngami cu katnak ung ghing om ne, Bawipa ami khanpughi ami m’hnih ah phäh ah kyak ci.

²² Bawipa ng’hlah tak ciah chang gui avan ng’hlat law ba vä; ani naw ning gai sak gui ne ning bekhüt sak gui khai. Nangmi naw nami pyen ci, “ä, kei mi Bawipa ah kami law ba ci nei, a i ah kyasei ci ung ani cu kami Khanpughi ah kyak ci.

²³ Khomhtung khan ah khungzo kami khawihnah ah phäh ah keimi a i naw kä na m’htei gui ci nei. Israel gui m’htei gui cicu Bawipa kami khanpughi bäng ung ka lawk ci nei.

²⁴ Cun ung phi Baala, lümg aa nak ah khanpughi khawihnah nak naw cau pui tün ne kami pupa gui naw ami bilawh law gui nü-htome nak, seipat mak gui, hta pami, hta hnumi gui avan shum sak yawp ci nei.

²⁵ Mikmi cu thui ngaa ne ng; yän ne, lü ng’aa nak naw na küm gui khin ci nei. Mikmi la mi pupa gui naw angtäi sei Bawipa mi khanpughi hnungtuk ne katnak mi bik ci nei, mikmi naw ani ah thum khan gui cu kä mi läk phung ci nei.