JEREMIAH 27 - Cho Bible Common Language 2016

Jeremiah naw Seipat ah Phuih nak Phui ci

¹ Josiah ah hta zadekiah Judah ghangpughang ah a kyak law thai ung Bawipa naw ana pyen nak cu.

² Mehvun gui la phuih nak ah sing phe gui cu la neta na k’hngü ah khan ah taih ä.

³ Edom ni, Moab ni, Ammon ni, Tire ni, Sidon ni gui ah ami ghangpughang gui am ng’thu ka m’khäh gui vai ah Bawipa naw na m’thein ci, ngami naw ami ng’shä gui naw Jerusalem ah Ghangpughang Zedekiah cu hmuk khai gui.

⁴ M’gäi ciah Bawipa, Israel khanpughi naw, Bawipa ah pyen ah ng’thu cu ami ghangpughang gui am ami m’thein vai ah ng’thu ka m’khän vai ah na pyen nak ci;

⁵ “Dämduh ciah ka huham la ka thamah nak awn kei naw khomdek khan, changpakhui gui la khomdek khan ah om ciah khisa avan cu ka tüi pyang ci; cun cu kei naw ka ghü ah chang tumat mat am ka pek ci.

⁶ Babilonia ghangpughang ka changshäm, ghangpughang Nebukhadnezzar ah huham ka ah shin ah changpakhui gui avan tha cicu kei ah kyak ci, khisa gui naw phi ani ah bii ami vai ah kei naw ka bik ci.

⁷ Chang pakhui avan naw ani ah bii bik khai gui, ani ah pakhui angkiak nak vai kä a gawk law pha ah chuih, ani ah hta la atu gui ah bii cu ngami naw bik khai gui. Cun kawn ah ani ah pakhui naw huham mah ciah pakhui la dämduh ciah ghangpughang ah bii cu bik khai gui.

⁸ “Pakhui tumat mat, käcung uk nak khaw tumat mat naw ani ah uk nak cu kä a dou ah a kyak ung, Nebukhadnezzar am kä ka m’di sak yawp pha ung cun ah pakhui cu kei naw ng’tuk nak, ei cawi nak la natnak gui awn ka m’kyuk khai.

⁹ Nami prophet gui, käcung malam ah amawng ng’cäbang thei ciah pyen ciah chang tumat mat cu kä nami ngai vai, ngami cu ami mang awn baw, aksi ah mümcha khü ne baw, cerai ne baw kya thei ci gui. Ngami ami van naw Babilon ghangpughang ung känami ng’kiaa vai al ning pyan nga gui khai gui.

¹⁰ Ngami naw ning m’hleei gui ci gui. Nami khaw ungka naw ahei ah ami ning htek püi gui vai ah ning ci gui khai gui. Kei naw nau gmi cu ka ning k’täm gui khai, nangmi cu nami di khai.

¹¹ Cun ung phi pakhui tumat mat cu Babilonia Ghangpughang ah ng’kiaa ne abii abi ah a kyak ung, kei naw ani cu amät ah khaw ung nei sak ne, vook kyan sak ne, acung ka om sak khai. Kei, Bawipa naw ka pyan ci.”

¹² Kei naw a cun ah mäih bä ah Judah ghangpughang Zedekiah phi Chang gui ah bii cu biä, Cun ung nang cu na ghing khai.

¹³ Ai ah kyasei nang la na chang gui cu ng’tuk nak, ei cawi nak la gawpyan nak awn nami sih ang. Cun cu Babilonia Ghangpughang ung kä ng’kiaa ciah pakhui ah khan ah kya lawk khai ah Bawipa naw a pyen ah kyak ci nei.

¹⁴ Ani ah ma ah kut kä Chaat vai ah ning pyan ah gui ciah prophet gui cu kä nami ngaih gui vai nei. Ngami naw ning m’hleei gui ci gui nei.

¹⁵ Bawipa amät naw pyen ci, ngami cu ani naw kä tüi law gui ci, ngami naw ani ah ming awn nangmi cu ning m’hleei gui ci gui. Cun ah kyasei nangmi cu ning k’täm gui khai gui, nangmi la shinahhleei ne ning m’thein gui ciah prophet gui cu ning ngawn gui ci gui.

¹⁶ Cun kawn ah kei naw taigü gui la Chang gui am Bawipa ah pyen cu ka m’thein gui ci: “Babilonia ah kaa Taigü om ung m’küm khawh gui cu law püi ba ge khai guici ne pyen ciah prophet gui cu kä nami ngaih On gui vai. Ngami naw nangmi cu ning m’hleei gui ci gui.

¹⁷ Ngami kä nami ngaih gui vai! Babilonia Ghangpughang ah nami ng’kiaa vai, nangmi nami ghing khai! A i ah kyasei shin ah mang gaw di ne ang pum vai ang?

¹⁸ Ngami cu prophet akcang ah kya u ne, kei ah ng’thu cu ngami ung om ciah a kyak ung, Taigüim la bawi mang im ung om ba ciah m’küm khawhgui cu, Babilonia ah kä htet püi vai ah kei, m’gäu cuag Bawipa cu na ng’shi law u sä.”

^19-20 (Ghangpughang Nebukhadnezzar naw Judah ghangpughang Jehoiakimah hta Jehoiakim la Judah la Jerusalem ung ami ng’vai gui cu, Babilonia ah a hteh püi gui yah ung, kyei k’tung gui, kyei tuihan gui, angnei gui la Taigüim m’küm khawh amsah cu nawng shüt ci)

²¹ Jerusalem ung Taigüim la bawi mang im ung ami nawng ba shüt ah m’küm khawh gui ah mawng m’gäi ciah Bawipa, Israel khanpughi kei naw ka pyen cu ngai vä.

²² Cun gui cu Babilon ah hteh püi gui khai gui, cun gui cu kei naw ka m’htei güt ung acu ah om khai gui. Cun kawn ah ashi ah law püi ba gui ne, ashin ah hmun ung ka gim ba gui khai, kei, Bawipa naw ka pyen nei.”