JEREMIAH 23 - Cho Bible Common Language 2016

Malam ah Phäh ah Ngaih u nak

¹ A chang gui m’di gui ne püipiang sak ciah chang gui ah khan ah Bawipa ah ng’thumcha nakk cu a i hlawk ah kyih vai ah kyak khai aw!

² Shin cu Bawipa, Israel khanpughi naw ak chang gui m’hteit htang khai gui ah uktu gui a pyen nak gui ah kyak ci: “Nangmi naw ka chang gui kä nami m’htei htang ci; nangmi naw püi pyang sak gui ne a hei ah nami k’täm gui ci. Tuhbäi shekat nak nami bi ah phäh ah ka ning m’kyuk gui khai nei.

³ Kei naw ka püi pyang sak nak gui ah khaw ung k’pawih ba ciah ka chang gui cu kei naw ka ng’bum ba sak gui khai, cun kawn ah ami khaw ung ka law püi ba gui khai. Ngami ung ami hta nau da khai, chang phi da lawk khai gui.

⁴ Nangmi ning m’htei gui khai ah uktu gui cu kei naw ka m’düih gui khai. Kei ah ka chang gui cu kä kyihkyawk ba khai gui, kä cäicat ba khai gui, kei naw kä ka m’kyuk ba gui khai. Kei, Bawipa naw ka pyen ci.”

⁵ Bawipa naw pyen ci, “Ng’düng ciah David ah ghangpughang ah htangshon ghangpughang ah kei naw ka ghü nak vai ah akhin gawk lawk ci nei. Cun ah ghangpughang naw cüivai ne uk ne, khaw avan ung düng nak la taga nak cu bik ci nei.

⁶ Ani ghangpughang ah a kyak law ung Judah chang gui cu phyawng khai gui, Israel chang gui cu dimdeeih nak ung om khai gui. Ani cu “Ani cu Bawipa mi hun bawi” ah khü khai gui.”

⁷ Bawipa naw pyen ci, “Akhin gawk lawk ci nei, chang gui naw kei cu Egypt khaw ah ka, Israel chang gui law püi ba gui ciah ghing ciah khanpughi ah kä ng’khän ng’taam ba khai gui nei.

⁸ Cun nak vai sä ung, a siiptäng khaw la kei naw ka püipiang sak nak gui ah ahei khawpäng avan ungka Israel chang gui law püi ba gui ciah ghing ciah khanpughi ah pyen ne ng’khäntaam khai gui nei. Cun kawn ah ngami cu ami mät ah khaw ung om khai gui.”

Prophet gui ah Mawng Jeremiah ah Ng’thu pyen

⁹ Ka m’lung cu ng’deeng ci, kei cu ka ng’thüng ci nei. Bawipa ah a phäh ah, ang thu theing gui ah phäh ah, sapyit tui akda aw aih ne, awktat ciah chang ah mäih ah ka kyak ci nei.

¹⁰ Shin ah khaw cu kä bekhüt ciah chang gui awn be ci nei; ngami cu a omshe ah ghing om u ne, ami huham akshe ah mang ci gui. Bawipa ah plah taam ah phäh ah mi khaw cu thüi sei ne, khulim gui cu chawng yawp ci.

¹¹ Bawipa naw pyen ci, “Prophet gui la taigü gui cu khanpughi kaa ah om ci gui; Taigüim kyong ah ngami naw akshe bi u sei ka hmu gui ci.

¹² Ngami naw ami hteh nak ah lam cu plai ne hmüp khai; kei naw ngami cu ng’vawn ne ka kiuk sak gui khai. Kei naw ngami ah khan ah leigai ka law püi khai; ngami m’kyuk nak gui vai ah akhin cu gawk lawk ci nei. Kei Bawipa naw ka pyen nei.

¹³ Samaria prophet gui ah katnak cu kei naw ka hmuk ci nei; ngami cu Baal ah ming ung ng’thu pyen ci gui, ka chang gui cu lam hma sak ci gui.

¹⁴ Cun ung phi Jerusalem ah prophet gui cu sheka pi u sei ka hmu gui ci: ngami cu plet u ne ami hleei pyen ci gui; ngami naw chang gui phi cheishoh sak ci gui, cun ah kyasei a u chang naw phi akshe bi cu kä ng’düm ci gui. Kei ah phäh läi ah ngami ami van cu Sodom la Komorrah chang gui mäih ah shekak ci gui.

¹⁵ “Cun ah kya sei, shin cu kei, m’gäi ciah Bawipa naw Jerusalem prophet gui ah mawng ka pyen cu: kei naw ngami am ami ei vai sing kha pe gui ne, ami awk vai ng’tuui tui ka pe gui khai, a i ah kyasei ci ung ngami naw khanpughi a shekha ah mawng khaw avan ung ami gawk sak ah phäh ah kyak ci.”

¹⁶ M’gäi ciah Bawipa naw Jerusalem chang gui pyen ah gui ci, “prophet gui ah pyen cu kä nami ngaih vai; ngami naw akholä ning ngaih u sak gui ci gui. Ngami naw ami mät ah ngaih ning m’thein gui ci gui, cun cu kei ah pyen ah kä kyak ci.

¹⁷ Kei ah ng’thu kä ngai ne mak ciah chang gui am, ‘Nangmi ung apäng avan bä lawk khai nei’ cine pyen nak ci gui. Ngami naw am lung liing ciah chang nü am leigai naw kä ning tawn khai nei, cine m’thein ci gui.”

¹⁸ Kei naw ka pyen ci, “Shin ah prophet gui a u naw phi Bawipa ah ng’zih ciah ngaih-tüh cu kä hmat hlawt ci nei. Ngami ungka a u naw phi kä ng’ya man ci, ani ah thu kä hmuhmat man ci, ngaih ah phi kä ngai man ci, ani ah pyen phi kä geing ne man ci.

