JEREMIAH 24 - Cho Bible Common Language 2016

Thei vawh Goi

¹ Taigüim ah ma ah ami tha ah thei vawh goi cu Bawipa naw na m’hnuh ci. (Shin cu Babilonia ghangpughang Nebukhadnezzar naw Judah ghangpughang Jehoiakim ah hta Jehoiachin cu pha ne Jerusalem ah ka Babilonia ah, Judah ng’vai gui, shep pyang ci gui la bii k’bi gui mah ah a hteh püi gui kawn ah kyak ci.)

² Ak tük bäih thei vawh ung üp ma ciah thei akni gui om ci, ahei tumat ung ei ung kä ni aih ciah thei akshe gui om ci.

³ Cun awn ah Bawipa naw na pyen nak ci, “Jeremiah, A i ang na hmuh? Kei naw ka m’hlan ci, “Thei gui ka hmuk ci, akni gui cu anghtei ah nik ci gui, akshe gui cu anghtei ah shek ci gui, ei vai ah kä ni aih ci.”

⁴ Cun ah kyasei Bawipa naw na pyen nak ci,

⁵ “Kei Bawipa, Israel khanpughi naw ka hmuh cu, Babilonia ah ami hteh püi gui cu shin ah thei akni ah mäih ah kyak ci gui, kei naw akni ah ka om püi gui khai.

⁶ Kei naw ngäng bou gui ne shin ah khaw ah ka law püi ba gui khai. Kei naw ka co kyang gui khai, kä ka plawh sheh gui khai. Kei naw ka geit kaw gui khai, kä ka mawi gui khai.

⁷ Ngami am kei Bawipa ah ka kyak ah ami hmat nak hlü cu ka pe gui khai. Cun kawn ah ngami cu kei ah chang ah kyak khai gui, kei cu ngami ah khanpughi ah ka kyak khai, a i ah kyasei ci ung ngami cu ami m’lung kyong avan awn kei ah ng’hlat law ba khai gui.

⁸ “Judah ghangpughang zekekiah, la ani koi ciah naigan gui la Jerusalem ung om ba ciah chang van shin ah khaw ung om ci gui kä cung Egypt ah ng’plon ci gui cu-kei, Bawipa naw ei ung kä ni aih ne shek ciah shin ah thei she gui ah mäih ah ka om püi khai.

⁹ Khomdek khan ah changpakhui avan naw ami kyihkyawk vai ah leigai cu ngami ah khan ah kei naw ka law püi khai. Chang gui naw züi sha gui khai gui, k’she na gui khai gui, gaih m’gin gui khai gui, kei naw ka püi pyang sak nak gui päng ah ami ming cu plah taam nak ah mang khai gui.

¹⁰ Kei naw ngami la ami pupa gui am ka pek ah shin ah khaw ung chang tumat phi kä a om ba güt ung ng’tuk nak, ei cawi nak la leigai cu ami khan ah ka law püi khai.”