JEREMIAH 26 - Cho Bible Common Language 2016

Jeremiah Ami K’cet ah Mawng

¹ Josiah ah hta Jehoiakim Judah ghangpughang ah a kyak thai ung,

² Bawipa naw na pyen nak ci, “Taigü Im k’caw ung, ng’tüi neta, khawihnah khai gui ah Judah gaw nu gui ungka lawk ciah chang gui ah ma ah chang gui am na m’thein vai ah kei naw ka ning thumkhän avan cu na ng’shäu vai nei. Api phi kä na k’pawih nak vai nei.

³ Chang gui naw na ngai u ne akshe ami bi cu ami nawng ah a kyak läi ung, cun ah mi bi ah a kyak ung, ngami naw akshe ami om ih gui ah phäh ah ngami ah khan ah ka law püi vai ah ka pawng püi ah m’di nak gui vai ah mawng ung kei naw ka m’lung ka m’thawng khai nei.”

⁴ Bawipa naw chang gui ka pyen nak vai ah na m’thein ci, “Kei, Bawipa naw ka pyen cu, kei naw ka ning pek gui ah m’thei thang nak cu läk u ne, kei cu nami na ngaih vai,

⁵ Kei naw nangmi am ka ning tüih law gui ah ka changshäm prophet gui ah ng’thu cu nami ngaih nak vai. Ngami ah pyen cu nangmi naw kä nami ngai phung ci.

⁶ Nangmi naw k’täi ne kä nami ngaih ah a kyak ung kei naw shin ah Taigüim ah khan ah Shilon ung ka bi ah mäih ah ka bik khai, m’dek khan ung om ciah changpakhui avan naw shin ah mang gaw ah ming cu plah tam nak ah mang khai gui.”

⁷ Taigüim kyong ah shin gui kei naw ka pyen cu Taigü gui, prophet gui la chang avan naw ng’yak ci gui,

⁸ Kei naw ka pyen vai ah Bawipa naw ana thumkhän gui avan kei naw ka pyi vai am, ngami naw kei cu nak koi u neta, m’lau ci gui, “Shin ah phäh ah nang cu ning ngawn vai nei!

⁹ A i ah kyasei nang naw, shin ah Taigüim cu Shilon ah mäih ah kyak khai, shin ah mang gaw cu m’di vai, cun ung a u phi kä om ba khai, na ci ang? ci u neta, chang hli naw kei cu na koi ci gui.

¹⁰ Cun ah a kyak gui cu Judah ami ng’vai gui naw ng’ya u neta, ang ghit ah bawi mang ah im ungka Taigüim ah law u ne, m’kawt Thai Hmun ung ng’bum ci gui.

¹¹ Taigü gui la prophet gui naw ami ng’vai gui la chang gui ami pyen nak gui cu, “Shin ah chang cu mi mang gaw hnungtuk ne ng’thu pyen ci kyasei ngawn vai nei, ani ah pyen cu nami hnga awn nami ng’yak ci nei.”

¹² Cun kawn ah kei naw ka pyen ci, “Nangmi naw nami ng’yak ah shin ah Taigüim la shin ah mang gaw hnungtuk ne ang nü nü ka ng’shäu khai ah kei cu Bawipa naw ana tüih law nei.

¹³ Nangmi naw nami om ih la nami bilawh gui cu nami m’thawng vai nei, Bawipa nami khanpughi cu nami ngaih vai nei. A cun ah nami bi ah a kyak ung nangmi ah khan ah alaw püi vai a pyen ah m’dii m’shum nak ah mawng ung ani naw am’lung m’thawng khai nei.

¹⁴ Kei läi cu nangmi ah huham kyong ung ka om ci! Nami mät naw düng ci la nik ciah nami ngaih phung cu kei ah khan ah bi vä.

¹⁵ Cun ung phi nami hmat vai cu, kei nami na ngawn ah a kyak ung, nangmi la shin ah mang gaw ung chang gui cu changni ngawn na phäh ah katnak gah khai gui, a i ah kyasei ci ung, shin ah thukhän ka ning pe gui khai ah kei cu Bawipa naw ana tüih law ah kyak ci.”

¹⁶ Cun kawn ah angvai gui la chang gui naw taigü gui la prophet gui ami pyen nak gui cu, “Ani naw Bawipa mi khanpughi ah min gung mi khan ah ng’thu pyen ci; ani cu ngawn vai ah kä kyak ci.”

¹⁷ Cun kawn ah agham hta amshah gui cu ng’düi law u neta, ng’bum ciah chang gui ami pyen nak gui cu,

¹⁸ Hezekiah cu Judah ghangpughang ah a kyak yah ung, moresheth ah ka prophet mikah naw chang gui avan a pyen nak gui cu, m’gäi ciah Bawipa naw pyen ci, ‘Zion cu lai ah mäih ah thawn khai gui, Jerusalem cu akshe gui oum ah kyak khai, Taigüim m’htung cu bung ah kyak khai.’

¹⁹ Ghangpughang Hezekiah la Judah chang gui naw mikah cu sih nak kä pek ci gui. Cun nak vaisü ung Hezekiah naw Bawipa m’tamkhah ne, a hmawi ak kyang vai ah k’tha na ne bik ci. Cun kawn ah Bawipa naw ami khan ah leigai a law püi vai ah a pyen te cu ani naw amlung m’thawng ci. Tuhbäi mikmi naw mi mät ah khan ah kyih vai ah leigai cu mi law püi ci nei.”

²⁰ (Cun kawn ah ahei chang tumat om ba ci, ani cu she maiah hta Uriah kiriah Jearim ah ka ah kyak ci, ani naw Jeremiah ah mäih ah shin ah mang gaw la changpakhui cu hnungtuk ne Bawipa ah min gung thu pyen ci.

²¹ Ghangpughang Jehoiakim, agakap gui la a bawi gui naw Uriah ah ng’thu pyen cu ng’ya u neta, ghangpughang naw ani ngawn vai ah k’tha nak ci. Cun ung phi Uriah naw cun cu ng’ya neta, kyi ne Egypt ah dawng ci.

²² Ghangpughang Jehoiakim naw Achbor ah hta Elnathan la ahei chang gui Egypt ah tüi gui ne Uriah cu lak sak gui ci.

²³ Ngami naw ani cu ghangpughang Jehoiakim ah law püi ba u khäta, ani cu ngawn ne apumsa cu chang gui ah ng’cim hmun ung gawt ci.)

²⁴ Cun ung phi kei cu Shapham ah hta Ahikam ah ng’düih püi nak ka gah ci kya neta kei cu chang gui naw ami na ngawn vai ah kä na ap ci gui.