JEREMIAH 25 - Cho Bible Common Language 2016

Asiip Täng ah kaa Ga

¹ Jasiah ah hta Jehoiakim Judah ghangpughang ah a kyak nak akum phli nak ung. Judah chang gui avan ah mawng ng’thu cu Bawipa ungka ka gah ci. (Cun cu Nebukhadnezzar Babilonia ghangpughang ah a kyak nak akum ät nak ung ah kyak ci.)

² Kei naw Jerusalem la Judah chang avan cu ka pyen ah gui ci,

³ “Amon ah hta Josiah Judah ghangpughang ah a kyak nak akum gha lei thum ungka naw kum m’ku lei thum ung, atuh ngawi ung khüt sei, Bawipa naw na ng’thu püi ci, ani naw a pyen phung cu kä hnam ne ka ning m’thein gui ci, cun ung phi nangmi naw a i ah kä nami ngai ci.

⁴ Bawipa naw a changshäm prophet gui k’täi ne ning tüih law gui sei phi nangmi naw kä nami ngai ci, a i ah kä nami sui ci.

⁵ Akshe ah nami ghin nak la akshe gui nami bi nak ungka nami ng’hlah law ba vai ah ngami naw ning m’thein gui ci gui, cun ah kyasei Bawipa naw nangmi la nami pupa gui am ngawi yä nami kaa nak vai ah aning pek gui ah kho ung nami om khai nei.

⁶ Nangmi naw ahei khanpughi gui kä nami khawihnah vai la aloii kä nami bi vai, nami mät ah pyan ah a gup gui khawihnah nak awn Bawipa kä nami m’lungshe sak vai ah ning m’thein gui ci gui, cun ung ani naw kä ning m’kyuk gui khai.

⁷ Cun ung phi ani nami ngaih vai ah nami maa ah pyen ne ani amät naw pyen ci, cun nak vaisü ung agup gui awn ani cu m’lungshe sak u ne, nami khan ah ani ah m’kyuk nak cu nami mät naw nami law püi ci.

⁸ “Cun ah kya sei, nangmi naw kä nami ngaih ah phäh ah m’gäi ciah Bawipa naw pyen ci,

⁹ ‘Kei naw a siiptäng ah chang gui avan la ka changshäm Babilonia ghangpughang Nebukhadnezzar cu ka tüi lawk khai. Judah gui la khaw mah gui cu hnungtuk ne tu u ne, ami pei leng ah khochang pakhui avan hnungtuk khai gui cu kei naw ka law püi khai. Kei naw shin ah pakhui la a pei leng ung ka gui cu ka m’di lawk khai, khonglän ung dii khai ah ka nawng khai, hmuk ciah chang cu cäicat ne ng’hlet khai. Kei, Bawipa naw ka pyen nei.”

¹⁰ Yeikyai nak la lünlawi nak ah k’aw gui la ng’kawi cang nak pawi ah k’aw gui cu kei naw ka deeih sak khai nei. Ngami ung mei-im ungka vai situi phi kä om ba khai, pümhta phi kä om ba khai.

¹¹ Shin ah khaw cu dishum khai, hmuk ciah chang gui cu cäicat khaigui, ami pei ng’leng ah changpakhui gui naw Babilonia ghangpughang ah bii cu kum chikip ung bik khai gui.

¹² Cun khawn ah Babilonia la a ghangpughang cu ami kat ah phäh ah kei naw ka m’kyuk gui khai. Kei naw cun ah khopäng cu m’di ne angtäi ah di khai ah ka nawng khai.

¹³ Kei naw Jeremiah ung ng’thu ka pyen yah ung, changpakhui gui am ka law püi khai cine ka m’kyih nak gui ah leigai gui avan awn Babilonia cu ka m’kyuk khai — cun ah leigai gui avan cu shin ah ca-uk ung guk ah kyak ci.

¹⁴ Kei naw Babilonia gui am ami mät ah bi ah phäh ah ka pe ba gui khai, changpakhui akda la dämduh ciah ghangpughang gui naw ngami cu k’hleihtein nah gui khai gui.”

Chang Pakhui gui ah Khan ah Khanpughi ah Ng’thumcha nak

¹⁵ Bawipa, Israel khanpughi naw na pyen nak ci, shin ung sapyit tuikhap, kei ah m’lungshe nak awn be ci. La ne, kei naw ka ning tüih law ah changpakhui avan am awk sak gui ä.

¹⁶ Cun ami aw kung ngami hnungtuk püi gui khai ah kei naw ka tüih law ah ng’tuk nak awn ngami cu awktat u ne gu k’taak khai gui nei.”

¹⁷ Kei naw khap cu Bawipa ah kut ungka ka lak ci, Bawipa naw ana tüih law changpakhui avan am ka pe gui ci, cun kawn ah ka awk sak gui ci.

