JEREMIAH 28 - Cho Bible Common Language 2016

Jeremiah la Prophet Hananiah

¹ Zedekiah ghangpughang ah a kyak nak akum phli nak ah, acha hma nak, acun ah kum ung Azzur ah hta Hananiah, Kibeon gawnnu ungka prophet naw Taigüim kyong ah na ng’thu püi ci. Taigü gui la chang gui ah ma ah ani naw ana m’thein cu,

² m’gäi ciah Bawipa, Israel Khanpughi naw pyen ci,” kei naw Babilonia ghangpughang ah huham cu ka cheiuk pyi ci nei.

³ Khokum goi ah akyong ung Ghangpughang Nebukhadnezzar naw Babilonia ah a hteh püi ah Taigüim m’küm khawh gui avan cu shin ah hmun ung kei naw ka law püi ba khai nei.

⁴ Kei naw Judah ghangpughang, Jehoiakim ah hta Jehoiachin phi, Babilonia ah omktu ah ami hteh püi gui ah chang gui awn atäng ah ka law püi ba gui khai nei. Ä ya, kei naw Babilonia ghangpughang ah huham cu ka cheiuh khai nei. Kei, Bawipa naw ka pyen nei.”

⁵ Taigüim ah ma ah ng’düi ciak chang gui avan ah ma ah kei naw Hananiah cu ka pyen nei.”

⁶ “Cäicat vai nei! Shin gui cu Bawipa naw bik khai ah kei naw ka ngaih u ci! Kei naw akcang ah ka ngaih u ci, ani naw nangmi ah ng’cäbang nak cu bä khai ah bik khai, Babilonia ah kaa, Taigüim m’küm khawh gui a van la pha ne ami hteh püi ah chang gui avan cu law püi ba gui khai gui.

⁷ Cun ung phi nangmi la chang gui am ka pyen nak gui cu ngai vä.

⁸ Caupui, ka la nangmi ah khin ah kä a kyak pha ung prophet gui naw ng’thu pyen ne ami ng’cäbang cu, ng’tuknak, ei cawi nak la gawpyam nak gui cu changpakhui akda la huham mak ciah uktu khaw gui al khan ah gawk lawk khai, ciah kyak ci.

⁹ Cun ung phi dimdeeih nak ah mawng ng’ cäbang ciah prophet läi cu prophet ah ng’cäbang abä law ah a kyak awn ung va, Bawipa naw akcang ah atüih law ah prophet ah k’bäi ci gui.”

¹⁰ Cun kawn ah Hananiah naw ka hnü ungka phuih htung cu la neta am ton ton ah ci hnget ci,

¹¹ Cun kawn ah chang gui avan ah ma ah a pyen cu, “Bawipa naw pyen ci, Changpakhui avan ah hnü ung ghangpughang Nebukhadnezzar naw atha ah phuih htung gui ai hawkcha ah ani naw ci hnget khai; ani naw shin gui cu kum goi ah kyong ung bik khai, ciah kyak ci,” Cun kawn ah kei cu ka hteit ci.

¹² Api Shou hta khäta Bawipa naw na pyen nak ci,

¹³ hteit ne Hananiah cu pyen na ä: “Bawipa naw pyen ci, nangmi naw sing awn pyan ah phuih nak cu namicihnget hning khai, cun ung phi ani naw m’siiawn pyan ah phuih nak awn m’thong ba khai.

¹⁴ M’gäi ciah Bawipa, Israel khanpughi avan ah khan ah taih khai, Cun ung ngami naw Babilonia Ghangpughang Nebukhadnezzar ah bii bik khai gui. Bawipa naw pyen ci, khisa gui naw phi Nebukhadnezzar ah bii bik khai gui.”

¹⁵ Kei naw shin cu Hananiah am m’thein neta ka k’be ba cu, “Ngai ä, Hananiah! Nang cu Bawipa naw kä ning tüi ci, nang naw shin ah chang gui naw hleei ami yum vai ah na bik ci.

¹⁶ Cun ah kyasei ani naw nang cu ning k’täm khai ah Bawipa amät naw pyen ci nei. Shin ah khokum kä angpyi pha ung nang cu na sik khai, a i ah kyasei ci ung nang naw chang gui am Khanpughi hnungtuk püi u ne ami ng’tuk püi vai ah na pyen ci.”

¹⁷ Hananiah cu a cun ah ak cha chih ung sik ci.