JEREMIAH 21 - Cho Bible Common Language 2016

Jerusalem ami Hnim vai ah Mawng Ng’cängbang nak

¹ Judah ghangpughang Zedekiah naw Malchiah ah hta Pashhur la Maaseiah ah hta taigü Zephaniah cu shin ah ng’thu pyen awn kei ah tüi lawk ci:

² “Na bä ni, kei mi ah phäh ah Bawipa ah na thäh pe gui ä, a i ah kyasei ci ung Babilonia ghangpughang Nebukhadnezzar la a gakap gui naw mang gaw cu khai ci gui nei. Bawipa naw keimi ah phäh ah cäi aih vai tumat bawta m’dang ne, Nebukhadnezzar cu ng’hlah ei ba sak hman khai nei.”

³ Cun kawn ah Bawipa naw na ng’thu püi sei, ami tüih law ah chang gui am ka m’thein gui ci.

⁴ Cun cu Israel khanpughi ah ng’thu Zedekiah am m’thein vai ah kyak ci, ani naw pyen ci, “Zedekiah, Babilonia ghangpughang la a gakap gui hnungtuk ne ng’tuk ci gui ah na gakap gui cu kei naw ka hnim lawk khai nei. Na gakap gui ah likhim gui cu mang gaw ah ng’lung ung ka k’bum khai nei.

⁵ Kei naw ka m’gäi nak, ka m’lungshe nak, ka nget nak, ka m’lungso nak avan awn nang cu ka ning tuk khai nei.

⁶ Shin ah mang gaw ung om ci nü kei naw ka ngawn khai nei; chang gui la seime gui cu kyih vai ah natnak ung sik khai gui nei.

⁷ Cun ung phi nang, na bawi gui la ng’tuk nak, camisha la natnak ung ka k’pawih ba ci gui-nangmi nami van cu ghangpughang Nebukhadnezzar la ning ngawn hlü gui ciah nami ga gui am ka ning hnim sak gui khai. Nebukhadnezzar naw sih nak ning pe gui khai. Ani naw nangmi a u phi kä k’pawih nak khai, chimgein nak, chihna nak a u am phi kä m’dang khai, kei, Bawipa naw ka pyen ci.”

⁸ Cun kawn ah chang gui am ka m’thein gui vai ah Bawipa naw na pyen nak ci, “Ngai vä! Kei, Bawipa naw, ghin nak ah lam la sih nak ah lam nami ghü vai ah ka ning pe gui ci nei.

⁹ Mang gaw kyong ah k’pawih ba ciah chang phung ng’tuk nak ung ei ah cawi ne, natnak ung sik khai. Cun ung phi akpung ah hteit ne tuhbäi mang gaw tuk ci gui ah Babilonia gui ah ma ah a kut chah cicu kä ngawn khai gui; ngami cu ami hnun ghin nak läi phyawng khai.

¹⁰ Shin ah mang gaw cu kä m’düm ne m’di vai ah kei naw ka m’lung ung ka k’bäi pyi ci. Shin cu Babilonia ghangpughang am ap vai, ani naw m’dek ung khüt khai ah m’khih khai. Kei, Bawipa naw ka pyen ci nei.”

Judah Mang im gui ah Khan ah Akbäi ah Ng’thumcha nak

^11-12 David ah ang shon Judah mang im gui am pek gui vai ah Bawipa naw kei ana pyen nak cu, “ngai vä, kei, Bawipa naw ka pyen cu. Hmu vä, taga nak cu a hnüüp tä bi nei. Ami guttep ah chang cu guttep ciah kut ung ka shungvong vä. Cun ah kä nami bi ung, akshe nami bi kei ah m’lungshe nak naw mei ah mäih ah ui sei, cun cu a u naw kä m’sih hlawt khai nei.

¹³ Nang, Jerusalem cu khongnawi ah khan hlüng ne na ngok ci nei, cun cu kho zaw ung hang tho ciah lungksong ah mäih ah kyak ci nei. Cun ung phi kei naw hnung tuk ne ka ning tuk püi khai nei. Nang naw, a u naw kä na tu gui hlawlt khai, nami ng’vong pang phi a u naw kä m’shet hlawt khai nami cik ci.

¹⁴ Cun ung phi nami bi ah phäh ah kei naw ka ning m’kyuk gui khai. Na mang im cu kei naw mei awn ka m’khih khai, cun ah mei naw a pei leng avan ui yawp khai. Kei, Bawipa naw ka pyen nei.”