¹⁸ Jerusalem la Judah gawnu gui avan, ami ghangpughang gui la ami ng’vai gi awn atäng ah shin ungka awk sak gui vai, cun ung ngami cu teng ci gui naw ami kyihkyawk cäicat vai ah khonggau ah kyak khai gui. Cun ah kyasei chang gui naw ngami ah ming cu plah taam ah pyen ci gui — cun gui cu atuta phi kya tu lä ci.

^19-26 Shin cu cun ah khap un gawk ciah ahei chang gui avan ah kyak ci; Egypt ghangpughang abawi gui la angvai gui; Egypt chang gui avan la Egypt kho ung om ciah khuihei chang gui avan; Uz kho ung ghangpughang gui avan; Philistine mang gaw gui ah kyak ciah Ashkelon, Kaza, Ekron ung ghangpughang gui la Ashdod ung k’pawih ba ci gui, Edom, Moab la Ammon ung chang gui avan; Tire la Sidon ung ghangpughang gui avan; Mediteranean khaw ung ghangpughang gui avan; Dedam, Tema la Buz mang gaw gui; alu aktawi ah k’tei ciah chang avan; Arabia ghangpughang gui avan; Khong gau khaw pakhui gui ah ghangpughang gui avan; Zimri, Elam la media ghangpughang gui avan; Ashou, ang et ungka gui, assip täng ghangpughang gui avan ah kyak ci. Khomdek khan ah chang pakhui nü cu acun ung awk khai gui. Akhnu ah Babilonia ghangpughang naw acun ung awk khai.

²⁷ Bawipa naw kei cu na pyen nak ci, “Kei, m’gäi ciah Bawipa, Israel khanpughi naw ka thumkhän gui cu chang gui am m’thein gui ä, ngami hnungtuk gui khai ah kei naw ka tüih law ng’tuk nak awn awktat ne m’sha ne, kyu ng’täng ne kä ami thawh law ba hning güt ung ami awk vai nei.

²⁸ Ngami naw nami kut ungka khap cu la ne awk vai ah ami maa ah a kyak ung, nami m’thein gui vai, ngami naw acun ungka ami awk bä bä vai ah m’gäi ciah Bawipa naw pyen ci nei.

²⁹ Kei naw m’dimshum nak ah bii cu ka mät ah mang gaw ung ka tün khai. Ngami naw kä m’kyuk gui vai ah ngai u ne ang? Kaa nei, khomdek khan ung chang avan am ng’tuk nak ka tüih lawk khai, cun ah kyasei ngami cu m’kyuk gui vai nei kei, m’gäi ciah Bawipa naw ka pyen nei.

³⁰ “Nang Jeremiah naw, kei naw ka pyen phung cu na ng’shäu vai nei. Nang naw shin ah chang gui na m’thein gui vai cu, Bawipa cu khankho ah m’ngawk khai ak hlüng nak khankho ung hmum kyeek khai. Ani naw ak chang gui hnungtuk ne m’ngawk khai; ani cu sapyit neen ciah chang ah mäih ah m’lau khai. Khomdek khan ah chang nü naw ng’yak khai.

³¹ Cun ah k’aw cu khocawi ah khüt ne shalawng khai. Bawipa naw changpakhui gui a hnungtuk püi nak gui vai amawng tumat om ci. Ani naw chang avan cu cet gui ne, changshe gui cu sih nak pe gui khai. Bawipa naw pyen ci.”

³² M’gäi ciah Bawipa naw pyen ci, leigai gui cu changpakhui tumat täi ung gawk lawk ci, dämduh ciah puikhaw khi cu kho cawi ah kaa khi lawk ci nei.

³³ Cun ah hnüüp ung Bawipa naw a ngawn ah chang ah pumsa gui cu, khocawi vang ungka naw vang ah khüt khai ah ng’zaih ne ng’zän khai gui. Ngami ah phäh ah a u phi kä thüisei khai, a u naw phi la ne kä m’ciim gui khai. Ngami cu eek ah mäih ah m’dek ung ng’pum khai gui.

³⁴ Kyap vä, nangmi angvai gui, ka chang gui htome sham gui, m’lau ne kyap vä! Thüisei ne m’vut ung ng’tah vä. Ami ning ngawn nak gui vai ah akhin gawk lawk ci nei, nangmi cu htome khla ah mäih ah ning ngawn gui khai gui nei.

³⁵ Nangmi nami phiawn nak vai ah lam kä om ci nei.

^36-37 Nangmi cu thüisei ne nami kyap m’lau ci nei, a i ah kyasei ci ung, Bawipa naw amlungshe nak awn nami changpakhui cu m’di ne, dinggei ciah nami khopäng cu didap sak ci nei.

³⁸ Phongkawng naw akhui anawng ah mäih ah Bawipa naw a chang gui cu nawng gui ci nei. Kyi kyawk vai kyak ciah ng’tuk nak la Bawipa ah kyih vai ah amlungshe nak naw khopäng khaw cu khong gau ah kyak sak ci nei.