JEREMIAH 22 - Cho Bible Common Language 2016

Judah Mangkyong gui am Jeremiah naw Ng’thu M’thein gui ci

^1-2 Bawipa naw, David ah htangshon, Judah ghangpughang ah mang im ah ka hteh vai ah na m’thein ci. Acu ah ghangpughang, abawi gui la ka m’thein gui vai ah kyak ci:

³ Kei, Bawipa naw ka ning thumkhän gui ci, taga ci la dung cicu nami bi vai. Nangmi naw ami m’hleei ah chang cu m’hleei ciah chang ungka nami shungvong vai. Akhohei chang gui, hmeihta gui, hmei nu gui cu, akshe ah kä nami om nak gui vai, kä nami shedam nak gui vai: shin ah theing-cim ciah hmun ung changni gui cu kä nami ngawn gui vai.

⁴ Kei naw ka thumkhän ah mäih ah akcang ah nami bi ah a kyak ung David ah htangshon gui cu k’täi ne ghangpughang ah kyak khai gui. Ngami cu ami bawi gui la ami chang gui awn atäng ah shin ah mang im m’kawt gui cu yatha gui la ng’se gui awn kaan lä khai gui.

⁵ Cun ung phi nangmi naw ka thumkhän cu kä nami läk ah a kyak ung, kei ka ng’taam ci nei, shin ah mang im cu ng’kia ne di khai nei. Kei Bawipa naw ka pyen nei.

⁶ “Kei ah phäh ah Judah mang im cu Kilead khaw la Lebanon m’htung ah mäih ah kyom ci nei; cun ung phi cun cu a u naw kä aom nak ah kyak khai ah kakei sak khai nei.

⁷ Cun m’di khai ah kei naw chang gui ka tüi lawk khai. Ngami ami van naw ghei gui law püi u ne kyom ciah a cedar sing gui cu chu pit u ne, mei ung m’khih khai gui nei.

⁸ “Cun kawn ah akhohei chang gui akda naw cun cu sun pah u neta, shin ah däm duh ciah mang gaw ah khan ah, a i ah kyasei Bawipa naw shin ah abi ang, cine ami mät ng’shi tuk khai gui.

⁹ Cun cu ngami naw shang u ne, kei, nami khanpughi awn thukhän cu nawng cine, ahei khanpughi gui khawihnah ne abii nami bi ah phäh ah kyak ci nei” cik ci.

Joahaz ah Mawng Jeremiah ah Ng’thu pyen

¹⁰ Judah chang gui, ghangpughang Josiah ah phäh ah kä kyap vä; ani asih ah phäh ah kä thüi vä. Cun ung phi a htapa Joahaz ah phäh ah aktung ah kyap vä, Ani cu asho nak ah hteh püi ci gui nei. Kä law ba khai nei, ami hta nak ah kho cu ani naw kä hmu tuba khai nei.

¹¹ Judah ghangpughang ah kya ne apa ah hnün ung ngo ba ciah Josiah ah htapa Joahaz ah mawng cu Bawipa naw shin cha ah pyen ci, “Ani cu shin ungka naw ahei ah hteit pyi ci nei, kä law ba khai nei.

¹² Ani ami hteh püi nak ah khopäng ung sik khai nei, ani naw shin ah kho cu kä hmu tuba khai nei.”

Jehoiakim ah Mawng Jeremiah ah Ng’thu pyen

¹³ Kä taga ciah lam awn a im co ne, kä ng’düng ciah lam awn m’shawng kau ne, chang gui alä ah täk phan gui ne, ng’cheng phi kä pe gui ciah chang cu, ng’ziin nak om ci.

¹⁴ “Kei naw mang im nu co ne akhan ah akhan ang shawng gui akda ka pyang khai” ci ne khähghah cicu ng’ziin nak om ci. Ani naw a im ung m’kawt gui pyang ne, cedar sing awn pyang ne a sen awn hluk ci.

¹⁵ Nang naw cedar sing awn im co ne, ahei im gui ah ta niba pi khai ah na pyan ung phi, cun naw bä ba pi ciah ghangpughang ah ning pyan khai ang? Nang ah napa cu a ghin ah chuih zeikia ci. Akphlüt ah ng’düng ne taga ci, ani abi lawk nak nü ung bämcam ci.