¹⁹ Ani ah m’lungshe cu puikho khi ah kyak ci, changshe gui ah lu han ah khi ciah khi nu ah kyak ci.

²⁰ Cun cu ani naw abi vai ah ang ngaih gui nü kä abi pha ah chuih kä ng’pyi khai. Cun ah hnüüp gui a gawk law ung a chang gui naw htei cha sei hmat khai gui.”

²¹ Bawipa naw pyen ci, “Shin ah prophet gui cu ami hteh pang ung phi kei naw ka tüih gui ah kä kyak ci. Kei ah min gung thu ami pyen pang ung phi kei naw ng’thu api phi kä ka pe gui ci.

²² Ngami naw ng’zih ciah kei ah ngaih-tüh ami hmat ah a kyak vaisü ung, ka chang gui ah ma ah ka thu cu ng’shäu hning khai gui, akshe ah ami ghin nak la akshe ami bi gui cu nawng hning khai sü gui te ah kyak ci.

²³ “Kei cu khanpughi, hmun ät bäng ung kä om ne khaw nü ung ka om ci.

²⁴ Kei naw kä ka hmuh vai ah a u phi kä ng’thup hning ci. Khan kho lo khomdek khongnü ung kei ka om cu kä nami hmat ne ma?

²⁵ Cun ah prophet gui ah pyen cu kei naw ka hmat gui ci nei, ngami naw kei ah ming awn ami hleei pyen u ne, ami man gung kei naw ka ng’thu ka pe gui ciah pyen ci gui.

²⁶ Cun ah prophet gui naw ami mät ah pyan ah ami hleei awn a i güt ka chang gui cu khah püi gui khai gui ang?

²⁷ Ami pupa gui naw kei na m’hnih u ne Baala täng ah ami ng’hlah ah mäih ah, ngami naw ami mang ami m’thein gui phäh ah ka chang gui naw kei na m’hnih khai gui ah ngai ci gui nei.

²⁸ Amang shek ciah prophet tumat naw mang cu mang nei cik khai, cun ung phi kei ah ng’thu ng’yak ciah prophet läi naw cun ah thu cu bekhüt ne ng’shäu khai nei. Htang awn m’tumtäng ung htang gong cu a i a ni nak om khai aw?

²⁹ Kei ah ng’thu cu mei ah mäih ah kyak ci, lung khui khai ah shuk ciah ng’kii ah mäih ah kyak ci.

³⁰ Ami mät ah ng’thu ng’lak tupe u neta, kei ah ng’thu ah pyen ne ng’shäu ciah chang gui cu kei naw ka hnungtuk gui ci nei.

³¹ Ami mät ah ng’thu ei am kei ungka lawk ciah ng’thu ah pyen ci gui ah prophet gui phi kei naw ka hnungtuk gui ci nei.

³² Kei Bawipa naw ka pyen cu ngai vä! Hleei phaang ah kyak ciah ami mang chang am m’thein ci gui ah prophet gui cu kei naw ka hnungtuk gui ci nei. Ngami naw shin ah mang gui cu pyen u ne, ami hleei nak la khäghah nak awn ka chang gui cu lam hma sak ci gui nei. Kei naw kä ka tüi gui ci, ami hteh vai ah kä ka k’bäi gui ci. Ngami cu chang ah phäh ah a i ah phi kä bä ci gui. Kei, Bawipa naw ka pyen nei.”

Bawipa ah Phuih

³³ Bawipa naw na pyen nak ci, “Jeremiah, ka chang tumat mat naw baw, prophet naw baw, taigü naw baw, ning shi law ne, ‘Bawipa ah thu pyen cu a i ang?’ Nang naw na m’thein vai cu, ‘Nang cu Bawipa ung phuih ah na kyak ci, ani naw nang cu ning k’täm lawk kahi nei.’

³⁴ Ka chang tumat mat käcung prophet, käcung taigü tumat mat naw ‘Bawipa ah phuih’ cine a pyen ah a kyak un, kei naw ami mät la ami kyongchang gui cu ka m’kyuk khai nei.

³⁵ Cun nak vaisü ung ngami tumat cine ami teihpüi gui la ami mätyah gui cu, ‘Bawipa naw a i m’shan nak ang aning pek gui? Bawipa naw a i ang a pyen?’ cine nami ng’shi gui vai nei.

³⁶ Cun ung ngami naw ‘BAWIPA ah phuih’ ciah ng’thu cu kä mang ba khai gui nei, a i ah kyasei ci ung, tumat mat naw a pyen ba ah a kyak ung kei ah ka ng’thu cu ani ah khan ah phuih ah kyak khai ah ka bik khai nei. Chang gui ne m’gäi ciah Bawipa, ghing ciah khanpughi, ami khanpughi ah ng’thu cu m’hlat shüi ci gui nei.

³⁷ Jeremiah, naw prophet gui ng’shi gui ci, “A i m’shan nak nei Bawipa naw aning pek? Bawipa naw a i nei a pyen?

³⁸ Ngami naw kei ah thumkä ngai ne, ‘Bawipa phuih’ ciah ng’thu ami mang ba ah a kyak ung, nami m’thein gui vai,”

³⁹ Ngami cu kei naw ang ghit ah zu chang gui ne, kapei ungka naw ahei ah ka gawt gui khai, ngami ami van la ka pek gui ah mang gaw gui la ami htanau gui ah kyak khai.

⁴⁰ Kei naw ngami ah khan ah angtäi lung aa nak la thüisei nak cu ka law püi khai, cun cu kä m’hnih hlawt vai kyak khai nei.