¹⁶ Ani naw dukhaih ci gui cu taga khai ah pe gui ci, cun ah kyasei apäng avan cu bä ci. Cun cu Bawipa hmuhmat nak ah phäh ah kyak ci.

¹⁷ Cun ung phi namät ah phäh hta bäng cu nang naw na hmuk ci; Nang naw changnigui na ngawn ci, na chang gui phi m’ghämce ne nak shedam nak ci. Cun cu Bawipa ah Thu pyen nei.

¹⁸ Cun ah kya sei, Jehoiakim Josiah ah hta, Judah ghangpughang ah mawng Bawipa naw a pyen cu; “A u chang naw phi ani ah sih ah phäh ah thüi ne, azä hawi ah, ka theih püi aw azä hawi ah! Kä cik khai nei. A u chang naw phi ani ah phäh ah thüi ne kyap ne, ‘Ka bawi aw! Ka ghangpughang aw! Kä cik khai nei.’

¹⁹ Ng’sela asih ung ami ciah mäih ah ani cu saw ne hteh püi ne, Jerusalem m’kawt ah akpung ah ghawt khai gui nei.

Jerusalem ah Ng’kyak law vai ah Mawng Jeremiah ah Ng’thu pyen

²⁰ Jerusalem chang gui, Lebanon ah hteit ne m’lau vä, Bashan khaw ah hteit ne kyap vä; Moab m’htung ung ka naw ng’khü vä, a i ah kyasei ci ung nami khawt püi gui avan cu hnim gui ci gui nei.

²¹ Nami bühmang yah ung Bawipa naw ning thu püi gui ci, cun ung phi nangmi naw ma ne kä nami ngai ci. Nangmi cu nami ghin ah chuih acun ah nami kyak ci; Bawipa cu kä nami läk phung ci.

²² Nami ng’vaihta gui cu khokhi naw zon gui khai, nami khawt püi gui cu ng’tuk nak ung pha ne chumne hteh püi gui khai gui; Nami ah mang gaw cu a thangshe sei thui ng’aa khai a i ah kyasei ci ung nangmi naw akshe nami bi gui avan ah phäh ah kyak ci.

²³ Nangmi cu Lebanon ah ka ami law püi ah cedar sing gui ah ng’lung ah phyawng m’htein ne nami om ci; cun ung phi m’neh nak naw a ning ci law gui ung a i hlawt ah ning m’gein gui vai ah kyak khai aw, cun ah natnak cun anau poi m’neh ciah hnumi ah m’hneh ah mäih ah kyak khai nei.

Jehoiachin ah Khan ah Khanpughi ah M’khoi cha nak

²⁴ Bawipa naw ghangpughang Jehoiachin Judah ghangpughang cu pyen nak ci, “Kei cu ghing ciah khanpughi akcang ah ka kyak ah mäih ah nang ka k’pat täng ung ka naak ah m’hnüt ah kut cüp ah na kyak ung phi, kei naw ka nang cu ning suut ne

²⁵ nang naw na kyih gui ah chang la nang ning ngawn hlük ci gui ah chang gui am ka ning pek khai. Kei naw nang cu Babilonia ghangpughang Nebukhadnezzar la a gakap gui am ka ning ap khai.

²⁶ Kei naw nang la na nu cu omktu khaw ah ka nung k’täm lawk khai. Nangmi cu kä nami ng’tüi nak ah nami hteit lawk khai, nami van acu ah nami sik khai.

²⁷ Nangmi naw shin ah khaw cu nami hmu ba hlük khai, cun ung phi nangmi kä nami law bap hung khai.”

²⁸ Kei naw ka pyen ci, “Ghangpughang Jehoiachin cu hlüng payak sei ami ghawh a u naw phi kä a ng’yak hlü ah mäih ah kya ne ang? Cun ah kyasei ani la a hta nau gui cu ami mawng ama a i phi kä ami hmat ah om k’tu khaw ah ami hteh püi gui ah kä kya ne ang?

²⁹ O khonglei, khonglei, khonglei! Bawipa ah thu pyen cu ngai ä:

³⁰ “Shin ah chang cu a hta nau kä om khai ah m’kyuk pyi nei, ani cu näng nak kä gah phung ciah kyak khai nei. David ah ng’shon m’täm ne Judah uk ba khai ah htangshon ani ung kä om khai nei. Kei, Bawipa naw ka pyen nei.”